តួកគីប្រកាសព្យួរការគោរពសន្ធិសញ្ញាសិទ្ធិមនុស្សអឺរ៉ុប ដើម្បីអនុវត្តច្បាប់អាជ្ញាសិក
លោកឧបនាយករដ្ឋមន្ត្រីតួកគី បានប្រកាសថា តួកគីសូមព្យួរការអនុវត្តសន្ធិសញ្ញាអឺរ៉ុប ស្តីពីសិទ្ធិមនុស្សមួយរយៈសិន ដើម្បីដាក់ប្រទេសឲ្យស្ថិតក្នុងភាពអាសន្ន។ ធ្វើបែបនេះ គឺដើម្បីចៀសវៀងការចោទប្រកាន់ទៅលើតួកគី ថាបានរំលោភទៅលើកាតព្វកិច្ចនៃសន្ធិសញ្ញាសិទ្ធិមនុស្សអឺរ៉ុប។ ការដាក់ប្រទេសឲ្យស្ថិតក្នុងភាពអាសន្ន នឹងអនុញ្ញាតិឲ្យរដ្ឋាភិបាលតួកគី អាចចាត់វិធានការមួយចំនួន ដែលរឹតបន្តឹងរឺអាចរំលោភសិទ្ធិសេរីភាពជាមូលដ្ឋានរបស់ប្រជាពលរដ្ឋ។
ចុះផ្សាយនៅថ្ងៃ៖
ស្តាប់ - ០២:២១
លោក Numan Kurtulmus ឧបនាយករដ្ឋមន្ត្រីតួកគី បានបញ្ជាក់នៅថ្ងៃព្រហស្បតិ៍ទី ២១កក្កដាថា ដើម្បីអាចអនុវត្តស្ថានភាពអាសន្នឲ្យបានពេញលេញនៅតួកគី និងដើម្បីចៀសវៀងការចោទប្រកាន់ណាមួយទៅលើតួកគី រដ្ឋាភិបាលតួកគី បានសម្រេចចិត្តធ្វើការព្យួរការអនុវត្តកាតព្វកិច្ច ដែលមានចែងនៅក្នុងសន្ធិសញ្ញាអឺរ៉ុប ស្តីពីការគោរពសិទ្ធិមនុស្ស។
លោក ឧបនាយករដ្ឋមន្ត្រី បានបន្ថែមថា ការសម្រេចនេះ គឺដោយយោងទៅតាមមាត្រា ១៥នៃសន្ធិសញ្ញានេះ ដែលអនុញ្ញាតិឲ្យប្រទេសហត្ថលេខី អាចធ្វើការព្យួរការអនុវត្តសន្ធិសញ្ញា ក្នុងករណីពិសេសមួយចំនួន។ លោកបានលើកឧទាហរណ៍ ករណីប្រទេសបារាំង ដែលបានធ្វើដូចគ្នាកាលពីខែវិច្ឆិកា ២០១៥ ក្រោយរងការវាយប្រហារភេរវកម្ម នៅក្រុងប៉ារីស។
គួររំលឹកថា ការព្យួរមិនអនុវត្តសន្ធិសញ្ញាអឺរ៉ុប ស្តីពីសិទ្ធិមនុស្ស គឺមានន័យថា តួកគីនឹងមានសិទ្ធិចាត់វិធានការមួយចំនួន ដោយមិនចាំបាច់ខ្វាយខ្វល់ថាវាគោរពទៅតាមបទបញ្ញត្តិអន្តរជាតិ ស្តីពីការគោរពសិទ្ធិមនុស្សដែររឺទេ។ ធ្វើដូចនេះ គឺតួកគីនឹងមិនអាចរងការចោទប្រកាន់ពីតុលាការសិទ្ធិមនុស្សអន្តរជាតិ ទៅថ្ងៃក្រោយទេ។
តាមការគ្រោងទុក រដ្ឋាភិបាលតួកគី នឹងប្រើកាលៈទេសៈអាសន្ននេះ ដើម្បីដាក់ចុះនូវក្រិត្យ និងបទបញ្ញតិមួយចំនួន ដែលមានតម្លៃស្មើច្បាប់ ដោយមិនចាំបាច់ឆ្លងកាត់ការពិភាក្សា និងបោះឆ្នោតពីសភាទេ។ តួយ៉ាង ដូចជាការចុះឆែកឆេរ រឹបអូស ចាប់ឃុំខ្លួន ដោយមិនចាំបាច់មានដីកាបង្គាប់ពីតុលាការ និងការត្រួតពិនិត្យលើការផ្សព្វផ្សាយរបស់ប្រព័ន្ធព័ត៌មាន ទាំងរដ្ឋទាំងឯកជន។ រហូតមកត្រឹមពេលនេះ មនុស្សជិត១ម៉ឺននាក់ ត្រូវបានចាប់ឃាត់ខ្លួន ហើយបុគ្គលិកស្ថាប័នរដ្ឋចំនួនជាង៥ម៉ឺននាក់ ត្រូវបានគេដកហូតពីការងារ។
បន្ថែមពីនេះ អាជ្ញាធរតួកគី អាចមានសិទ្ធិប្រើច្បាប់អាជ្ញាសិក ហាមឃាត់មិនឲ្យមានការជួបជុំគ្នា រឺក៏រឹតបន្តិងការធ្វើដំណើររបស់ប្រជាពលរដ្ឋជាដើម។ យ៉ាងណាក៏ដោយ ការដែលរដ្ឋាភិបាលតួកគី បានហាមឃាត់សាស្ត្រាចារ្យសកលវិទ្យាល័យ មិនឲ្យធ្វើដំណើរទៅបង្រៀន រឺចូលរួមវេទិកាជជែកនៅក្រៅប្រទេស ត្រូវបានគេរិះគន់ជាខ្លាំង។
លោកប្រធានាធិបតីតួកគីបានបញ្ជាក់តាមកញ្ចក់ទូរទស្សន៍ថា តួកគីនឹងនៅតែជាប្រទេសគោរពនីតិរដ្ឋ គោរពលទ្ធិប្រជាធិបតេយ្យ បើទោះជាតួកគីកំពុងអនុវត្តកាលៈទេសៈអាសន្នក៏ដោយ។ លោកបន្តថា តែតួកគី មិនអាចអត់ឱនឲ្យក្រុមបក្សពួកក្បត់ ដែលបានប៉ុនប៉ងផ្តួលរំលំរដ្ឋាភិបាល និងស្ថាប័នរដ្ឋបានទេ។ ចំណែក លោកឧបនាយករដ្ឋមន្ត្រីតួកគីបានបញ្ជាក់ថា ថ្វីបើការប្រកាសស្ថានភាពអាសន្ន មានសុពលភាពរយៈពេលបីខែ តែរដ្ឋាភិបាលនឹងព្យាយាមធ្វើគ្រប់យ៉ាង ដើម្បីបិទបញ្ចប់វាឲ្យបានឆាប់ជាទីបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ