អង្គការសុខភាពពិភពលោក ៖ អឺរ៉ុបក្លាយជាតំបន់មានការរាតត្បាតកូវីដ១៩ខ្លាំងជាងគេ
កូវីដ១៩ បន្តធ្វើការរាតត្បាតនៅទូទាំងពិភពលោក ក្នុងប្រទេសចំនួន១២៤ និងបានចម្លងលើមនុស្សសរុបជាង១៤ម៉ឺននាក់ និងសម្លាប់មនុស្សយ៉ាងហោច ៥៣០០នាក់។ នេះបើតាមតុល្យការផ្លូវការចុងក្រោយចុះថ្ងៃទី ១៣មីនា២០២០។ ប្រឈមនឹងស្ថានភាពបែបនេះ សហរដ្ឋអាមេរិកបានប្រកាសដាក់ប្រទេសក្នុងភាពអាសន្ន។ ក្នុងថ្ងៃសុក្រដដែល អង្គការសុខភាពពិភពលោកបានប្រកាស ថាអឺរ៉ុប បានក្លាយជាតំបន់ដែលមានករណីរាតត្បាតកូវីដ១៩ខ្លាំងគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ជាមួយនឹងសេចក្តីប្រកាសរបស់ប្រធានាធិបតីដាក់ប្រទេសក្នុងភាពអាសន្ន សហរដ្ឋអាមេរិក អាចទម្លាយថវិកា ជិត៥០ពាន់លានដុល្លារ សម្រាប់ទប់ទល់នឹងការរាតត្បាតរបស់កូវីដ១៩។ សភាអាមេរិកបានសម្តែងសាមគ្គីជាតិ អនុម័តភ្លាមផែនការសង្គ្រោះសេដ្ឋកិច្ចពីវិបត្តិកូវីដ១៩ស្នើដោយរបស់រដ្ឋាភិបាល។ បើតាមលោកដូណាល់ត្រាំ ការបិទព្រំដែន បានជួយសង្គ្រោះជីវិតមនុស្សច្រើនណាស់ ហើយការដាក់សហរដ្ឋអាមេរិកក្នុងភាពអាសន្ន ជាការបំពេញបន្ថែមលើវិធានការដែលអាមេរិកមានស្រាប់។
សូមបញ្ជាក់ថាកូវីត១៩កំពុងបន្តរាតត្បាតយ៉ាងលឿន នៅក្រៅប្រទេសចិន។ ចិន ដែលជាចំណុចចាប់ផ្តើមនៃមេរោគកូរ៉ូណាថ្មីវិញ ចំនួនអ្នកឆ្លងថ្មី បានធ្លាក់ចុះគួរឱ្យកត់សម្គាល់ មកត្រឹមតែ៨នាក់ប៉ុណ្ណោះ។ ប៉ុន្តែនៅអឺរ៉ុបវិញ ចំនួនអ្នកឆ្លងនិងអ្នកស្លាប់កំពុងកើនឡើងខ្លាំងជាលំដាប់។ បើតាមអង្គការសុខភាពពិភពលោក ពេលនេះអឺរ៉ុបកំពុងក្លាយជាតំបន់ដែលកូវីដ១៩រាតត្បាតខ្លាំងជាងគេ។ ដោយមិនគិតប្រៀបជាមួយចិន ចំនួនអ្នកស្លាប់និងអ្នកឆ្លងកូរ៉ូណាវីរុសថ្មីនៅអឺរ៉ុបមានចំនួនច្រើនជាងតំបន់ផ្សេងៗនៃភពផែនដី។ នៅអ៊ីតាលី ចំនួនអ្នកឆ្លងកូរ៉ូណាថ្មី បានឡើងដល់១៧៦៦០នាក់ និងស្លាប់ ១២៦៦នាក់ (ស្លាប់ថែម២៥០នាក់ទៀត ក្នុងរយៈពេលតែ២៤ម៉ោង)។
ប្រឈមនឹងស្ថានភាពបែបនេះ អឺរ៉ុបចាប់ផ្តើមចាត់វិធានការ កាន់តែតឹងតែងឡើងៗ។ ដាណឺម៉ាក ប៉ូឡូញបានប្រកាសបិទព្រំដែនមិនឱ្យបរទេសចូល ចាប់ពីថ្ងៃសៅរ៍ទី ១៤មីនាទៅ។ ស៊ីប ស្លូវ៉ាគី ឆែក ចាប់បិទព្រំដែន មិនឱ្យបរទេស និងព្រមទាំងពលរដ្ឋខ្លួនចេញចូលទៀតចាប់ពីថ្ងៃចន្ទទី១៦មីនា។ ព្រំដែនអឺរ៉ុបក្នុងរង្វង់សហភាព នឹងត្រូវពង្រឹង ឬបិទផង នៅប៉ុន្មានថ្ងៃខាងមុខ។ នេះជាសំណើរបស់ប្រធានាធិបតីបារាំងទៅកាន់សហភាពអឺរ៉ុប។
វិធានការបិទព្រំដែនកំពុងត្រូវបានប្រទេសជាច្រើននិងជាបន្តបន្ទាប់ចាប់ផ្តើមប្រកាន់យក។ អ៊ុយក្រែននិងរុស្ស៊ីបានប្រកាសកាត់បន្ថយការហោះហើរទៅកាន់-មកអឺរ៉ុប។ សិង្ហបុរី កម្ពុជាហាមឃាត់មិនឱ្យអ្នកដំណើរបរទេសមកពី ឬឆ្លងកាត់ប្រទេសអ៊ីតាលី បារាំង អេស្ប៉ាញនិងអាល្លឺម៉ង់។ អូស្ត្រាលីនិងកាណាដា បានណែនាំឱ្យពលរដ្ឋខ្លួនលុបគម្រោងធ្វើដំណើរទៅបរទេស។ ជើងហោះហើរចេញពីអឺរ៉ុបនិងចូលអឺរ៉ុបជាមួយប្រទេសក្នុងទ្វីបអាមេរិកឡាទីនជាច្រើនត្រូវផ្អាក។ កូឡុំប៊ីបិទព្រំដែនជាមួយវេណេស៊ុយអេឡា និងមិនឱ្យបរទេសធ្វើដំណើរមកពីអឺរ៉ុបនិងអាស៊ីចូល។ ចាប់ពីថ្ងៃចន្ទទី ១៦មីនា អ្នកដំណើរចូលប្រទេសនូវែលហ្សេឡង់ទាំងអស់ត្រូវឃាត់ឱ្យនៅដាច់ពីគេ១៤ថ្ងៃ។ អាប៊ីសាអូឌីតបិទជើងហោះហើរអន្តរជាតិរយៈពេលពីសប្តាហ៍រាប់ពីថ្ងៃអាទិត្យទី ១៥មីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ