នៅថៃ រដ្ឋមន្រ្តីការបរទេសចិនជួបទីប្រឹក្សាសន្តិសុខរបស់ប្រធានាធិបតីអាមេរិក
ទីប្រឹក្សាសន្តិសុខជាតិអាមេរិក និង ប្រមុខការទូតចិន ស្កាត់ជួបគ្នានៅប្រទេសថៃ។ បើតាមក្រសួងការបរទេសចិន ក្រៅពីរឹតចំណងទាក់ទងនិងកម្តៅចំណងមិត្តភាពចិន-អាមេរិកឲ្យគ្រាន់បើឡើងវិញ គឺមន្ត្រីជាន់ខ្ពស់នៃប្រទេសមហាអំណាចទាំងពីរ នឹងលើកឡើងអំពីសំណុំរឿងតៃវ៉ាន់ ដែលជាប្រធានបទប្រឈមមុខគ្នាដ៏រស៊ើប។
ចុះផ្សាយនៅថ្ងៃ៖
ស្តាប់ - ០៣:០២
រដ្ឋធានីបាំងកក ជាទីដែល រដ្ឋមន្ត្រីការបរទេសចិន លោក វ៉ាង យី និង ទីប្រឹក្សាសន្តិសុខជាតិ លោក ជេក ស៊ូលីវ៉ាន់ ត្រូវស្កាត់ជួបគ្នា។ ជួបគ្នា ដ្បិត ប្រមុខការទូតចិន ត្រូវបំពេញទស្សនកិច្ច ចាប់ពីថ្ងៃសុក្រ ទី២៦ ដល់ទៅថ្ងៃចន្ទ ទី ២៩ មករា នៅព្រះរាជាណាចក្រថៃ គឺស្របពេលគ្នានឹងលោក ជេក ស៊ូលីវ៉ាន់ ដែលទៅដល់ទីនោះស្រេចស្រាប់។ នេះបើតាមការបញ្ជាក់របស់ក្រសួងការបរទេសចិន ក្នុងសេចក្តីថ្លែងការណ៍ នៅថ្ងៃសុក្រ។
ក្នុងសន្និសីទកាសែត នៅរដ្ឋធានីប៉េកាំង អ្នកនាំពាក្យការទូតចិន លោក វ៉ាង វីនប៊ីន ក៏បានបញ្ជាក់បន្ថែមថា ជំនួបទ្វេភាគីនៅក្រុងបាំងកកនេះ រដ្ឋមន្ត្រីការបរទេសចិន លោក វ៉ាង យី នឹងលើកឡើងជាថ្មីទៀត អំពីជំហររបស់រដ្ឋអំណាចចិន ចំពោះទំនាក់ទំនងចិន-អាមេរិក ហើយនិង ជំហររបស់ចិនចំពោះសំណុំបញ្ហាតៃវ៉ាន់។ ក្រៅពីនេះ ទស្សនវិស័យរបស់ចិនចំពោះបញ្ហាតំបន់និងអន្តរជាតិ ហើយនិងផលប្រយោជន៍រួមគ្នារបស់ចិននិងអាមេរិក ក៏ត្រូវលើកឡើង យកទៅជជែកពិភាក្សាគ្នាដែរ។
ចំណែកភាគីសហរដ្ឋអាមេរិកវិញ រដ្ឋបាលក្រុងវ៉ាស៊ីនតោន បានបកស្រាយថា ជំនួបរវាងរដ្ឋមន្ត្រីការបរទេសចិន និង ទីប្រឹក្សាសន្តិសុខជាតិ លើកនេះ គឺឋិតនៅក្នុងស្មារតីប្តេជ្ញាចិត្ត រវាងថ្នាក់ដឹកនាំកំពូល លោក ចូ បៃដិន និង លោក ស៊ី ជីនពីន ក្នុងជំនួបខែវិច្ឆិកា ឆ្នាំ២០២៣ ដែលលោកទាំងពីរ បានសន្យាឲ្យប្រទេសទាំងទ្វេបន្តជជែកគ្នា និងទាក់ទងគ្នាដោយការទទួលខុសត្រូវ។
តាមបណ្តាញទីភ្នាក់ងារព័ត៌មានបារាំងអាអេហ្វប៉េ, នាប៉ុន្មានឆ្នាំចុងក្រោយនេះ ទំនាក់ទំនងនៃមហាយក្សទាំងពីរ អាមេរិក-ចិន បានធ្លាក់ដុនដាបយ៉ាប់យឺនខ្លាំង។ ដុបដាបខ្លាំង ដ្បិតត្រូវប្រឈមមុខដាក់គ្នាយ៉ាងស្រួចស្រាលក្នុងសំណុំរឿងជាច្រើន តួយ៉ាង ជម្លោះសង្គ្រាមពាណិជ្ជកម្ម បញ្ហាតៃវ៉ាន់ ការប្រឈមគ្នាក្នុងវិស័យបច្ចេកវិទ្យាទំនើប ការប្រជែងឥទ្ធិពលអំណាចនៅតំបន់អាស៊ីប៉ាស៊ីហ្វីក វិបត្តិសមុទ្រចិនខាងត្បូង ហើយក៏មានដែរ បញ្ហាសិទ្ធិមនុស្ស។ ក៏ប៉ុន្តែ ចំណងទាក់ទងដ៏តានតឹងរវាងគូសត្រូវទាំងពីរ ហាក់បានធូរស្រាបបន្តិចវិញ ក្រោយពីប្រទេសទាំងពីរបោះដៃរកគ្នា និងចង់ជជែកគ្នាឡើងវិញ តាមរយៈមន្ត្រីជាន់ខ្ពស់អាមេរិកទៅប៉េកាំង ហើយ ប្រធានាធិបតីចិន អញ្ជើញទៅ ជួបប្រធានាធិបតីអាមេរិក នៅកាលីហ្វ័រញ៉ា កាលពីចុងឆ្នាំទៅមិញ។
ទោះជាយ៉ាងណាក៏ដោយចុះ បញ្ហាតៃវ៉ាន់ គឺនៅតែជាសំណុំរឿងធំដ៏ក្តៅគគុក នៅក្នុងកិច្ចពិភាក្សារវាងអាមេរិកនិងចិន នៅបាំងកកលើកនេះ គឺក្រោយពីសញ្ញាណតានតឹងឡើងជាថ្មី។ តានតឹងព្រោះតែក្រុងតៃប៉ិ បានបោះឆ្នោតរើសប្រធានាធិបតីថ្មីដែលមានទំនោរចង់ប្រកាសឯករាជ្យតៃវ៉ាន់ ហើយ សហរដ្ឋអាមេរិកបានបញ្ជូនគណៈប្រតិភូមិនផ្លូវការមួយ ធ្វើដំណើរទៅតៃវ៉ាន់ ដើម្បីចូលរួមអបអរ គឺមួយថ្ងៃក្រោយការបោះឆ្នោត និងបន្ទាប់ពី កោះណូរូ ប្រកាសផ្តាច់មេត្រីភាពជាមួយក្រុងតៃប៉ិ ដោយផ្អៀងតាមនយោបាយចិន ដែលធ្វើឲ្យតៃវ៉ាន់ឯកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ