ធនាគារកណ្តាលអឺរ៉ុប អាចនឹងសង្គ្រោះសេដ្ឋកិច្ចអឺរ៉ុប រហូតដល់វិបត្តិកូរ៉ូណាថ្មី ទៅផុត
ផលវិបាកសេដ្ឋកិច្ចបង្កឡើងដោយវិបត្តិកូវីដ១៩ នឹងធ្វើឱ្យផលិតផលសរុបក្នុងស្រុក នៅតំបន់អឺរ៉ូ អាចនឹងធ្លាក់ចុះ ពី ៥ទៅ ១២% នៅឆ្នាំ២០២០។ នេះបើតាមលោកស្រី គ្រីស្ទីន ឡាហ្កាដ (Christine Lagarde)ប្រធានធនាគារកណ្តាលអឺរ៉ុប ដែលបានអះអាងទៀតថា ប្រឈមនឹងស្ថានភាពសេដ្ឋកិច្ចមិនជាក់លាក់យ៉ាងដូច្នេះ ផែនការសង្គ្រោះបន្ទាន់សេដ្ឋកិច្ចអឺរ៉ុប នឹងមិនបញ្ចប់ត្រឹមត្រឹមដំណាច់ឆ្នាំ២០២០នេះទេ។ វិធានការអាចមានអាយុវែងរហូតទាល់តែវិបត្តិកូរ៉ូណារលត់។
ចុះផ្សាយនៅថ្ងៃ៖
ស្តាប់ - ០២:១៤
ក្រោយវិបត្តិសេដ្ឋកិច្ចដើរថយក្រោយបង្កឡើងវិបត្តិសុខភាពកូវីដ១៩ សេដ្ឋកិច្ចអឺរ៉ុបនឹងស្ទុះឡើងវិញ ប៉ុន្តែក្នុងល្បឿននិងកម្លាំងដែលពិបាកស្មានបំផុត។ នេះបើតាមប្រសាសន៍របស់លោកស្រី គ្រីស្ទីនឡាហ្កាដ ប្រធានធនាគារកណ្តាលអឺរ៉ុប ក្នុងសន្និសីទកាសែតអនឡាញ ដោយព្យាករទៀតថា ដោយសារភាពមិនជាក់លាក់ ផលិតផលសរុបក្នុងស្រុកអឺរ៉ុបនឹងធ្លាក់ចុះពី ៥%ទៅ១២% នៅឆ្នាំ២០២០។
បើតាមតួលេខរបស់ការិយាល័យស្ថិតិអឺរ៉ុប ចេញផ្សាយនៅថ្ងៃព្រហស្បតិ៍ទី ៣០មេសា នៅត្រីមាសទីមួយ ឆ្នាំ២០២០ ផលិតផលសរុបក្នុងស្រុករបស់តំបន់អឺរ៉ូ បានធ្លាក់ចុះ៣,៨%។ ជាតួលេខដ៏អាក្រក់ពុំធ្លាប់កើតមានក្នុងប្រវត្តិអឺរ៉ុបសម័យសន្តិភាពទេ។ ប៉ុន្តែ ការធ្លាក់ចុះសកម្មភាពសេដ្ឋកិច្ចនៅខែមេសា នឹងរឹងរឹតតែធ្វើឱ្យផលវិបាកសេដ្ឋកិច្ចមានកាន់ធ្ងន់ធ្ងរមួយកំរិតទៀត នៅត្រីមាសទីពីរ។ សេដ្ឋកិច្ចនឹងបន្តរងឥទ្ធិពលអវិជ្ជមាន ក្នុងរយៈពេលជាច្រើនខែទៅមុខទៀត។ នេះបើតាមការពន្យល់របស់លោកស្រី ឡាហ្កាដដដែល។
កំណើនសេដ្ឋកិច្ចតំបន់អឺរ៉ូ នឹងចាប់មានកំណើនជាធម្មតាឡើងវិញនៅឆ្នាំក្រោយ និងឆ្នាំបន្តបន្ទាប់ ប៉ុន្តែទាំងនេះគឺអាស្រ័យទៅលើវិធានការនិងជោគជ័យរបស់រដ្ឋាភិបាលនីមួយៗ ក្នុងនយោបាយទ្រទ្រង់ប្រាក់ចំណូលនិងការងារ។
ក្នុងស្ថានភាពបែបនេះ ធនាគារកណ្តាលអឺរ៉ុប ទំនងជានឹងមិនបញ្ឈប់ផែនការជួយសង្គ្រោះសេដ្ឋកិច្ចបន្ទាន់ប្រឈមនឹងវិបត្តិកូរ៉ូណាវីរុស ត្រឹមដំណាច់ឆ្នាំ២០២០នេះទេ។ ផែនការសង្គ្រោះ តម្លៃ៧៥០ពាន់លានអឺរ៉ូ បង្កើតឡើងកាលពីខែមីនា នឹងត្រូវរក្សាទុកជាបន្តទៀត រហូតដល់ពេលណាធនាគារកណ្តាលអឺរ៉ុប គិតថាវិបត្តិកូរ៉ូណាវីរុសទៅផុត។
ក្នុងក្របខ័ណ្ឌនេះ ធនាគារកណ្តាលនឹងសើរើមើល និងបែងចែក ការទិញ បំណុលសាធារណៈនិង ឯកជន ទៅតាមមាឌ ទៅតាមស្ថានភាពដែលចាំបាច់ និងទៅតាមពេលវេលា មិនថាយូរខ្លីប៉ុណ្ណាទេ។ ធនាគារកណ្តាលអឺរ៉ុបបានអះអាងទៀតថា ផែនការសង្គ្រោះបន្ទាន់គ្រាន់តែជាចំណែកមួយនៃផែនការសង្គ្រោះ ដ៏មហិមារបស់អឺរ៉ុប ដែលមានតម្លៃជាងទៅ១ទ្រីលានអឺរ៉ូតែប៉ុណ្ណោះ។ នៅក្នុងជំនួបប្រជុំក្រុមប្រឹក្សាអភិបាល ស្ថាប័នហិរញ្ញវត្ថុកំពូលរបស់អឺរ៉ុប បានសម្រេចចំណាយ១២០ពាន់លានអឺរ៉ូបន្ថែមទៀតទៅក្នុងកម្មវិធីសង្គ្រោះសេដ្ឋកិច្ចកាលពីឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ