ជំងឺកូវីដ៖ បារាំងអន់ចិត្តនឹងអង់គ្លេសដែលចេញបញ្ជាឲ្យចាប់ក្រុង រាល់អ្នកធ្វើដំណើរពី បារាំង
ចាប់ពីព្រឹកថ្ងៃសៅរ៍ ស្អែកទៅ រាល់អ្នកដំណើរមកពីប្រទេសបារាំង ចូលទៅទឹកដីអង់គ្លេស នឹងត្រូវដាក់បង្ឃាំង ឲ្យនៅដាច់ឆ្ងាយពីគេឯងរយៈពេល២សប្តាហ៍។ តាមសេចក្តីប្រកាសរបស់រដ្ឋាភិបាល អង់គ្លេស កាលពីថ្ងៃព្រហស្បតិ៍ អ្នកដំណើរមកពីប្រទេសហូឡង់ ម៉ាល់ត៍ ម៉ូណាកូ ក៏ត្រូវដាក់ឲ្យដាច់ដោយឡែក រយៈពេល ២សប្តាហ៍ដែរ បន្ទាប់ពីស្ថានភាពឆ្លងរីករាលជំងឺកូវីដបានធ្លាក់ចុះ អាក្រក់ នៅប្រទេសខាងលើ នៅប៉ុន្មានថ្ងៃចុងក្រោយនេះ។ ការសម្រេចចិត្តរបស់រដ្ឋាភិបាលអង់គ្លេសបានធ្វើឲ្យទីក្រុងប៉ារីស មិនសប្បាយចិត្ត និងបានសន្យាចាត់វិធានការ ដូចគ្នា ដើម្បីសងសឹកអង់គ្លេស។
ចុះផ្សាយនៅថ្ងៃ៖
ស្តាប់ - ០២:០២
ដោយចេញសេចក្តីប្រកាសនៅយប់ថ្ងៃព្រហស្បតិ៍ រដ្ឋាភិបាលអង់គ្លេសបានទុកពេល ជាង៣០ម៉ោង សម្រាប់អ្នកដែលពាក់ព័ន្ធ អ្នកដែលបានចេញពីអង់គ្លេស ទៅធ្វើដំណើរកំសាន្ត នៅក្នុងប្រទេសបារាំង ហូឡង់ ឬម៉ូណាកូ។
ទៅ តាមវិធានការ ថ្មីរបស់រដ្ឋាភិបាល អ្នកដំណើរពីបារាំង ហូឡង់ ម៉ូណាកូ និងម៉ាល់ត៍ ដែលធ្វើដំណើរចូលទឹកដីអង់គ្លេស ចាប់ពីម៉ោង ៣ភ្លឺ នៅថ្ងៃសៅរ៍ នឹងត្រូវដាក់ឲ្យនៅដាច់ដោយឡែក រយៈពេល២សប្តាហ៍។ តាមរដ្ឋមន្រ្តីក្រសួងគមនាគមន៍អង់គ្លេស រដ្ឋាភិបាលបានសម្រេចចិត្តយ៉ាងដូច្នេះ ដោយសារតែពិនិត្យឃើញថា ស្ថានភាព ឆ្លងជំងឺកូវីដ បានធ្លាក់ចុះកាន់តែអាក្រក់ នៅបណ្តាប្រទេសខាងលើ។
នៅប្រទេសបារាំង ទីភ្នាក់ងារសុខភាព បានប្រកាសពីការកើនឡើងនៃករណីឆ្លងកូវីដ ថ្មី ជាង ២៦០០ករណី នៅថ្ងៃព្រហស្បតិ៍ម្សិលមិញ។
វិធានការរបស់រដ្ឋាភិបាលអង់គ្លេសនឹងប៉ះពាល់ទៅដល់ប្រជាជនអង់គ្លេស និងបារាំង រស់នៅអង់គ្លេស កន្លះលាននាក់ ដែលបានធ្វើដំណើរ ចូលប្រទេសបារាំង នៅខែកក្កដា សម្រាប់វិស្សមកាលរដូវក្តៅ។ រដ្ឋលេខាធិការបារាំងទទួលបន្ទុក កិច្ចការអឺរ៉ុបបានរិះគន់វិធានការរបស់រដ្ឋាភិបាល អង់គ្លេស មុននឹងសន្យាចាត់វិធានការដូចគ្នានេះដើម្បីវាយបកអង់គ្លេស។
នៅមុនប្រទេសបារាំង ហូឡង់ និងម៉ូណាកូ អង់គ្លេស ទើបបានសម្រេចចាត់វិធានការដូចគ្នា នេះ កាលពីចុងខែកក្កដា សម្រាប់អ្នកដែល ធ្វើដំណើរមកពីប្រទេសអេស្ប៉ាញ ជាទីដែលករណីឆ្លងជំងឺកូវីដបានចាប់កំរើកក្នុងសន្ទុះមួយដ៏លឿន។
សម្រាប់រដ្ឋមន្រ្តីក្រសួងគមនាគមន៍អង់គ្លេស រដ្ឋាភិបាលបានប្រឹងប្រែងចាត់វិធានការដើម្បីកាត់បន្ថយ ករណីឆ្លងជំងឺកូវីដ ក្នុងប្រទេស។ ដូច្នេះ រដ្ឋាភិបាលមិនចង់ឲ្យអ្នកមកពីខាងក្រៅ នាំយកជំងឺកូវីដ មកធ្វើឲ្យស្ថានភាពជំងឺកូវីដ កាន់តែចុះអាក្រក់នោះទេ។
អង់គ្លេស ប្រទេសអឺរ៉ុប ដែលរងប៉ះពាល់ខ្លាំង ដោយសារកូវីដ មាន អ្នកស្លាប់ ជាង ៤ម៉ឺននាក់ និងមនុស្សឆ្លង កូវីដ ជាង ៣សែននាក់ បានបិទប្រទេសរហូតដល់ចុងខែមិថុនា។ ចាប់តាំងពីខែកក្កដា រដ្ឋាភិបាលអង់គ្លេសប្រកាសវិធានការ បន្ធូរបន្ថយ ជាច្រើន ដូចជា ការអនុញ្ញាតឲ្យមនុស្សត្រលប់ទៅធ្វើការ និងបើកសាលារៀន។ ប៉ុន្តែ ជាមួយនឹងវិធានការបន្ធូរបន្ថយ រដ្ឋាភិបាលបានប្រកាសផងដែរ ប្រាក់ពិន័យទ្វេដង សម្រាប់អ្នកដែលល្មើស មិនព្រមពាក់ម៉ាស និងរៀបចំកម្មវិធីជួបជុំ មនុស្សលើសពី៣០នាក់។ នៅអង់គ្លេសជាទីដែលមានអ្នកឆ្លងថ្មី ប្រមាណ ១ពាន់នាក់ក្នុងមួយថ្ងៃ អ្នកដែលមិនព្រមពាក់ម៉ាស នឹងត្រូវផាក ឲ្យបង់ប្រាក់ពិន័យ ៣៥០០អឺរ៉ូ ស្មើនឹង២០ដង បើប្រៀបធៀបនឹងប្រាក់ពិន័យ នៅប្រទេសបារាំង ក្នុងរឿង ល្មើសមិនព្រមពាក់ម៉ាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ