តៃវ៉ាន់អំពាវនាវឲ្យចិនគោរពលទ្ធផលបោះឆ្នោត ក្រោយជ័យជំនះរបស់ លោក William Lai
នៅតៃវ៉ាន់ ការបោះឆ្នោតប្រធានាធិបតី កាលពីថ្ងៃសៅរ៍ទី១៣មករា បានបង្ហាញលទ្ធផលថា លោក Lai Ching-Te ឬលោក William Lai បានឈ្នះឆ្នោតក្លាយជាប្រធានាធិបតីថ្មី បន្តតំណែងពីលោកស្រី សៃ អ៊ីងវេន។ នេះជាអាណត្តិទី៣ជាប់គ្នាហើយ ដែលគណបក្សប្រជាធិបតេយ្យចម្រើននិយម ឈានមកកាន់កាប់អំណាចដឹកនាំតៃវ៉ាន់ ហើយដែលធ្វើឲ្យប៉េកាំងក្រេវក្រោធបំផុត ព្រោះគណបក្សនេះ មានទំនោរចង់ឲ្យតៃវ៉ាន់មានឯករាជ្យពេញបរិបូរ។
ចុះផ្សាយនៅថ្ងៃ៖
ស្តាប់ - ០៣:២០
យោងតាមលទ្ធផលបោះឆ្នោតប្រធានាធិបតី នៅថ្ងៃសៅរ៍ទី១៣មករា លោក William Lai ឬលោក Lai Ching-Te បេក្ខជនបក្សប្រជាធិបតេយ្យចម្រើននិយម និងជាមនុស្សស្និទ្ធបំផុតនឹងលោកស្រី សៃ អ៊ីងវេន បានឈ្នះសន្លឹកឆ្នោតប្រមាណ៤០,១%។ លោកនឹងចូលកាន់តំណែង ជាប្រធានាធិបតីថ្មី នៅថ្ងៃទី២០ ខែឧសភា។ ចំណែកតំណែងអនុប្រធានាធិបតី នឹងបានទៅលោកស្រី Hsiao Bi-Khim អតីតតំណាងតៃវ៉ាន់ប្រចាំនៅសហរដ្ឋអាមេរិក។
នៅព្រឹកថ្ងៃអាទិត្យទី១៤មករា ក្រសួងការបរទេសតៃវ៉ាន់ បានចេញសារអំពាវនាវ សូមឲ្យសាធារណរដ្ឋប្រជាមានិតចិន គោរពលទ្ធផលបោះឆ្នោតនៅតៃវ៉ាន់ ហើយត្រូវតែទទួលស្គាល់ការពិតជាក់ស្តែង ឈប់គំរាមសំឡុតមកលើតៃវ៉ាន់តទៅទៀត។ ក្រសួងការបរទេសតៃវ៉ាន់បានអះអាងថា ក្រោយការបោះឆ្នោតតាមបែបប្រជាធិបតេយ្យសេរី កាលពីថ្ងៃសៅរ៍ ខ្លួនបានទទួលការអបអរសាទរ ពីបណ្ដាប្រទេសជាង៥០ប្រទេស និងអង្គទូតជាមិត្ត ចំនួន១២ផ្សេងទៀត។
សូមបញ្ជាក់ថា នៅព្រឹកថ្ងៃអាទិត្យក្រោយចេញលទ្ធផលបោះឆ្នោតនៅតៃវ៉ាន់ អ្នកនាំពាក្យម្នាក់នៃក្រសួងការបរទេសចិន បានសរសេរសារលើបណ្ដាញសង្គម X ថា “ទោះលទ្ធផលឆ្នោតបែបណា គឺវាមិនបានធ្វើឲ្យប្រែប្រួលដល់ការប្តេជ្ញាចិត្តរបស់ចិន ក្នុងការច្បាមយកតៃវ៉ាន់មកនៅក្នុង រង្វង់គ្រួសារចិនវិញឡើយ”។ អ្នកនាំពាក្យចិនរូបនេះបន្តថា “ចិននឹងប្រើគ្រប់មធ្យោបាយ ដើម្បីប្រឆាំង បង្ក្រាបរាល់សកម្មភាពទាំងឡាយណា ដែលប៉ុនប៉ងប្រកាសឯករាជ្យតៃវ៉ាន់ ព្រមទាំងបង្ក្រាបរាល់ការជ្រៀតជ្រែកលូកដៃពីបរទេស”។
គួរបញ្ជាក់ដែរថា សហរដ្ឋអាមេរិកបានបញ្ជូនគណៈប្រតិភូមិនផ្លូវការមួយ ធ្វើដំណើរទៅតៃវ៉ាន់ នៅថ្ងៃអាទិត្យទៅ១៤មករា។ តាមការគ្រោងទុក គណៈប្រតិភូនេះ នឹងចូលទៅជួបថ្នាក់ដឹកនាំតៃវ៉ាន់ នៅថ្ងៃចន្ទ ដើម្បីសំដែងការអបអរសាទរ ចំពោះការបោះឆ្នោត។ លោកអង់តូនី ប្លីងកិន រដ្ឋមន្ត្រីការបរទេសអាមេរិក បានផ្ញើសារអបអរសាទរលោក William Lai និងបានកោតសរសើរ ចំពោះរបបប្រជាធិបតេយ្យដ៏រឹងមាំរបស់តៃវ៉ាន់។ តែទន្ទឹមគ្នានេះ លោកប្រមុខការទូតអាមេរិក បានគូសបញ្ជាក់ថា សហរដ្ឋអាមេរិកមិនគាំទ្រដាច់ខាត នូវការប្រកាសឯករាជ្យជាផ្លូវការរបស់តៃវ៉ាន់។
គួរកត់សំគាល់ដែរថា លោក Lai Ching-Te ដែលគេនិយមហៅថា William Lai ថ្វីបើមានទំនោររឹងរូសដាក់ចិន មិនខុសពីលោកស្រី សៃ អ៊ីងវេនមែន តែលោកហាក់បានបន្ទន់ពាក្យសំដីខ្លះ នៅក្នុងអំឡុងពេលឃោសនាបោះឆ្នោត។ ក្នុងន័យមួយមិនចង់ប្រឈមមុខដាក់ចិនខ្លាំង លោក William Lai បានលើកឡើងថា ការប្រកាសឯករាជ្យគឺវាមិនជាចាំបាច់នោះទេ ព្រោះថាធាតុពិតជាក់ស្តែង តៃវ៉ាន់រាល់ថ្ងៃនេះមានឯករាជ្យទៅហើយ ជាមួយនឹងប្រព័ន្ធនយោបាយ រដ្ឋាភិបាល និងមានការបោះឆ្នោតឯករាជ្យ។
សូមបញ្ជាក់ថា នេះជាអាណត្តីទី៣ជាប់គ្នាហើយ ដែលគណបក្សប្រជាធិបតេយ្យចម្រើននិយមតៃវ៉ាន់ ឈ្នះឆ្នោត។ ទោះយ៉ាងណាក៏ដោយ លោក Bonnie Glaser អ្នកជំនាញចិននៅ German Marshall Fund នៅវ៉ាស៊ីនតោន បានលើកឡើងថា ជ័យជំនះជាលើកទី៣របស់បក្សឯករាជ្យនិយមតៃវ៉ាន់នេះ នឹងមិនធ្វើឲ្យប្រែប្រួលក្នុងរយៈពេលខ្លី ដល់យុទ្ធសាស្ត្របង្រួបបង្រួមរបស់ចិននោះទេ។ ចំណែកលោក Alexander Huang អ្នកជំនាញកងទ័ពនៅសកលវិទ្យាល័យ Tamkang ក្រុងតៃប៉ិ បានលើកឡើងថា ចិននឹងមិនប្រតិកម្មទៅនឹងលទ្ធផលឆ្នោតនេះ តាមរយៈការប្រើកម្លាំងយោធា កំញើញភ្លាមៗទេ។ តែចិនអាចនឹងប្រើវិធីផ្សេងទៀត ដើម្បីបន្តសំឡុត និងដាក់សំពាធមកលើតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ