សហភាពអឺរ៉ុបប្រកាសមិនទទួលស្គាល់លទ្ធផលបោះឆ្នោតប្រធានាធិបតី នៅបេឡារុស
“យើង គាំទ្របាតុករបេឡារុស” នេះជាសម្រែកព្រមគ្នារបស់មេដឹកនាំសហភាពអឺរ៉ុប ក្នុងជំនួបកំពូលពិសេស ស្តីពីវិបត្តិនយោបាយបេឡារុស កាលពីល្ងាចថ្ងៃទី ១៩ សីហា ២០២០។ ក្នុងន័យនេះ សហភាពអឺរ៉ុបបានប្រកាសមិនទទួលស្គាល់ លទ្ធផលនៃការបោះឆ្នោតប្រធានាធិបតី ដែលលោក អាឡិចសង់ លូកាឆិនកូ ឈ្នះបន្តកាន់តំណែងមួយអាណត្តិទៀត។ សហភាពអឺរ៉ុបក៏បានថ្កោលទោសសកម្មភាពបង្ក្រាបបាតុកម្មដែលអូសបន្លាយតាំងពី១១ថ្ងៃមក។
ចុះផ្សាយនៅថ្ងៃ៖
ស្តាប់ - ០១:៤៣
មេដឹកនាំសហភាពអឺរ៉ុបទាំងអស់ បានបង្ហាញជំហរ និងអាទិភាពរួម នៅក្នុងជំនួបកំពូលពិសេសកាលពីម្សិលមិញ គាំទ្រប្រជាពលរដ្ឋបេឡារុស។ គណៈកម្មការអឺរ៉ុបបានថែមទាំងប្រកាសបំរុងកញ្ចប់ថវិកា៥៣លានអឺរ៉ូ សម្រាប់ជួយសង្គមស៊ីវិល ប្រព័ន្ធឃោសនាព័ត៌មានឯករាជ្យ ព្រមទាំងសេវាសុខាភិបាលមន្ទីរពេទ្យ ដែលរងបន្ទុកខ្លាំងនឹងវិបត្តិកូវីដ១៩។ កញ្ចប់ថវិកានេះមិនមែនជាលុយសុទ្ធយកទៅហុចឱ្យបេឡារុសទេ តែជាមូលនិធិផ្តល់ឱ្យរដ្ឋាភិបាល។ ប៉ុន្តែសហភាពអឺរ៉ុបលែងទទួលស្គាល់រដ្ឋាភិបាលបេឡារុសនេះទៀតទេ។ នេះជាសេចក្តី ប្រកាសដោយក្តែងៗរបស់លោក ឆាល មីឆែល ប្រធានក្រុមប្រឹក្សាសហភាពអឺរ៉ុប ដោយបន្ថែមថា ៖
“ត្រូវបញ្ឈប់អំពើហិង្សា។ ត្រូវមានការចរចាជាតិ ។ អឺរ៉ុបមិនទទួលស្គាល់លទ្ធផលបោះឆ្នោតប្រធានាធិបតីដែលអាជ្ញាធរបេឡារុសបានរៀបចំឡើងទេ។ សហភាពអឺរ៉ុបប្រឆាំងដាច់ខាតនឹងការជាប់ឆ្នោតជាថ្មី របស់លោក លូកាឆិនកូ ដែលកាន់អំណាចតាំងពី២៦ឆ្នាំនៅបេឡារុស”។
សហភាពអឺរ៉ុបចង់ឱ្យបេឡារុស មានអន្តរកាលនយោបាយ ប៉ុន្តែអឺរ៉ុបមិនបានអំពាវនាវឱ្យមានការរៀបចំបោះឆ្នោតជាថ្មីឡើងវិញទេ។ នៅក្នុងសារទ្វីត ប្រមុខដឹកនាំអឺរ៉ុប បានអះអាងថា ប្រជាពលរដ្ឋបេឡារុសជាមានសិទ្ធិសម្រេចជោគវាសនារបស់ខ្លួន។ ប៉ុន្តែក្រៅអំពីការបដិសេធលទ្ធផលឆ្នោតនិងបរិហារទង្វើបង្ក្រាបបាតុកម្មរបស់រដ្ឋាភិបាលបេឡារុស សហភាពអឺរ៉ុបបានសម្រេចព្រមព្រៀងរៀបចំផែនការដាក់ទណ្ឌកម្មលើមេដឹកនាំក្នុងជួររដ្ឋាភិបាលរបស់លោក អាឡិចសង់ លូកាឆិនកូ មួយចំនួន។ បើតាមប្រធានគណៈកម្មការ អឺរ៉ុបមានគម្រោងដាក់ទណ្ឌកម្មលើមេដឹកនាំណាដែលមានទំនួលខុសត្រូវខាងបង្ក្រាបបាតុករ និងអ្នកដែលមានពាក់ព័ន្ធនឹងការលួចបន្លំសន្លឹកឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ