តួកគីផ្តន្ទាទោសសកម្មជនអង្គការAmnesty Internationalពីបទធ្វើសកម្មភាពភេរវនិយម
តុលាការតួកគី កាលពីថ្ងៃសុក្រម្សិលមិញបានសម្រេចផ្តន្ទាទោស សកម្មជន៤រូបរបស់អង្គការការពារសិទ្ធិមនុស្សអន្តរជាតិ Amnesty International ឲ្យជាប់ពន្ធនាគារ ពី ២ ទៅ៦ឆ្នាំ ក្នុងបទចោទប្រកាន់ថា បានធ្វើសកម្មភាពភេរវនិយម នៅទឹកដី តួកគី។ សកម្មជន១១រូប របស់អង្គការការពារសិទ្ធិមនុស្ស ត្រូវបានអាជ្ញាធរចាប់ឃុំខ្លួន តាំងពីឆ្នាំ២០១៧ នៅក្នុងយុទ្ធនាការបង្រ្កាបរបស់រដ្ឋាភិបាល ទៅលើអ្នកប្រឆាំង នៅក្រោយ ការប៉ុនប៉ងធ្វើរដ្ឋប្រហារ មិនបានសម្រេច នៅឆ្នាំ ២០១៦។
ចុះផ្សាយនៅថ្ងៃ៖
ស្តាប់ - ០២:២៧
នៅក្នុងសវនការដែល ជានិមិត្តរូបនៃការដាក់គំនាបទៅលើអង្គការសង្គមស៊ីវិល ចៅក្រមតួកគីបានសម្រេចផ្តន្ទាទោស អតីតប្រធានអង្គការការពារសិទ្ធិមនុស្ស Amnesty International ប្រចាំតួកគីឲ្យជាប់ពន្ធនាគារ ៦ឆ្នាំ ៣ខែ ក្នុងបទចោទប្រកាន់ថា ជាសមាជិករបស់ក្រុមភេរវនិយម។ ចំណែកសកម្មជនការពារសិទ្ធិមនុស្ស៣នាក់ទៀត របស់Amnesty International ត្រូវបានផ្តន្ទាទោសឲ្យជាប់ពន្ធនាគារ ២ឆ្នាំ១ខែ ក្នុងបទចោទប្រកាន់ថា បានជួយអង្គការភេរវនិយម។
សកម្មជន៧រូបផ្សេងទៀត របស់Amnesty International ដែលនៅក្នុងនោះមានផងជនជាតិអាល្លឺម៉ង់ម្នាក់ និងស៊ុយអែតម្នាក់ ផ្ទុយទៅវិញ ត្រូវបានតុលាការដោះលែងឲ្យរួចផុតពីការចោទប្រកាន់។
សម្រាប់តំណាងអង្គការការពារសិទ្ធិមនុស្ស ការសម្រេចរបស់តុលាការគឺជារឿងអាស្រូវមួយ ព្រោះថា ការចោទប្រកាន់មិនសមហេតុផល គ្មានភស្តុតាងអ្វីទាំងអស់។
សកម្មជនការពារសិទ្ធិមនុស្ស១០រូបរបស់អង្គការAmnesty International ត្រូវបានអាជ្ញាធរចាប់ខ្លួន នៅខែកក្កដា ឆ្នាំ ២០១៧ ក្នុងពេលពួកគេកំពុងចូលរួមប្រជុំក្នុងសិក្ខាសាលាមួយ នៅឆ្នេរសមុទ្រអ៊ីស្តង់ប៊ូល ដែលផ្តោតទៅលើបញ្ហាសន្តិសុខអ៊ីនធ័រនែត ។ ប៉ុន្តែ នៅក្នុងបទចោទប្រកាន់ របស់តុលាការ ពួកគេបានចូលរួមក្នុងការប្រជុំសម្ងាត់សម្រាប់រៀបចំផែនការបះបោរ បង្កចលាចលនៅតួកគី ដោយមានការសហការជាមួយ បណ្តាញGülen នៅអាមេរិក ដែលប្រធានាធិបតី តួកគី ចោទប្រកាន់ថា ជាអ្នកនៅពីក្រោយ រដ្ឋប្រហារមិនបានសម្រេច កាលពីឆ្នាំ ២០១៦។
សាលក្រម ប្រឆាំងនឹងសកម្មជនការពារសិទ្ធិមនុស្ស របស់អង្គការAmnesty International ត្រូវបានប្រកាសឡើង នៅក្នុងកាលៈទេសៈមួយ ដែលតួកគីកំពុងមានបរិយាកាសតានតឹង សម្រាប់ក្រុមអង្គការសង្គមស៊ីវិល។ ក្រៅតែពី សកម្មជនការពារសិទ្ធិមនុស្ស គេបារម្ភផងដែរ ពីជោគវាសនារបស់មន្រ្តីរដ្ឋការ ទាហាន ដែលត្រូវរដ្ឋាភិបាលរបស់លោកប្រធានាធិបតី អ៊ែដូហ្កាន តាមប្រមាញ់ចាប់ខ្លួន នៅក្រោយ រដ្ឋប្រហារយោធា មិនបានសម្រេច នៅឆ្នាំ ២០១៦។ តាមអង្គការសិទ្ធិមនុស្ស នៅក្រោយរដ្ឋប្រហារមិនបានសម្រេច មនុស្សប្រមាណ៨ម៉ឺននាក់ ដែលភាគច្រើនជាកូនទាហាន ត្រូវចាប់ឃុំខ្លួន។ គ្រូបង្រៀន មន្រ្តីរដ្ឋការ ជាង ១សែន ៥ម៉ឺននាក់ ត្រូវបានបណ្តេញចេញ ឬព្យួរការងារ ក្នុងបទសង្ស័យថា បានចូលរួមគាំទ្រឲ្យមានរដ្ឋប្រហារប្រឆាំងលោកប្រធានាធិបតីអ៊ែរដូហ្កាន។ ចំណែកស្ថាប័នកាសែត ជាង ១៨០ត្រូវបានអាជ្ញាធរ បញ្ជារឲ្យបិទទ្វារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ