វៀតណាមបើកសវនាការកាត់ទោសមន្ត្រីជាង៥០នាក់ ពីបទពុករលួយក្នុងពេលមានកូវីដ
បន្ទាប់ពីបើកអង្កេតអស់ពេលមួយឆ្នាំ និងមានមេធាវីការពារក្តីជាងមួយរយនាក់ តុលាការក្រុងហាណូយបានបើកសវនាការ នៅថ្ងៃអង្គារទី១១កក្កដា២០២៣នេះ កាត់ទោសមន្ត្រីជាន់ខ្ពស់-ជាន់ទាប និងអតីតរដ្ឋមន្ត្រីផង សរុបជាង៥០នាក់ ពីបទពុករលួយ។ បើតាមបទចោទប្រកាន់ មន្ត្រីទាំងអស់នោះទំនងបានទទួលសំណូក ពាក់ព័ន្ធនឹងការដឹកជញ្ជូនពលរដ្ឋវៀតណាមនៅបរទេសឱ្យត្រលប់ចូលស្រុកវិញ ក្នុងពេលផ្ទុះជំងឺរាតត្បាតសកលកូវីដ១៩។ ជាសំណុំរឿងអាស្រូវពុករលួយដ៏ធំដែលជះឥទ្ធិពលប៉ះពាល់ដល់នយោបាយប្រទេសផង។
ចុះផ្សាយនៅថ្ងៃ៖
ស្តាប់ - ០២:២២
សវនាការដែលអាចមានរយៈពេលមួយខែ ប្រព្រឹត្តទៅក្នុងក្របខ័ណ្ឌនៃយុទ្ធនាការបោសសម្អាតអំពើពុករលួយទ្រង់ទ្រាយធំដឹកនាំដោយបុរសខ្លាំងលេខ១របស់វៀតណាម គឺលោកប្រមុខបក្សកុម្មុយនិស្ត ង្វៀន ភូចុង ដែលជាឥស្សរជនដ៏មានឥទ្ធិពលបំផុតនៅក្នុងប្រទេស។ លោកធ្លាប់បានគាស់កកាយទម្លាក់រដ្ឋមន្ត្រីជាច្រើនរូប និងធ្លាប់បានជំរុញឱ្យអតីតប្រធានាធិបតីវៀតណាមសុំលាលែងចេញពីតំណែងកាលពីដើមឆ្នាំផង។
សម្រាប់សវនាការថ្ងៃនេះ រដ្ឋអាជ្ញាត្រូវធ្វើការចោទប្រកាន់ជាផ្លូវការ អ្នកទទួលខុសត្រូវនិងមន្ត្រីចំនួន ២១នាក់ ពីបទបានទទួលលុយសំណូលប្រមាណជិត៧លានដុល្លារ ពីក្រុមហ៊ុនជាងមួយរយ ជាថ្នូរនឹងការសម្រួលកិច្ចការរដ្ឋបាលដឹកជញ្ជូនពលរដ្ឋត្រលប់ចូលស្រុកវិញ មុនការបិទប្រទេសដើម្បីប្រឆាំងនឹងជំងឺរាតត្បាតសកលកូវីដ១៩។ ៣៣នាក់ផ្សេងទៀត អាចនឹងត្រូវជាប់ចោទពីបទជួយសម្រួល ធ្វើអន្តរាគមន៍ក្នុងការសូកប៉ាន់ ប្រព្រឹត្តកំហុសឬរំលោភអំណាច។ ជាប់ចោទ១៨នាក់ ក្នុងនោះម្នាក់ជាអតីតអនុរដ្ឋមន្ត្រីក្រសួងការបរទេស លោក តូ អញហ្សុង និងនាយរងង្វៀន គ័ងលិញ ម្នាក់ទៀត អាចនឹងមានទោសដល់ជីវិត។
បើតាមប្រភពសារព័ត៌មានរដ្ឋវៀតណាម Thanh Nien ដដែល សំណុំរឿងពុករលួយនេះមានតម្លៃសរុប ៩,៥លានដុល្លារ ក្នុងនោះជាង ២,៦៥លានដុល្លារជាប្រាក់សូកមន្ត្រីនរគបាលដើម្បីបានរួចខ្លួន។
នៅដើមឆ្នាំ២០២០ វៀតណាមជាប្រទេសដំបូងគេមួយដែលសម្រេចបិទព្រំដែនដើម្បីទប់ស្កាត់ការចម្លងរីករាលដាលនៃជំងឺកូវីដ១៩។ រដ្ឋាភិបាលបានរៀបចំយន្តហោះដឹកជញ្ជូនតម្លៃថោកជិត៨០០ជើង ដើម្បីនាំប្រជាពលរដ្ឋរស់នៅបរទេសឱ្យត្រលប់ចូលស្រុកវិញ។ ប៉ុន្តែពលរដ្ឋទាំងនោះត្រូវប្រឈមនឹងសំណុំបែបបទរដ្ឋបាលស្មុគស្មាញខ្លាំងណាស់ ដោយត្រូវបង់ថ្លៃសំបុត្រយន្តហោះនិងថ្លៃធ្វើចត្តាឡីស័កយ៉ាងសម្បើមក្រៃ។ អតីតអនុរដ្ឋមន្ត្រី តូ អញហ្សុង បានទទួលលុយសំណូកជាង៩សែនដុល្លារពីក្រុមហ៊ុនអាកាសចរណ៍ ដើម្បីបានទទួលសិទ្ធិរៀបចំជើងហោះហើរទៅយកពលរដ្ឋនៅក្រៅប្រទេស។
ថ្នាក់ដឹកនាំកំពូលរដ្ឋជាច្រើននាក់បានធ្លាក់ពីតំណែងរួចហើយ កាលពីដើមឆ្នាំ ដោយហេតុតែគ្រប់គ្រងស្ថានការណ៍កូវីដ១៩មិនបានត្រឹមត្រូវ មានជាអាទិ៍អតីតឧបនាយករដ្ឋមន្ត្រីពីររូប។ ដោយឡែក មានមន្ត្រីនិងសហគ្រិនយ៉ាង១០០នាក់ផ្សេងទៀតបានចាប់ខ្លួន ក្នុងរឿងអាស្រូវចែកចាយប្រដាប់ធ្វើតេស្តកូវីដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ