កូវីដ១៩៖ អំពើហិង្សាក្នុងគ្រួសារអាចកើនឡើង ពេលមនុស្សរាប់លាននាក់នៅអឺរ៉ុបត្រូវបង្ខាំងនៅក្នុងផ្ទះ
គិតត្រឹមថ្ងៃសៅរ៍ ទី ២៨ មីនានេះ ជំងឺកូវីដ១៩ នៅតែបន្តរាលដាលខ្លាំង និងបានចម្លងដល់មនុស្សជាង ៦០ម៉ឺននាក់ និងបានសម្លាប់មនុស្សជាង ២ម៉ឺន ៧ពាន់នាក់ នៅជុំវិញពិភពលោក។ ដើម្បីទប់ស្កាត់ការរីករាលនៃជំងឺរាតត្បាតនេះ ប្រទេសជាច្រើន ក្នុងនោះមានប្រទេសអឺរ៉ុបដែរ បានចេញវិធានការបិទការធ្វើដំណើរចេញចូល និងរាំងខ្ទប់ឲ្យប្រជាជននៅតែក្នុងផ្ទះ។ ខណៈពេលដែលមនុស្សរាប់លាននាក់នៅទ្វីបអឺរ៉ុប ត្រូវបានបង្ខាំងឲ្យនៅក្នុងផ្ទះ គេចាប់បារម្ភដែរថា អំពើហិង្សាក្នុងគ្រួសារអាចនឹងមានចំនួនកើនឡើង។
ចុះផ្សាយនៅថ្ងៃ៖
ស្តាប់ - ០២:១២
នៅអឺរ៉ុប ពីទីក្រុងប៊ែកឡាំង ទៅទីក្រុងប៉ារីស ម៉ាឌ្រីដ រ៉ូម និងប្រាទីស្លាវ៉ា សមាគមជួយជនរងគ្រោះនៃអំពើហិង្សាក្នុងគ្រួសារ បានប្រកាសក្រើនរំឭកថា អំពើហិង្សាក្នុងគ្រួសារអាចនឹងមានចំនួនកើនឡើង បន្ទាប់ពីអឺរ៉ុបក្លាយជាចំណុចកណ្តាលនៃការឆ្លងរាលដាលពីកូវីដ១៩។
“សម្រាប់មនុស្សជាច្រើន ផ្ទះរបស់ពួកគេ លែងជាកន្លែងមានសុវត្ថិភាពទៀតទេ”។ នេះ បើតាមការឲ្យដឹងពីខាងសមាគមសហព័ន្ធអាល្លឺម៉ង់នៃមជ្ឈមណ្ឌលផ្តល់ប្រឹក្សា និងជំនួយដល់ស្ត្រី (BFF)។
បន្ថែមលើនេះ BFF បានក្រើនរំឭកថា ភាពឯកោ ការលែងមានទំនាក់ទំនងក្នុងសង្គម កំពុងធ្វើឲ្យភាពតានតឹងភាពតប់ប្រមល់ កើនឡើងខ្លាំង និងបង្កើនហានិភ័យនៃអំពើហិង្សាក្នុងគ្រួសារ ហើយនិងអំពើហិង្សាផ្លូវភេទទៅលើស្ត្រី និងកុមារ។
ភាពតានតឹងផ្លូវអារម្មណ៍ខ្លាំងបំផុតមួយ ដែលគេយល់ថា មានឥទ្ធិពលបង្កឲ្យមានជម្លោះក្នុងគ្រួសារ គឺការភ័យព្រួយពីការបាត់បង់ការងារ និងការខ្វះខាតផ្នែកហិរញ្ញវត្ថុ។
លោករ៉េននឺ រ៉េតធីងជឺ (Rainer Rettinger) ប្រធានដឹកនាំសមាគមការពារកុមារអាល្លឺម៉ង់ បានទទួលស្គាល់ថា ការសម្រេចបិទសាលារៀន ក្លឹបកីឡា និងមជ្ឈមណ្ឌលយុវជន មានសារៈសំខាន់ ក្នុងការប្រយុទ្ធប្រឆាំងទៅនឹងការរីករាលដាលនៃវីរុសកូវីដ១៩។ ក៏ប៉ុន្តែលោករ៉េននឺ បានចោទជាសំណួរថា តើមានអ្នកណាខ្លះបានមើលឃើញនិងស្តាប់ឮអំពីការរំលោភបំពានលើកុមារនាកាលៈទេសៈនេះ?
ស្របពេលមនុស្សរាប់លាននាក់ ត្រូវជាប់គាំងនៅក្នុងផ្ទះ ក្រុមអង្គការសមាគម បាននិយាយថាអំពើហិង្សា ក៏ត្រូវបានគេបង្ខាំងទុកក្នុងផ្ទះជាមួយមនុស្សដូចគ្នាដែរ ហើយនោះជាបញ្ហាដែលពួកគេព្រួយបារម្ភ។
លោកស្រីបេអាទ្រីស ហ្វ្រេស្កូ រ៉ុលហ្វូ អ្នករាយការណ៍ទូទៅស្តីពីអំពើហិង្សាលើស្ត្រីរបស់សភានៃក្រុមប្រឹក្សាអឺរ៉ុប បានគូសបញ្ជាក់កាលពីពេលថ្មីៗនេះថា នៅពេលដែលរដ្ឋាភិបាល បញ្ចេញថវិការាប់ពាន់លានដុល្លារ ដើម្បីជួយស្តារសេដ្ឋកិច្ច និងសេវាកម្មសុខភាព ពួកគេ ក៏ត្រូវងាកមកមើលផងដែរពីសារៈសំខាន់នៃសមភាព និងសិទ្ធិមនុស្សជាមូលដ្ឋាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ