ក្រុមប្រឹក្សាធម្មនុញ្ញបារាំងអនុញ្ញាតឲ្យអាជ្ញាធរចូលប្រើទិន្នន័យនៅបណ្តាញសង្គម ដើម្បីតាមចាប់អ្នកគេចពន្ធ
ក្រុមប្រឹក្សាធម្មនុញ្ញបារាំង កាលពីយប់ថ្ងៃសុក្រទី ២៧ ធ្នូ បានសម្រេចបើកភ្លើងខៀវ ឲ្យរដ្ឋាភិបាលមានសិទ្ធិចូលមើលទិន្នន័យរបស់អ្នកប្រើប្រាស់បណ្តាញសង្គម ក្នុងក្របខ័ណ្ឌ ប្រយុទ្ធប្រឆាំងនឹងការលួចគេច មិនបង់ពន្ធរដ្ឋ។ នៅក្នុងសេចក្តីប្រកាសចេញផ្សាយ កាលពីថ្ងៃ សុក្រ ក្រុមប្រឹក្សាធម្មនុញ្ញបារាំងវាយតម្លៃថា វិធានការរបស់រដ្ឋាភិបាល ដូចជា ប្រយុទ្ធប្រឆាំងនឹងការលួចបន្លំពន្ធ TVA ហើយនិងការចាប់តម្រូវឲ្យប្រធានក្រុមហ៊ុនធំៗ ត្រូវតែបង់ពន្ធ នៅប្រទេសបារាំង គឺសុទ្ធសឹងជាវិធានការដែលស្របច្បាប់ រដ្ឋធម្មញ្ញបារាំង។
ចុះផ្សាយនៅថ្ងៃ៖
ស្តាប់ - ០២:៥៨
ក្រុមប្រឹក្សាធម្មនុញ្ញបារាំង បានផ្តល់សុពលភាពសឹងទាំងស្រុងលើច្បាប់ថវិកាជាតិ សម្រាប់ឆ្នាំ ២០២០ ដែលនៅក្នុងនោះ មានផងដែរ មាត្រា ទី ៥៧ ដែលជាមាត្រាដ៏ចម្រូងចម្រាស និយាយពីវិធានការរបស់រដ្ឋាភិបាលក្នុងការតាមប្រមាញ់ ចាប់ អ្នកគេចពន្ធ ដោយប្រើ ទិន្នន័យអ៊ីនធ័រនែត និងព័ត៌មាន នៅលើបណ្តាញសង្គម។
ទៅតាម មាត្រា ទី ៥៧ រដ្ឋាភិបាលនឹងអនុវត្តគម្រោង សាកល្បង ៣ឆ្នាំ ដែលក្នុងនោះ អាជ្ញាធរពន្ធដារបារាំង អាចចូលទៅប្រមូលទិន្នន័យ ផ្ទាល់ខ្លួន ដែលអ្នកប្រើប្រាស់អ៊ីនធ័រនែត បានចុះផ្សាយជាផ្លូវការ នៅលើបណ្តាញសង្គម ដូចជា ហ្វេសប៊ុក អាំងស្តាក្រាម ឬ វិបសៃតិ៍លក់ទំនិញបារាំង ដូចជា leboncoin ជាដើម។
រដ្ឋមន្រ្តីថវិកាបារាំង លោក Gérald Darmanin ដែលបាននិយាយស្វាគមការសម្រេចចិត្តរបស់ក្រុមប្រឹក្សាធម្មនុញ្ញបារាំង ធ្លាប់បានវាយតម្លៃហើយថា បទពិសោធន៍សាកល្បងរយៈពេល៣ឆ្នាំ នឹងជួយឲ្យអាជ្ញាធរពន្ធដារ អាចប្រើបច្ចេកវិទ្យា បញ្ញាសប្បនិម្មិត ដើម្បី តាមដាន ឲ្យកាន់តែមានប្រសិទ្ធិភាព ក្នុងការស្វែងរកអ្នកដែលបន្លំ គេច មិនបង់ពន្ធរដ្ឋបារាំង។ ឧទាហរណ៍ ទិន្នន័យ ឬរូបភាពទាំងឡាយណា ដែលគេបង្ហោះផ្សាយនៅលើបណ្តាញសង្គម ហ្វេសប៊ុក ឬ អាំងស្តាក្រាម នឹងអាចឲ្យគេដឹងពីកម្រិតជីវភាព និងទីកន្លែងរស់នៅរបស់អ្នកប្រើប្រាស់បណ្តាញសង្គម។ ព័ត៌មានខាងលើនេះ នឹងអាចឲ្យអាជ្ញាធរពន្ធដារបារាំង ដឹងថា តើគេបានប្រកាសពន្ធលើប្រាក់ចំណូលត្រឹមត្រូវ ដែរឬទេ ឬក៏ថា គេបានប្រកាសថា មានផ្ទះ នៅបរទេស ដើម្បីគេចមិនបង់ពន្ធបារាំង ប៉ុន្តែ រូបថត បានស្តែងថា គេកំពុងរស់នៅទឹកដីបារាំង។
ដោយមានភ្លើងខៀវ ពីក្រុមប្រឹក្សាធម្មនុញ្ញ អាជ្ញាធរពន្ធដារបារាំងនឹងមានសិទ្ធិអំណាច ស្របច្បាប់ ចូលទៅប្រមូលទិន្នន័យ ដោយស្វ័យប្រវត្តិ ដោយប្រើបច្ចេកវិទ្យា បញ្ញាសប្បនិម្មិត គឺមិនមែនដោយដៃ ក្រដាសឯកសារដូចមុនទៀតទេ។
នៅក្នុងសេចក្តីប្រកាស កាលពីថ្ងៃសុក្រ ក្រុមប្រឹក្សាធម្មនុញ្ញបារាំងវាយតម្លៃថា វិធានការរបស់រដ្ឋាភិបាលស្របរដ្ឋធមនុញ្ញ និងអាចធានាគ្រប់គ្រាន់ មិនឲ្យមានការប៉ះពាល់ដល់ជីវិតឯកជន។ យ៉ាងណាក៏ដោយ ក្រុមប្រឹក្សាធម្មនុញ្ញបារាំងបញ្ជាក់ពីការរក្សាសិទ្ធិត្រលប់មកពិចារណាឡើងវិញ នៅ៣ឆ្នាំក្រោយ ការអនុវត្តគម្រោងការសាកល្បងរបស់រដ្ឋាភិបាល ដើម្បី ឲ្យច្បាស់ថា វិធានការរបស់រដ្ឋាភិបាល នឹងមិនប៉ះពាល់ដល់ជីវិត ឯកជនរបស់ប្រើប្រាស់អ៊ីនធ័រនែត។ នៅក្នុងការសម្រេចកាលពីថ្ងៃសុក្រ ក្រុមប្រឹក្សាធម្មនុញ្ញបារាំងបញ្ជាក់ផងដែរ ហាមមិនឲ្យអាជ្ញាធរពន្ធដារបារាំង ចូលទៅយកទិន្នន័យរបស់អ្នកប្រើប្រាស់បណ្តាញសង្គម ដែលបានរងការចោទប្រកាន់រួចហើយ ក្នុងរឿងបង់ពន្ធរដ្ឋមិនត្រឹមត្រូវ។
គណៈកម្មការជាតិ ស្តីពីព័ត៌មានវិទ្យា និងសិទ្ធិសេរីភាព បារាំង CNIL ធ្លាប់បានរិះគន់វិធានការរបស់រដ្ឋាភិបាល ដែលគេចាត់ទុកថា ជាការ រំលោភសិទ្ធិ ជីវិតឯកជន។ ដោយសារតែមានការតវ៉ាខ្លាំងពីខាង សកម្មជនការពារសិទ្ធិមនុស្ស និងសមាជិកសភា បារាំង រដ្ឋាភិបាលបានធ្វើកំណែទម្រង់ជាច្រើនដង មាត្រា ទី ៥៧ ដោយបានកំណត់ឲ្យអាជ្ញាធរពន្ធដារតាមដានតែករណី រំលោភច្បាប់ធ្ងន់ធ្ងរដូចជា ការក្លែងបន្លំ មិនប្រកាសត្រឹមត្រូវ ពីផ្ទះសម្បែង នៅបារាំង ការជួញដូរខុសច្បាប់ ហើយនិងសកម្មភាព លួចបន្លំពន្ធ ក្នុងទ្រង់ទ្រាយធំ នៅក្នុងអាជីវកម្មតាមអ៊ីនធ័រនែត។
សូមបញ្ជាក់ថា នៅប្រទេសបារាំង ការក្លែងបន្លំ ឯកសារ កុហកបិទបាំង ស្តីពី ប្រាក់ចំណូល ទ្រព្យសម្បត្តិ ឬប្រកាសថា ផ្ទះសម្បែង នៅបរទេស ដើម្បី គេច មិនបង់ពន្ធជូនរដ្ឋបារាំង ត្រូវគេចាត់ទុក ជាបទឧក្រិដ្ឋ ដែលគេត្រូវប្រឈមនឹងទោសជាប់ពន្ធនាគារ ៥ឆ្នាំ ហើយនិងប្រាក់ពិន័យ ចាប់ពី ៣សែន ឡើងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ