អនាគតប្រធានាធិបតីថ្មីតៃវ៉ាន់ អរគុណសហរដ្ឋអាមេរិក ចំពោះ “ការគាំទ្រដ៏រឹងមាំ”
លោកឡៃ ឈីងទឿ អនាគតប្រធានាធិបតីថ្មីតៃវ៉ាន់ ដែលទើបតែបានឈ្នះឆ្នោតកាលពីថ្ងៃសៅរ៍កន្លងទៅ បានទទួលជួបគណៈប្រតិភូមិនផ្លូវការមួយក្រុម របស់សហរដ្ឋអាមេរិក នៅឯទីក្រុងតៃវ៉ាន់ នៅព្រឹកថ្ងៃចន្ទនេះ។ ក្នុងជំនួបនេះ លោក អនាគតប្រធានាធិបតីថ្មីតៃវ៉ាន់ បានថ្លែងអំណរគុណដល់សហរដ្ឋអាមេរិក ចំពោះការគាំទ្រដ៏រឹងមាំ មកលើរបបប្រជាធិបតេយ្យតៃវ៉ាន់។
ចុះផ្សាយនៅថ្ងៃ៖
ស្តាប់ - ០៣:១៩
ដើម្បីអបអរសាទរលទ្ធផលបោះឆ្នោត តាមបែបសេរីប្រជាធិបតេយ្យនៅតៃវ៉ាន់ គណៈប្រតិភូមិនផ្លូវការមួយរបស់សហរដ្ឋអាមេរិក បានធ្វើមកដល់ទីក្រុងតៃប៉ិ។ គណៈប្រតិភូមិនផ្លូវការនេះ ដឹកនាំ ដោយលោក Stephen Hadley អតីតទីប្រឹក្សាសន្តិសុខជាតិអាមេរិក លោក James Steinberg អតីអនុរដ្ឋមន្ត្រីការបរទេស និងលោកស្រី Laura Rosenberger ប្រធានវិទ្យាស្ថានអាមេរិកប្រចាំនៅតៃវ៉ាន់។
នៅទីក្រុងតៃប៉ិ លោក Stephen Hadley បានថ្លែងប្រាប់អ្នកកាសែតថា វត្តមានរបស់គណៈប្រតិភូលោកនៅពេលនេះ គឺដើម្បីអបអរសាទរដល់ប្រជាជនតៃវ៉ាន់ ចំពោះការបោះឆ្នោតសភា និងបោះឆ្នោតប្រធានាធិបតី កាលពីថ្ងៃសៅរ៍ទី១៣មករា។ លោកបន្តថា របបប្រជាធិបតេយ្យសេរីដ៏រឹងមាំរបស់តៃវ៉ាន់ គឺជាគម្រូដ៏ល្អ សម្រាប់ពិភពលោកទាំងមូល។
ក្នុងពេលជួបជាមួយគណៈប្រតិភូ លោក ឡៃ ឈីងទឿ (Lai Ching-Te) អនាគតប្រធានាធិបតីថ្មីតៃវ៉ាន់ បានថ្លែងអរគុណដល់សហរដ្ឋអាមេរិក ចំពោះការគាំទ្រមកលើលទ្ធិប្រជាធិបតេយ្យតៃវ៉ាន់។ ការគាំទ្រនេះ គឺវាបញ្ជាក់អំពីចំណងសហប្រតិបតិ្តការ ដ៏ស្និទ្ធ និងរឹងមាំ រវាងតៃវ៉ាន់ និងសហរដ្ឋអាមេរិក។ លោក ឡៃ ឈីងទឿ បានបន្តថា ទោះបីចិន បន្តគំរាម បំភ័យមកលើតៃវ៉ាន់ តាមរយៈការប្រើកម្លាំងទ័ព ឬវិធីផ្សេងៗទៀតក៏ដោយ តែតៃវ៉ាន់នៅតែអង់អាច ហ៊ានប្រឈមមុខ ដោយភាពស្ងប់ស្ងាត់ និងមិនតក់ស្លុតជាដាច់ខាត។ លោកបន្ថែមថា តៃវ៉ាន់នឹងបន្តធ្វើការជាមួយប្រទេសដៃគូ ដែលមានគោលគំនិតយល់ឃើញដូចតៃវ៉ាន់ ក្នុងនោះគឺមានសហរដ្ឋអាមេរិកដែរ ដើម្បីធ្វើយ៉ាងណា ធានាការពារឲ្យបាននូវសន្តិភាព និងស្ថិរភាពនៃតំបន់ច្រកសមុទ្រតៃវ៉ាន់។
បន្ទាប់ពីឃើញអាមេរិកបញ្ជូនគណៈប្រតិភូទៅជួបអនាគតប្រធានាធិបតីថ្មីតៃវ៉ាន់បែបនេះ លោកស្រី ម៉ៅ នីង អ្នកនាំពាក្យក្រសួងការបរទេសចិនបានថ្លែងថា ចិនប្រឆាំងដាច់ខាត ចំពោះទំនាក់ទំនងផ្លូវការណាមួយ រវាងតៃវ៉ាន់ និងសហរដ្ឋអាមេរិក។ ចិនប្រឆាំងដាច់ខាត ចំពោះការលូកដៃចូលជ្រៀតជ្រែករបស់អាមេរិក មកក្នុងកិច្ចការរវាងចិននិងតៃវ៉ាន់ ទោះក្នុងហេតុផលឬលេសអ្វីក៏ដោយ។
គួរកត់សំគាល់ថា នៅថ្ងៃចន្ទទី១៥មករានេះ ប្រទេសណូរូ ដែលជាកូនកោះតូចមួយនៅក្នុងមហាសមុទ្រប៉ាស៊ីហ្វិក បានប្រកាសផ្តាច់ទំនាក់ទំនងទាំងអស់ជាមួយតៃវ៉ាន់។ លិខិតប្រកាសនៃរដ្ឋាភិបាលកោះណូរូ អះអាងថា គេទទួលស្គាល់តែសាធារណរដ្ឋប្រជាមានិតចិនតែមួយប៉ុណ្ណោះ ហើយតៃវ៉ាន់គឺជាដែនដីមួយរបស់ចិន ដែលមិនអាចបំបែកបាន។
សូមបញ្ជាក់ថា ក្រោយលទ្ធផលជ័យជំនះរបស់គណបក្សប្រជាធិបតេយ្យចម្រើននិយម នៅតៃវ៉ាន់ លោកវ៉ាង យី ប្រមុខជាន់ខ្ពស់បំផុតនៃវិស័យការបរទេសចិន បានថ្លែងគំរាមថា នរណាក៏ដោយនៅតៃវ៉ាន់ ឲ្យតែហ៊ានធ្វើសកម្មភាពឈានទៅប្រកាសឯករាជ្យ ផ្តាច់តៃវ៉ាន់ចេញពីទឹកដីចិន គឺចិននឹងដាក់ទោសពិន័យឲ្យចាស់ដៃបំផុត។
លោក ឡៃ ឈីងទឿ ដែលគេនិយមហៅថា William Lai មានអាយុ៦៤ឆ្នាំ នឹងចូលកាន់មុខតំណែងជាប្រធានាធិបតីតៃវ៉ាន់ នៅថ្ងៃទី២០ឧសភា។ ក្នុងសុន្ទរកថាយប់ថ្ងៃប្រកាសលទ្ធផលឆ្នោត លោកបានលើកឡើងថា តៃវ៉ាន់មិនចាំបាច់ប្រកាសឯករាជ្យជាផ្លូវការនោះទេ ព្រោះថាធាតុពិតជាក់ស្តែង រាល់ថ្ងៃនេះ តៃវ៉ាន់មានឯករាជ្យទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ