អឺរ៉ុប ចិន និងរុស្ស៊ីកំពុងស្វែងរកភាពចុះសម្រុងជាមួយអ៊ីរ៉ង់ស្តីពីកិច្ចព្រមព្រៀងនុយក្លេអ៊ែរអ៊ីរ៉ង់
នៅថ្ងៃពុធ ទី២៦ កុម្ភៈក្នុងទីក្រុងវីយែន ប្រទេសអូទ្រីស សហភាពអឺរ៉ុប ប្រទេសចិន និងរុស្ស៊ីបានបន្តរួមប្រជុំគ្នាដើម្បីស្វែងរកកុងសង់ស៊ុសរួមមួយជាមួយអ៊ីរ៉ង់ស្តីពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥។ កិច្ចព្រមព្រៀងមួយនេះត្រូវបានអាមេរិកក្នុងជំនាន់លោកដូណាល់ ត្រាំដកខ្លួនចេញក្នុងឆ្នាំ ២០១៨ និងបានដាក់ទណ្ឌកម្មសេដ្ឋកិច្ចលើអ៊ីរ៉ង់។ តាំងពីពេលនោះមក អ៊ីរ៉ង់ក៏បានផ្តើមមិនគោរពលើកិច្ចសន្យាមួយចំនួនដែលមានចែងនៅក្នុងកិច្ចព្រមព្រៀងនោះ។ គោលដៅនៃកិច្ចប្រជុំរវាងក្រុមប្រទេសហត្ថលេខីនៅសេសសល់ជាមួយអ៊ីរ៉ង់ពេលនេះ គឺព្យាយាមទាញអ៊ីរ៉ង់ឲ្យមកគោរពកិច្ចព្រមព្រៀងពេញលេញឡើងវិញ និងស្រោចស្រង់កិច្ចព្រមព្រៀងដែលកំពុងទទួលការគំរាមកំហែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
ក្រៅពីភាគីអ៊ីរ៉ង់ កិច្ចប្រជុំបានចូលរួមដោយអ្នកតំណាងមកពីប្រទេសចិន រុស្ស៊ី អង់គ្លេស បារាំង និងអាល្លឺម៉ង់ដែលសុទ្ធសឹងជាប្រទេសហត្ថលេខីលើកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ និងដែលមិនបានដកខ្លួនចេញពីកិច្ចព្រមព្រៀងដូចអាមេរិកទេ។ ជាថ្មីម្តងទៀត អ្នកតំណាងគ្រប់រូបបានបញ្ជាក់ពីសារៈសំខាន់ក្នុងការរក្សាទុកកិច្ចព្រមព្រៀងដែលមានស្រាប់ និងបានរម្លឹកថា កិច្ចព្រមព្រៀងឆ្នាំ ២០១៥ មួយនេះជាគន្លឹះនៃនិម្មាបនកម្មសកលស្តីពីការមិនសាយភាយនុយក្លេអ៊ែរ។ ទន្ទឹមគ្នានេះ អ្នកតំណាងគ្រប់រូបក៏បានទទួលស្គាល់ដែរថា ការដែលរដ្ឋបាលអាមេរិកបានដាក់ទណ្ឌកម្មសេដ្ឋកិច្ចជាថ្មីលើអ៊ីរ៉ង់មិនបានអនុញ្ញាតឲ្យអ៊ីរ៉ង់ទាញបានផលប្រយោជន៍សេដ្ឋកិច្ចពេញលេញពីការលើកទណ្ឌកម្មអន្តរជាតិទេ។
នៅក្នុងន័យនេះ អ្នកតំណាងអ៊ីរ៉ង់ដែលចូលរួមដោយអនុរដ្ឋមន្រ្តីការបរទេសលោកអាបាស់ អារ៉ាឈីបានបញ្ជាក់ថា អ៊ីរ៉ង់បន្តទុកទ្វារចំហចំពោះគ្រប់គំនិតផ្តួចផ្តើមទាំងអស់ដែលអាចធានាអ៊ីរ៉ង់ឲ្យទទួលបានប្រយោជន៍ពីកិច្ចព្រមព្រៀងឆ្នាំ ២០១៥។ តាមលោកអាបាស់ អារ៉ាឈី ប្រសិនបើភាគីផ្សេងគោរពត្រឹមត្រូវលើការសន្យារបស់ខ្លួន អ៊ីរ៉ង់ក៏ត្រៀមខ្លួនត្រឡប់ទៅគោរពឡើងវិញលើកិច្ចសន្យាមួយចំនួនដែលខ្លួនបានរំលោភកន្លងមក។ គួររម្លឹកថា តាំងពីអាមេរិកដកខ្លួនចេញពីកិច្ចព្រមព្រៀង និងដាក់ទណ្ឌកម្មសេដ្ឋកិច្ចជាថ្មីលើអ៊ីរ៉ង់ ក្រុងតេហេរ៉ង់បានស្តីបន្ទោសភាគីហត្ថលេខីផ្សេង ពិសេសអឺរ៉ុបពីបទឈរក្រពាត់ដៃមើលដោយមិនបានជួយខ្លួន។
បន្ទាប់មកតាំងពីខែឧសភា ឆ្នាំ ២០១៩ អ៊ីរ៉ង់ក៏សម្រេចចិត្តមិនគោរពតាមកិច្ចសន្យាមួយចំនួននៅក្នុងកិច្ចព្រមព្រៀង ដូចយ៉ាងធ្វើការចម្រាញ់អ៊ុយរ៉ាញ៉ូមក្នុងអត្រាលើសពី ៣,៦៧% និងស្តុកអ៊ុយរ៉ាញ៉ូមចម្រាញ់រួចលើសពី ៣០០គីឡូក្រាម។ លោកវ៉ាង ឈីង មន្រ្តីការទូតចិនប្រចាំអង្គការអន្តរជាតិក្នុងទីក្រុងវីយែន ប្រទេសអូទ្រីសបានបញ្ជាក់ថា អ្នកតំណាងគ្រប់រូបក្នុងកិច្ចប្រជុំបានព្យាយាមបង្កើតយន្តការមួយដោយផ្អែកលើផលប្រយោជន៍ទៅវិញ ទៅមក មានន័យថា អ៊ីរ៉ង់អាចទាញបានប្រយោជន៍ពេញលេញពីកិច្ចព្រមព្រៀង ហើយភាគីផ្សេងត្រូវចាប់ផ្តើមគោរពកិច្ចព្រមព្រៀងឲ្យបានត្រឹមត្រូវ។ គ្រប់គ្នាសង្ឃឹមថា កិច្ចប្រជុំពេលនេះនឹងហុចលទ្ធផលមួយដែលអាចទទួលយកបានទាំងអស់គ្នាដើម្បីស្រោចស្រង់កិច្ចព្រមព្រៀងដែលកំពុងទទួលរងការគំរាមកំហែង។
គួររម្លឹកថាក្នុងខែមករា ឆ្នាំ ២០១៩ សហភាពអឺរ៉ុបបានបង្កើតយន្តការមួយដើម្បីអាចបន្តធ្វើជំនួញជាមួយអ៊ីរ៉ង់ដោយពង្វាងទណ្ឌកម្មអាមេរិក មានន័យថា អ៊ីរ៉ង់លក់ប្រេងដូរយកទំនិញដោយមិនបាច់ទូទាត់ជាមួយប្រាក់ដុល្លារអាមេរិក។ តែរហូតមកដល់ពេលនេះ យន្តការមួយនេះនៅមិនបានដំណើរការនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ