លោកស៊ី ជីនពីង និងលោកពូទីន ប្រកាសរួមគ្នាថា "ទំនុកចិត្តកាន់តែល្អឈានឡើង" រវាងចិននិងរុស្ស៊ី
លោកស៊ី ជីនពីង និងលោក ពូទីន បានជួបគ្នានៅទីក្រុងប៉េកាំង នៅព្រឹកថ្ងៃពុធទី១៨តុលា។ ជាឱកាសដែលមេដឹកនាំទាំង២ បានបង្ហាញជំហរ រួមដៃសហការគ្នា តទល់ជាមួយក្រុមប្រទេសលោកខាងលិច។ ក្នុងជំនួបនេះ លោកស៊ី ជីនពីងបានថ្លែងថា ទំនុកចិត្តទៅវិញទៅមកផ្នែកនយោបាយ រវាងចិន និងរុស្ស៊ី គឺវាកាន់តែឈានល្អប្រសើរឡើងជានិច្ច។ ផ្អែកតាមការផ្សាយរបស់ ទីភ្នាក់ងារព័ត៌មានចិន Xinhua លោកប្រធានាធិបតីចិន បានលើកឡើងទៀតថា លោកចង់ឲ្យប្រទេសទាំង២ រួមសហការគ្នាដើម្បីសង្គ្រោះសមភាពអន្តរជាតិ ព្រមទាំងយុត្តិធម៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៩
សូមបញ្ជាក់ថា មេដឹកនាំទាំង២បានជួបគ្នាជាលក្ខណៈទ្វេភាគី នៅក្នុងឱកាសវេទិកាកំពូល រៀបចំនៅប៉េកាំងដើម្បីគម្រប់ខួប១០ឆ្នាំ នៃមហាគម្រោងផ្លូវមួយខ្សែក្រវ៉ាត់មួយរបស់ចិន។ ជាកម្មវិធីដ៏ធំ ដែលមានការចូលរួមពីបណ្តាថ្នាក់ដឹកនាំប្រមាណ១៣០ប្រទេស ហើយដែលលោកពូទីន ត្រូវបានភាគីចិនអញ្ជើញជាកិត្តិយស។ កម្មវិធីនេះ គឺជាឱកាសដើម្បីស្តារមុខមាត់ផ្នែកការទូតរបស់លោកពូទីន បន្ទាប់ពីរុស្ស៊ីបានឯកោខ្លាំងប្រមាណជាង១ឆ្នាំមកនេះ ដោយសារតែសង្គ្រាមដែលខ្លួនបានធ្វើទៅលើអ៊ុយក្រែន។ ដោយសារតែសង្គ្រាមនេះ រុស្ស៊ីបានរងនូវទណ្ឌកម្មសេដ្ឋកិច្ចជាច្រើន ពីសំណាក់បណ្តាប្រទេសលោកខាងលិច ហើយដែលបានតម្រូវឲ្យរុស្ស៊ី ត្រូវតែខិតខំស្វែងរកការសហការជួយ ពីសំណាក់ចិន ក្នុងនាមជាសម្ព័ន្ធមិត្ត ដែលមានវិវាទជាមួយពួកលោកខាងលិចដូចគ្នា។
នៅថ្ងៃពុធដែរ ក្នុងពេលថ្លែងសុន្ទរកថាបើកវេទិកា លោក ស៊ី ជីនពីង បាននិយាយបរិហារ អំពីការវាតទីសេដ្ឋកិច្ច និងការបែងចែកបក្សពួកជាក្រុមប្រឆាំងគ្នា។ លោកប្រធានាធិបតីចិន បានលើកឡើងថា លោកប្រឆាំងចំពោះការដាក់ទណ្ឌកម្មជាលក្ខណៈឯកត្តោភាគី ព្រមទាំងការកាត់ផ្តាច់ទំនាក់ទំនងសេដ្ឋកិច្ច ដើម្បីបំពេញមហិច្ឆតាផលប្រយោជន៍សេដ្ឋកិច្ចតែរៀងៗខ្លួន។ តែយ៉ាងណា លោកស៊ី ជីនពីង អះអាងថា ចិននឹងមិនទៅតតាំង ឲ្យកើតជាការប្រឈមមុខដាក់គ្នាផ្នែកមនោគមវិជ្ជា ឬក៏ទៅលេងល្បែងភូមិសាស្ត្រនយោបាយ កើតជាបែងចែកបក្សពួកនោះឡើយ។ ទន្ទឹមគ្នានេះលោកបានសង្កត់បន្ថែមនថា ការដែលប្រទេសមួយ ចាត់ទុកការរីកចម្រើនរបស់ប្រទេសមួយទៀត ថាជាការគំរាមមកលើខ្លួននោះ មានន័យថាយើងពិតជាមិនអាចជួយគ្នា ឬមិនអាចអភិវឌ្ឍន៍ឲ្យកាន់តែល្អប្រសើរឡើយ។
សូមរំលឹកថា នៅក្នុងបរិបទនៃការពង្រឹងការពារវិស័យយុទ្ធសាស្ត្រ ទាំងសហរដ្ឋអាមេរិក ទាំងបណ្តាប្រទេសអឺរ៉ុប បាននាំគ្នាដកខ្លួនចេញពីចិន ដើម្បីធ្វើយ៉ាងណាកុំឲ្យសេដ្ឋកិច្ច ពឹងផ្អែកលើចិនជ្រុលពេល ដែលអាចបង្កជាការប្រឈមគ្រោះថ្នាក់។ វិស័យបច្ចេកវិទ្យាទំនើប ត្រូវបានអាមេរិក និងអឺរ៉ុបយកចិត្តទុកដាក់បំផុត បន្ទាប់ពីបានសង្កេតឃើញថា ថាចិនអាចប្រមូលយកចំណេះដឹង ហើយប្រើប្រាស់វិស័យនេះមកដាក់សំពាធវិញ។
គួរគត់សំគាល់ដែរថា នៅក្នុងវេទិកាខួប១០ឆ្នាំនៃគម្រោងផ្លូវមួយខ្សែក្រវ៉ាត់មួយ លោកពូទីន ក៏បានឡើងថ្លែងសារដែរ ដោយលោកបានអបអរ កោតសរសើរពីជោគជ័យរបស់គម្រោងដ៏ធំរបស់ចិននេះ។ លោកពូទីនបានគូសបញ្ជាក់ថា ប៉េកាំងនិងម៉ូស្គូ មានបំណងប្រាថ្នាដូចគ្នា គឺការសហប្រតិបត្តិការដែលមានសមភាព នៅទូទាំងពិភពលោក។ ដោយឡែក ប្រភពពីអ្នកកាសែត បានឲ្យដឹងថា លោក Jean Pierre Raffarin តំណាងរដ្ឋាភិបាលបារាំង ដែលមានវត្តមាននៅក្នុងវេទិកានេះដែរ បានដើរចេញពីទីតាំងប្រជុំ មុនពេលលោកពូទីនឡើងថ្លែងសុន្ទរកថា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ