ចិនប្រាប់អាមេរិកថាគ្មានអ្វីអាចរារាំងឬខ្ទប់ដំណើរឆ្ពោះទៅមុខរបស់ខ្លួនបានទេ
មន្ត្រីជាន់ខ្ពស់បក្សកុម្មុយនិស្តចិន ទទួលបន្ទុកកិច្ចការបរទេស លោក វ៉ាងយី បានអះអាងនៅថ្ងៃពុធនេះថា ចិនមានការអភិវឌ្ឍយ៉ាងស្វាហាប់និងតាមលំអានប្រវត្តិសាស្ត្រ ដូច្នេះគ្មានអ្វីដែលអាចមកប្តូរផ្លាស់ចិន និង រារាំងឬខ្ទប់ចិនបានឡើយ។ ប្រសាសន៍លោក វ៉ាងយី ធ្វើឡើងក្នុងពេលជួបសន្ទនាជាមួយអតីតរដ្ឋមន្ត្រីការបរទេសអាមេរិកវ័យ១០០ឆ្នាំ លោក Henri Kissenger នៅទីក្រុងប៉េកាំង។
ចុះផ្សាយនៅថ្ងៃ៖
ស្តាប់ - ០២:១៥
ដោយយោលទៅលើភាពជាក់ស្តែងនៃប្រវត្តិសាស្ត្រ និងភាពស្វាហាប់នៃការអភិវឌ្ឍចិន គ្មានអ្វីដែលអាចមកសាកល្បងប្តូរផ្លាស់ចិនបានទេ និងក៏គ្មានអ្វីដែលអាចមករារាំងឬខ្ទប់ចិនបានឡើយ។ នេះជាសេចក្តីប្រកាសរបស់លោកវ៉ាងយី ទៅកាន់អតីតប្រមុខការទូតអាមេរិកវ័យ១០០ឆ្នាំ លោក Kissinger។
បន្ទាប់ពីបានអបអររំឭកស្នាដៃជាប្រវត្តិសាស្ត្ររបស់លោកKissinger ក្នុងការរួមចំណែកផ្សះផ្សាឱ្យចិននិងអាមេរិកអាចភ្ជាប់ទំនាក់ទំនងការទូតនឹងគ្នា លោក វ៉ាងយី បានបញ្ជាក់ថា នយោបាយចិនចំពោះអាមេរិកជាការបន្ត និងតតាមគន្លងដែលផ្អែកលើមូលដ្ឋានគ្រឹះ ស្នើឡើងដោយប្រធានាធិបតីស៊ីជីនពីង ចំនួនបីចំណុច គឺគោរពគ្នាទៅវិញទៅមក រួមរស់ជាមួយគ្នាដោយសន្តិវិធី និងមានកិច្ចសហប្រតិបត្តិការឈ្នះៗ។ បើតាមលោកវ៉ាងយី ទ្រឹស្តីបីចំណុចនេះជាគ្រឹះនិងជាក្រមសីលធម៌សម្រាប់ភាពស្រុះស្រួលគ្នារវាងមហាអំណាចចិននិងអាមេរិក។
ចំណែកនយោបាយអាមេរិកចំពោះចិនវិញ ត្រូវការភាពចាស់ទុំផ្នែកការទូតរបស់លោកKissinger និងសេចក្តីក្លាហាននយោបាយដូចលោកNixon។ លោកវ៉ាងយី ចង់សំដៅលើអតីតប្រធានាធិបតីអាមេរិក Richard Nixon ដែលបានភ្ជាប់ទំនាក់ទំនាក់ទំនងការទូតជាមួយចិនកុម្មុយនិស្តមុនគេ។
ជាចម្លើយតប លោកKissinger ដែលក៏បានជួបសន្ទនាជាមួយនឹងរដ្ឋមន្ត្រីការពារជាតិចិន កាលពីម្សិលមិញដែរ ប្រកាសថាក្នុងពិភពលោកបច្ចុប្បន្ន ភាពប្រឈម និង ឱកាស មានទន្ទឹមគ្នា ហើយសហរដ្ឋអាមេរិកនិងចិនត្រូវតែលុបបំបាត់ឱ្យអស់នូវភាពប្រទាំងប្រទើស បញ្ចៀសការតតាំងគ្នា និងរួមរស់ជាមួយគ្នាដោយសន្តិភាព។ លោកអតីតប្រមុខការទូតអាមេរិក សង្ឃឹមថាភាគីទាំងពីរ នឹងធ្វើខ្លួនជាមនុស្សចាស់ទុំ ប្រឹងអស់ពីលទ្ធភាពដើម្បីភាពចម្រើននៃទំនាក់ទំនងទ្វេភាគី និងស្តារសន្តិភាព ស្ថិរភាពនៅលើពិភពលោក។
ជាអតីតប្រមុខការទូតដ៏ល្បីល្បាញរបស់អាមេរិក លោកKissinger កាលនៅជាទីប្រឹក្សាសន្តិសុខជាតិ ធ្លាប់បានធ្វើដំណើរទៅប៉េកាំងដោយសម្ងាត់ដើម្បីរៀបចំទំនាក់ទំនងនិងទស្សនកិច្ចជាប្រវត្តិសាស្ត្ររបស់ប្រធានាធិបតីអាមេរិកNixon នៅប៉េកាំងឆ្នាំ១៩៧២។ ជាជ័យលាភីសន្តិភាពឆ្នាំ១៩៧៣ លោកព្រមានអំពីនយោបាយតឹងតែងរបស់អាមេរិកចំពោះប៉េកាំង។
ទស្សនកិច្ចរបស់លោកប្រព្រឹត្តទៅក្នុងខណៈដែលអាមេរិកកំពុងសម្រុកបញ្ជូនឥស្សរជនជាន់ខ្ពស់ ទៅចិនជាបន្តបន្ទាប់គឺប្រេសិតផ្នែកអាកាសធាតុលោកចនឃែរី ហើយមុននេះបន្តិចគឺលោកស្រីរដ្ឋមន្ត្រីក្រសួងហិរញ្ញវត្ថុនិងរដ្ឋមន្ត្រីការបរទេស លោកអង់តូនី ប្លីងកិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ