លោកស៊ីជីនពីង សង្ឃឹមឃើញ ទំនាក់ទំនងចិនអាមេរិក ប្រសើរឡើង ក្រោយជំនួបជាមួយលោក ប្លីងកិន
នៅថ្ងៃ ចន្ទទី ១៩ មិថុនា ២០២៣ ដែលជាថ្ងៃចុងក្រោយនៃទស្សនកិច្ចនៅក្រុងប៉េកាំង ប្រមុខការទូតអាមេរិក លោក អង់តូនី ប្លីងកិន បានទទួលការអនុញ្ញាតឱ្យចូលជួបប្រធានាធិបតីចិន លោក ស៊ី ជិនពីង។ ក្នុងជំនួបដ៏កម្រនេះ ចិនបានរកឃើញភាពស្រុះស្រួលគ្នាខ្លះជាមួយអាមេរិក។ នេះបើតាមសម្រង់ប្រសាសន៍របស់លោកស៊ីជីនពីង ដែលចុះផ្សាយដោយទូរទស្សន៍ជាតិចិន។
ចុះផ្សាយនៅថ្ងៃ៖
ស្តាប់ - ០២:១០
តាំងពី៥ឆ្នាំមក នេះជាលើកទីមួយដែលប្រធានាធិបតីចិនព្រមមានជំនួបជាមួយរដ្ឋមន្ត្រីការបរទេសអាមេរិក។ ជាជំនួបដែលសម្រេចឡើងនៅនាទីចុងក្រោយនៃកម្មវិធីទស្សនកិច្ចរបស់លោកប្រមុខការទូតអាមេរិក នៅទីក្រុងប៉េកាំង។
សង្ឃឹមថា ក្រោយទស្សនកិច្ច លោកប្រមុខការទូតអាមេរិកនឹងពាំនាំធ្វើយ៉ាងណាឱ្យ ទំនាក់ទំនងអាមេរិក-ចិន មានស្ថិរភាព និងបានប្រសើរឡើង។ នេះជាប្រសាសន៍របស់លោក ស៊ី ជីនពីង ទៅកាន់លោកប្រមុខការទូតអាមេរិក អង់តូនី ប្លីងកិន ដែលផ្សព្វផ្សាយដោយប្រព័ន្ធឃោសនារដ្ឋចិន។ បើតាមប្រភពទូរទស្សន៍ជាតិចិនដដែល លោក ប្រធានាធិបតី ស៊ី ជីនពីង បានប្រកាសថា សហរដ្ឋអាមេរិកនិងចិន បានរកឃើញភាពស្រុះស្រួលគ្នាលើចំណុចខ្លះ (តែមិនបានបញ្ជាក់ថាចំណុចអ្វីទេ) គឺជាភាពជឿនលឿនដ៏ល្អសម្រាប់ភាគីទាំងពីរ។
សូមបញ្ជាក់ថា មុននឹងមានជំនួបជាមួយប្រធានាធិបតីចិន លោក ប្លីងកិន បានជួបពិភាក្សាជាមួយប្រធានការិយាល័យកិច្ចការបរទេសរបស់គណបក្សកុម្មុយនិស្តចិន លោក វ៉ាង យី។ លោក វ៉ាងយី បានផ្តល់មេរៀនសីលធម៌ជាច្រើនដល់ប្រមុខការទូតអាមេរិក ដោយបានប្រកាសថា ទំនាក់ទំនងរវាងចិន-អាមេរិកធ្លាក់ដុនដាបដល់កំរិតបច្ចុប្បន្ននេះ បណ្តាលមកពីការយល់ខុសរបស់អាមេរិកមកលើចិន។ ដូច្នេះ អាមេរិកនិងចិនត្រូវមានទំនួលខុសត្រូវចំពោះពលរដ្ឋ ប្រវត្តិសាស្ត្រ និងពិភពលោក និងប្តូរវដ្តនៃទំនាក់ទំនងអវិជ្ជមាននេះចេញវិញ។ នៅក្នុងសេចក្តីថ្លែងការណ៍របស់ក្រសួងការបរទេសចិន លោកទីប្រឹក្សារដ្ឋ វ៉ាងយី បានរំលឹកជំហរដាច់ខាតរបស់ចិនថាមិនសម្រុះសម្រួលអ្វីទាំងអស់ក្នុងសំណុំរឿងតៃវ៉ាន់ និងស្នើសុំឱ្យអាមេរិកពិចារណាឱ្យបានស៊ីជម្រៅ ហើយជ្រើសរើស រវាង “កិច្ចសហប្រតិបត្តិការនិងជម្លោះ”។ ក្រោយពីជជែកគ្នារយៈពេល៧ម៉ោងកន្លះ ប្រមុខការទូតទាំងពីរបានព្រមព្រៀងរក្សាការនិយាយទាក់ទងគ្នាដើម្បីបញ្ចៀសជម្លោះ។
នេះជាលទ្ធផលនៃជំនួបដែលចុះផ្សាយដោយសារព័ត៌មានចិន តែខ្លឹមសារពិត នៃកិច្ចពិភាក្សា ដោយបិទទ្វារ អាចបន្ធូរភាពតានតឹងរវាងប្រទេសទាំងពីរបានកំរិតណានោះ គេទំនងជានឹងអាចដឹងជាលម្អិត នៅពេលខាងភាគីអាមេរិកធ្វើសន្និសីទកាសែត បិទបញ្ចប់ទស្សនកិច្ចរបស់លោកប្លីងកិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ