រដ្ឋមន្ត្រីអាល្លឺម៉ង់ទៅបំពេញទស្សនកិច្ចនៅតៃវ៉ាន់ ជាលើកទីមួយ
នៅថ្ងៃអង្គារទី ២១មីនា២០២៣នេះ រដ្ឋមន្ត្រីក្រសួងអប់រំអាល្លឺម៉ង់ បានអញ្ជើញទៅបំពេញទស្សនកិច្ចនៅកោះតៃវ៉ាន់។ នេះជាលើកទីមួយហើយ គិតតាំងពី២៦ឆ្នាំមក ដែលមានរដ្ឋមន្ត្រីអាល្លឺម៉ង់ធ្វើដំណើរទៅកាន់កោះដែលចិនទាមទារថាជារបស់ខ្លួន។ កម្មវត្ថុនៃទស្សនកិច្ច គឺដើម្បីចុះហត្ថលេខាលើកិច្ចព្រមព្រៀងជាដៃគូបច្ចេកវិទ្យា។ តើទស្សនកិច្ចនេះអាចនឹងធ្វើចិនក្តៅក្រហាយយ៉ាងណា ?
ចុះផ្សាយនៅថ្ងៃ៖
ស្តាប់ - ០២:០៤
កិច្ចព្រមព្រៀងបច្ចេកវិទ្យារវាងអាល្លឺម៉ង់តៃវ៉ាន់ ជាការសម្រួលកិច្ចសហប្រតិបត្តិការឱ្យកាន់តែប្រសើរឡើងដោយឈរលើមូលដ្ឋានប្រជាធិបតេយ្យ តម្លាភាព បើកចំហ និងសេរីភាពវិទ្យាសាស្ត្រ។ នេះជាប្រសាសន៍របស់លោកស្រីរដ្ឋមន្ត្រីក្រសួងអប់រំអាល្លឺម៉ង់ បេទីណា ស្តាក វ៉ាទីនឺ Bettina Stark-Watzinger ដោយបញ្ជាក់ថា លោកស្រី មានក្តីរីករាយនិងកិត្តិយសខ្លាំងណាស់ ដែលបានធ្វើដំណើរទៅដល់កោះតៃវ៉ាន់ ដំបូងគេ ក្នុងនាមជាសមាជិករដ្ឋាភិបាលអាល្លឺម៉ង់ ក្នុងរយៈពេលជាងពីរទសវត្សរ៍មកនេះ។
ប៉ុន្តែសម្រាប់ប៉េកាំង នេះជាទស្សនកិច្ចបែបទុច្ចរិត។ អ្នកនាំពាក្យក្រសួងការបរទេសចិន បានបញ្ចេញប្រតិកម្មប្រឆាំងដាច់ខាត ភ្លាម តាមរយៈសន្និសីទកាសែតថ្ងៃអង្គារនេះថា ចិនសូមតវ៉ា និងសម្តែងកំហឹងយ៉ាងខ្លាំងនឹងអាល្លឺម៉ង់។ ចិនតែងខឹងសម្បារប្រឆាំងរាល់គ្រប់ការផ្តោះប្តូរផ្លូវការរវាងតៃវ៉ាន់និងដៃគូអន្តរជាតិ។ ដោយឈរលើគោលការណ៍ចិនតែមួយ ប៉េកាំងបានចាត់ទុកកោះស្វយ័តតៃវ៉ាន់ ជាខេត្តមួយដែលចិននឹងក្រសោបយកគ្រប់គ្រងវិញ នៅថ្ងៃណាមួយ និងដោយប្រើកម្លាំងផងបើចាំបាច់។
កាលពីសប្តាហ៍មុន ក្រសួងការបរទេសអាល្លឺម៉ង់បានបញ្ជាក់ជាថ្មីអំពីជំហរនយោបាយគោរពគោលការណ៍ចិនតែមួយ ប៉ុន្តែអាល្លឺម៉ង់នៅតែបន្តមានទំនាក់ទំនងផ្លូវការស្អិតល្មួតជាមួយតៃវ៉ាន់ដដែល។ ចំណែកលោកស្រីរដ្ឋមន្ត្រី មិនធ្វើអត្ថាធិប្បាយអ្វីទាក់ទងនឹងការរិះគន់របស់ចិនលើទស្សនកិច្ចនេះទេ។ ជាទស្សនកិច្ចក្នុងក្របខ័ណ្ឌនៃការផ្តោះប្តូរធម្មតាប៉ុណ្ណោះ។ នេះបើតាមលោក Wu Tsung-tsong រដ្ឋមន្ត្រីក្រសួងវិទ្យាសាស្ត្រនិងបច្ចេកវិទ្យាតៃវ៉ាន់ ដោយលម្អិតថា កិច្ចព្រមព្រៀងបច្ចេកវិទ្យាអាល្លឺម៉ង់តៃវ៉ាន់ គ្រោងបើកឱ្យមានការស្រាវជ្រាវរួមគ្នាក្នុងវិស័យជាច្រើនមានជាអាទិ៍ semi-conducteurs និងបញ្ញាសិប្បនិម្មិត។ ហើយបើតាមសារព័ត៌មានតៃវ៉ាន់ ក្រុមហ៊ុនបច្ចេកវិទ្យាតៃវ៉ាន់TSMCដែលជាផលិតករបន្ទះឈីបដ៏ធំជាងគេបំផុតនៅលើពិភពលោក កំពុងចរចាបើករោងចក្រផលិតបន្ទះឈីបនៅអឺរ៉ុបទីមួយ នៅក្នុងទឹកដីអាល្លឺម៉ង់ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ