អឺរ៉ុបចុះកិច្ចព្រមព្រៀងដើម្បីធានា ទទួលបាន វ៉ាក់សាំង ប្រឆាំងជំងឺកូវីដ១៩
នៅពេលការស្រាវជ្រាវរកវ៉ាក់សាំង បង្ការជំងឺកូវីដ ១៩ កំពុងផ្តល់ពន្លឺបណ្តើរៗ ប្រទេសបារាំង អាល្លឺម៉ង់ អ៊ីតាលី និងហូឡង់ បានចុះកិច្ចព្រមព្រៀងជាមួយក្រុមហ៊ុនផលិតឱសថ AstraZeneca ដើម្បីធានាផ្គង់ផ្គង់ អនាគតវ៉ាក់សាំងប្រឆាំងជំងឺកូវីដ ចំនួន ៣០០លានដូស សម្រាប់ប្រទេសសមាជិកសហភាពអឺរ៉ុប។ ដើម្បីទទួលបានវ៉ាក់សាំងក្នុងចំនួនដ៏ច្រើន និងមុនគេ គណៈកម្មការអឺរ៉ុបគ្រោងនឹងប្រើកញ្ចប់ថវិកា ជាង ២ពាន់លានអឺរ៉ូ សម្រាប់កិច្ចសន្យាទិញ វ៉ាក់សាំងបង្ការជំងឺកូវីដ។
ចុះផ្សាយនៅថ្ងៃ៖
ស្តាប់ - ០២:០៣
ដោយចុះកិច្ចសន្យាជាមួយក្រុមហ៊ុនផលិតឱសថ AstraZeneca ប្រទេសបារាំង អាល្លឺម៉ង់ អ៊ីតាលី និងហូឡង់ ចង់បានការធានាថា ប្រទេសសមាជិកសហភាពអឺរ៉ុប នឹងទទួលបាន វ៉ាក់សាំងបង្ការជំងឺកូវីដ មុនគេ នៅថ្ងៃណាដែលគេរកឃើញ វ៉ាក់សាំង។
តាមលោកJens Spahn រដ្ឋមន្រ្តីសុខភាពអាល្លឺម៉ង់ ដើម្បីឲ្យការផ្គត់ផ្គង់វ៉ាក់សាំង ធ្វើឡើងក្នុងចំនួនដ៏ច្រើន និងលឿន នៅឆ្នាំនេះ ឬនៅឆ្នាំក្រោយ គេត្រូវតែចុះកិច្ចសន្យា ឥលូវនេះ សម្រាប់ធានាសមត្ថភាពផលិតរបស់ក្រុមហ៊ុនផលិតឱសថ។
សម្រាប់រដ្ឋមន្រ្តីក្រសួងសុខាភិបាលបារាំង លោកOliver Varan ការទទួលបានវ៉ាក់សាំង បង្ការជំងឺកូវីដ គឺជាដំណាក់កាលសំខាន់ ដើម្បីធានាការពារប្រជាជនពីការឆ្លងរាតត្បាតសាជាថ្មី របស់ជំងឺកូវីដ។ តាមរដ្ឋមន្រ្តីសុខភាពបារាំង ដដែល ការផ្គត់ផ្គង់វ៉ាក់សាំងនឹងអាចធ្វើឡើងនៅមុនដំណាច់ឆ្នាំ ២០២០នេះ។
កាលពីថ្ងៃសុក្រគណៈកម្មការអឺរ៉ុបបានបញ្ចុះបញ្ចូលប្រទេសសមាជិកសហភាពអឺរ៉ុប ឲ្យចូលរួមក្នុងគម្រោងរួមគ្នា ដើម្បីមានអាទិភាព ក្នុងការទទួលបានអនាគតវ៉ាក់សាំង។ គណៈកម្មការអឺរ៉ុប គ្រោងនឹងចំណាយថវិកា ជាង ២ពាន់លានអឺរ៉ូ នៃកញ្ចប់ថវិកាពិសេសសម្រាប់កូវីដ សម្រាប់ បង់ថ្លៃ ជាមុនទៅឲ្យក្រុមហ៊ុនផលិតឱសថ ពោលគឺដើម្បីឲ្យក្រុមហ៊ុនអាចធានាបាន សមត្ថភាពផលិតវ៉ាក់សាំង។ ផ្ទុយមកវិញ កិច្ចសន្យាជាមួយក្រុមហ៊ុនAstraZeneca នឹងបើកសិទ្ធិឲ្យប្រទេសសមាជិកអឺរ៉ុបអាចទិញ វ៉ាក់សាំង ក្នុងតម្លៃថោក និងក្នុងចំនួន សមស្របនឹងចំនួនពលរដ្ឋរបស់ខ្លួន។
បង្កើត ឡើងនៅឆ្នាំ ១៩៩៩ នៅក្រោយ ការច្របាច់ចូលគ្នារវាងក្រុមហ៊ុនផលិតឱសថ ស៊ុយអែត និងអង់គ្លេស AstraZeneca កំពុងសហការជាមួយអ្នកវិទ្យាសាស្រ្តនៅសកលវិទ្យាល័យអង់គ្លេសOxford ដើម្បីស្រាវជ្រាវរកវ៉ាក់សាំងប្រឆាំងកូវីដ១៩។ តាមក្រុមហ៊ុនផលិតឱសថAstraZeneca ការធ្វើតេស្តសាកល្បង ទៅលើមនុស្ស កំពុងដំណើរការ នៅប្រទេសអង់គ្លេស និងនៅប្រទេសប្រេស៊ីល និងអាចផ្តល់លទ្ធផលពីប្រសិទ្ធិភាពរបស់វ៉ាក់សាំង នៅខែកញ្ញាខាងមុខ។ សព្វថ្ងៃនេះ មានការស្រាវជ្រាវជាង១០០ដែលធ្វើការទៅលើការស្រាវជ្រាវរកវ៉ាក់សាំងប្រឆាំងកូវីដ។ នៅក្នុងនោះ វ៉ាក់សាំងចំនួន១០ កំពុងស្ថិតក្នុងដំណាក់កាល សាកល្បងវេជ្ជសាស្ត្រ។ ប្រឈមនឹងជំងឺរាតត្បាតកូវីដ ដែលសម្លាប់មនុស្សជាង៤សែននាក់ និង ឆ្លងទៅមនុស្ស ៧លាននាក់ និង សេដ្ឋកិច្ចពិភពលោក ជាប់គាំងដោយសារវិធានការបិទទីក្រុង ដោយសារជំងឺកូវីដ ក្រុមហ៊ុនផលិតឱសថបានប្រជែងគ្នា ដើម្បី ស្រាវជ្រាវរកវ៉ាក់សាំង ក្នុងរយៈពេលដ៏លឿន ពី ១ឆ្នាំ ទៅ ១ឆ្នាំកន្លះ នៅពេល ការស្រាវជ្រាវរកវ៉ាក់សាំង ជាទូទៅ ត្រូវការពេលវេលាដល់ទៅ រាប់ឆ្នាំ។
នៅក្នុងសេចក្តីប្រកាសព័ត៌មាន កាលពីថ្ងៃសៅរ៍ ក្រុមហ៊ុនផលិតឱសថ បានអះអាងថា ក្រុមហ៊ុននឹងអាចផ្គត់ផ្គង់អនាគតវ៉ាក់សាំងបង្ការជំងឺកូវីដ ដល់ទៅ ៤០០លានដូស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ