កូរ៉េខាងត្បូងរៀបចំកិច្ចប្រជុំត្រីភាគីថ្នាក់មន្រ្តីការទូតជាមួយចិន និងជប៉ុន
នៅថ្ងៃអង្គារ ទី២៦ កញ្ញា កូរ៉េខាងត្បូងរៀបចំកិច្ចប្រជុំថ្នាក់មន្រ្តីការទូតដ៏កម្រជាមួយចិន និងជប៉ុន។ កម្មវត្ថុនៃកិច្ចប្រជុំ គឺដើម្បីធានា និងកាត់បន្ថយក្តីកង្វល់របស់ចិនជុំវិញទំនាក់ទំនងសន្តិសុខស៊ីជម្រៅរវាងកូរ៉េខាងត្បូង ជប៉ុន និងសហរដ្ឋអាមេរិក។ ចិនបានសាទរពីការពិភាក្សាស៊ីជម្រៅស្តីពីការចាប់ផ្តើមឡើងវិញប្រកបដោយស្ថិរភាពនៃកិច្ចសហប្រតិបត្តិការត្រីភាគី។
ចុះផ្សាយនៅថ្ងៃ៖
ស្តាប់ - ០៣:០០
ការសាទររបស់ចិនបានធ្វើឡើងដោយអ្នកនំាពាក្យក្រសួងការបរទេសលោកវ៉ាង វេនប៊ីននៅក្នុងសន្និសីទកាសែតប្រចាំថ្ងៃក្នុងក្រុងប៉េកាំង។ តាមលោកវ៉ាង វេនប៊ីន ភាគីទាំង ៣បានយល់ឃើញដូចគ្នាថា កិច្ចសហប្រតិបត្តិការរវាងចិន ជប៉ុន និងកូរ៉េខាងត្បូងជាកិច្ចសហប្រតិបត្តិការដើម្បីផលប្រយោជន៍រួមសម្រាប់ប្រទេសទាំង ៣។ ទន្ទឹមគ្នានេះ លោកវ៉ាង វេនប៊ីនបានប្រាប់ឲ្យដឹងពីការព្រមព្រៀងរវាងប្រទេសទាំង ៣ ដើម្បីរៀបចំកិច្ចប្រជុំថ្នាក់រដ្ឋមន្រ្តីការបរទេសនៅប៉ុន្មានខែខាងមុខ និងលើកទឹកចិត្តឲ្យមានកិច្ចប្រជុំរវាងមេដឹកនាំកំពូលទាំង ៣ ឲ្យបានឆាប់ដែលអាចធ្វើទៅបាន។
ការលើកឡើងរបស់ភាគីចិនយ៉ាងដូចនេះក៏ត្រូវបានបញ្ជាក់ដោយក្រសួងការបរទេសកូរ៉េខាងត្បូងដែរ។ ចំណែកប្រមុខការទូតកូរ៉េខាងត្បូងលោកប៉ាក់ យីនបានបញ្ជាក់នៅក្នុងសេចក្តីប្រកាសព័ត៌មានមួយថា កិច្ចសហប្រតិបត្តិការរវាងកូរ៉េខាងត្បូង ចិន និងជប៉ុនដើរតួនាទីសំខាន់មិនត្រឹមតែនៅអាស៊ីឦសានប៉ុណ្ណោះទេ តែក៏ដើម្បីសន្តិភាព ស្ថិរភាព និងវិបុលភាពក្នុងលោកផងដែរ។ តាមលោកប៉ាក់ យីន ប្រជាជនកូរ៉េខាងត្បូង ចិន និងជប៉ុនបូកបញ្ចូលគ្នាស្មើនឹង ២០% នៃប្រជាជនសរុបក្នុងលោក ហើយផលិតសរុបក្នុងស្រុករបស់ប្រទេសទាំង ៣ បូកបញ្ចូលគ្នាស្មើនឹង ២៥% នៃផលិតផលសរុបក្នុងស្រុករបស់ពិភពលោក។
គួររម្លឹកថា កិច្ចប្រជុំកំពូលលើកចុងក្រោយរវាងមេដឹកនាំកំពូលចិន ជប៉ុន និងកូរ៉េខាងត្បូងបានរៀបចំកាលពីឆ្នាំ ២០១៩ នៅក្នុងប្រទេសចិន។ តាំងពីពេលនោះមក គ្មានកិច្ចប្រជុំកំពូលណាមួយត្រូវបានរៀបចំឡើងទេ។ មូលហេតុ គឺមកពីកូរ៉េខាងត្បូង និងជប៉ុនមានភាពមិនចុះសម្រុងគ្នាផ្លូវទូត និងរឿងប្រវត្តិសាស្រ្តពាក់ព័ន្ធក្នុងសម័យអាណានិគមជប៉ុននៅឧបទ្វីបកូរ៉េពីឆ្នាំ ១៩១០ដល់ឆ្នាំ ១៩៤៥។ ទោះជាយ៉ាងនេះក្តី ជប៉ុន និងកូរ៉េខាងត្បូងដែលជាសម្ព័ន្ធមិត្តរបស់អាមេរិកដូចគ្នាធ្លាប់មានជំនួបជាមួយអាមេរិកកាលពីខែសីហានៅលើទឹកដីអាមេរិក។
ជំនួបពេលនោះត្រូវបានប្រធានាធិបតីកូរ៉េខាងត្បូងលោកយូន ស៊ុកយោលចាត់ទុកជាការបើកទំព័រថ្មីនៅក្នុងទំនាក់ទំនងរវាងអាមេរិក ជប៉ុន និងកូរ៉េខាងត្បូង។ តែចិនបានចេញសេចក្តីប្រកាសព័ត៌មានរិះគន់ជំនួបកាលណោះដែលសម្ព័ន្ធមិត្តទាំង ៣ បានលើកឡើងពីអកប្បកិរិយាឈ្លានពានរបស់ចិននៅក្នុងសមុទ្រចិនខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ