បារាំងពង្រាយ ប្រព័ន្ធរ៉ាដា នៅឆ្នេរភាគខាងកើតអារ៉ាប៊ី សាអូឌីត ដែលបែរទៅរកឈូងសមុទ្រពែរ្ស
បារាំងបានដាក់ពង្រាយ ប្រព័ន្ធរ៉ាដា នៅតាមឆ្នេរខាងកើត អារ៉ាប៊ី សាអូឌីត។ ក្រសួងការពារជាតិបារាំងបានប្រកាសដំណឹងនេះ កាលពីថ្ងៃ សុក្រ។ នៅមួយថ្ងៃមុន នៅក្នុងឱកាសថ្លែងជូនពរដល់កងទ័ពបារាំង នៅ ភាពខាងត្បូងទីក្រុងប៉ារីស ប្រធានាធិបតីបារាំង លោកអេម៉ានុយអែល ម៉ាក្រុង បានលើកនិយាយពីវិធានការរបស់បារាំង ដើម្បី ធានាការពាររាជាណាចក្រប្រេង នៅក្រោយទីតាំងចម្រាញ់ប្រេងរបស់អារ៉ាប៊ី សាអូឌីតរងការវាយប្រហារ កាលពីខែ កញ្ញាកន្លងទៅ។
ចុះផ្សាយនៅថ្ងៃ៖
តាមទីភ្នាក់ងារព័ត៌មានអង់គ្លេស Reuters ដែលបានដកស្រង់ប្រភពពីមន្រ្តីក្រសួងការពារជាតិបារាំង រដ្ឋាភិបាលបារាំងបានសម្រេចដាក់ពង្រាយប្រព័ន្ធរ៉ាដា នៅតាមឆ្នេរខាងកើត ប្រទេសអារ៉ាប៊ី សាអូឌីត ដែលបែរទៅរកប្រទេសអ៊ីរ៉ង់ នៅក្នុងគោលដៅ ពង្រឹងប្រព័ន្ធខែលមីស៊ីល របស់ប្រទេសសេដ្ឋីប្រេង មួយនេះ។
នៅក្រោយរោងចក្រចម្រាញ់ប្រេងពីរកន្លែងរបស់អារ៉ាប៊ី សាអូឌីតរងបំផ្លាញ ដោយសារគ្រាប់មីស៊ីល ដែលបើតាម បារាំង អង់គ្លេស អាល្លឺម៉ង់ និងអាមេរិក គឺជាស្នាដៃរបស់អ៊ីរ៉ង់ រដ្ឋាភិបាលបារាំងបានសន្យា ផ្តល់ជំនួយ ដើម្បីធានាការពារសន្តិសុខឲ្យសម្ព័ន្ធមិត្តអារ៉ាប៊ី សាអូឌីត។ រដ្ឋាភិបាលអ៊ីរ៉ង់បានទាត់ចោល ការចោទប្រកាន់ របស់ប្រទេសលោកខាងលិច និងទម្លាក់ការទទួលខុសត្រូវលើពួកឧទ្ទាមយេម៉ែន។
នៅក្នុងដំណើរទស្សនកិច្ចទៅប្រទេសបារ៉ែន កាលពីខែវិច្ឆិកាកន្លងទៅ រដ្ឋមន្រ្តីការពារជាតិបារាំង លោកស្រី Florence Parly ធ្លាប់បានប្រកាសពីការដាក់ពង្រាយប្រព័ន្ធទាញសញ្ញាអាសន្ន នៅក្នុងឈូងសមុទ្រពែរ្ស ដែលនៅក្នុងនោះមានផងដែរ រ៉ាដា ដ៏ទំនើបចុងក្រោយ ដែលអាចឲ្យគេដឹងជាមុនពីការវាយប្រហារ ណាមួយ ដោយគ្រាប់មីស៊ីល។
នៅថ្ងៃព្រហស្បតិ៍ នៅក្នុងឱកាសថ្លែងជូនពរឆ្នាំថ្មីដល់កងទ័ពបារាំង ប្រធានាធិបតីបារាំង លោកអេម៉ានុយអែល ម៉ាក្រុងបានបញ្ជាក់ពីវិធានការរបស់បារាំង ដែលបានដាក់ពង្រាយប្រព័ន្ធរ៉ាដា ដែលជាផ្នែកមួយ នៃប្រតិបត្តិការពិសេស នៅឈូងសមុទ្រពែរ្ស ដែលមានឈ្មោះថា Task Force Jaguar។
“នៅឧបទ្វីបអារ៉ាប់ និងនៅឈូងសមុទ្រអារ៉ាប់ ពែរ្ស ជាទីដែលមានភាពតានតឹងកាន់តែខ្លាំង បារាំងបានពង្រាយក្នុងពេលដ៏ខ្លី កងកម្លាំង ខ្លារខិន ដែលមានបេសកកម្មបញ្ជាក់ធានាដល់រាជាណាចក្រអារ៉ាប៊ី សាអូឌីត” នេះជាការបញ្ជាក់របស់ប្រធានាធិបតីបារាំង កាលពីថ្ងៃព្រហស្បតិ៍ នៅក្រោយពេលលោកប្រកាសបញ្ជូននាវាផ្ទុកយន្តហោះចម្បាំង Charles De Gaulle ទៅប្រយុទ្ធប្រឆាំងក្រុមជីហាតអង្គការរដ្ឋអ៊ីស្លាម នៅតំបន់ដើមបូព៌ា។
អ្នកជំនាញមួយចំនួនវាយតម្លៃថា ដោយចេញមុខធានាជួយពង្រឹងប្រព័ន្ធការពារដែនអាកាសសាអូឌីត ពីការវាយប្រហារណាមួយ របស់មីស៊ីលអ៊ីរ៉ង់ រដ្ឋាភិបាលបារាំងចង់បញ្ចុះបញ្ចូល រដ្ឋាភិបាលអារ៉ាប៊ី សាអូឌីត ត្រលប់មកគោរពការសន្យាក្នុងការផ្តល់ហិរញ្ញវត្ថុសម្រាប់បេសកកម្មប្រយុទ្ធប្រឆាំងនឹងក្រុមភេរវនិយម នៅតំបន់អាហ្វ្រិក សាអែល Sahel ដែលដឹកនាំដោយប្រទេសបារាំង។
នៅក្នុងពិធីសូត្រធម៌ កាលពីថ្ងៃសុក្រ ប្រមុខដឹកនាំកំពូលរបស់សាសនាអ៊ីរ៉ង់ បានចេញមុខការពារឆ្មាំបដិវត្តន៍ ដែលកំពុងរងការរិះគន់ ទាំងក្នុងស្រុក និងបរទេស ក្នុងសោកនាដកម្ម បាញ់ទម្លាក់យន្តហោះអ៊ុយក្រែន។ សម្រាប់ អាយ៉ាតូឡា អាលី ខាមេណី ឆ្មាំបដិវត្តន៍អ៊ីរ៉ង់មានសមត្ថភាព ប្រយុទ្ធ ហួសពីទឹកដីអ៊ីរ៉ង់ នៅក្រោយ អាមេរិក បាញ់សម្លាប់ មេទ័ពអ៊ីរ៉ង់ សូឡីម៉ានី នៅប្រទេសអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ