នាយករដ្ឋមន្ត្រីលីបង់ ប្រកាសលាចុះពីតំណែង ក្រោមសម្រែកទាមទារពីប្រជាជន
យប់ថ្ងៃចន្ទ នាយករដ្ឋមន្ត្រីលីបង់ ហាសសាន ឌីយ៉ាប បានប្រកាសតាមកញ្ចក់ទូរទស្សន៍ សុំលាឈប់ពីតំណែង។ ការលាឈប់នេះ ស្ថិតក្រោមសម្ពាធ និងសម្រែកទាមទារពីក្រុមបាតុករលីបង់ ដែលខឹងសម្បារនឹងរដ្ឋាភិបាលដែលអសមត្ថភាព និងពុករលួយ។ លោក ហាសសាន ឌីយ៉ាប ក៏បានទទួលស្គាល់ដែរ ថាអំពើពុករលួយពិតជាបានចាក់ឫសស៊ីរូងយ៉ាងជ្រៅនៅក្នុងស្ថាប័នរដ្ឋលីបង់ ពិតប្រាដកមែន។ លោកថែមទាំងគូសបង្ហាញថា ដោយសារតែអំពើពុករលួយនេះហើយ ដែលនាំឱ្យកើតមានសោកនាដកម្មផ្ទុះនៅកំពង់ផែ សម្លាប់មនុស្សយ៉ាងហោចជិត១៦០នាក់ និងរបួសប្រមាណ៦ ពាន់នាក់។
ចុះផ្សាយនៅថ្ងៃ៖
ស្តាប់ - ០២:៣៧
មួយសប្តាហ៍ក្រោយពីផ្ទុះសារធាតុគីមីអាម៉ូនីញ៉ូមនីត្រាតនៅកំពង់ផែបេរូត នាយករដ្ឋមន្ត្រីលីបង់ ត្រូវធ្លាក់ពីតំណែង ព្រោះតែរងសម្ពាធបាតុកម្មតាមដងផ្លូវ របស់ប្រជាពលរដ្ឋ។ តាំងពីថ្ងៃសៅរ៍ រហូតដល់ថ្ងៃច័ន្ទ រដ្ឋមន្ត្រីជាច្រើនរូប បានបន្តកន្ទុយគ្នា សុំលាឈប់ពីតំណែងជាបន្តបន្ទាប់។ ផ្តើមឈប់មុនគេ គឺលោកស្រីរដ្ឋមន្ត្រីក្រសួងព័ត៌មាន បន្ទាប់មករដ្ឋមន្ត្រីក្រសួងបរិស្ថាន, រដ្ឋមន្ត្រីយុត្តិធម៌ ហើយនិងនៅថ្ងៃចន្ទ គឺរដ្ឋមន្ត្រីហិរញ្ញវត្ថុ។ រដ្ឋមន្ត្រីក្រសួងការបរទេស បានសុំលាឈប់ តាំងពីប៉ុន្មានថ្ងៃមុនសោកនាដកម្មនោះម្ល៉េះ។ ក្រោយពីរដ្ឋមន្ត្រីជាច្រើនរូប សុំចុះលាឈប់ ជាបន្តបន្ទាប់ ក៏មានអង្គទូតបានសុំលាពីតំណែង និងអ្នកតំណាងរាស្ត្រយ៉ាងហោច ៨ នាក់ ប្រកាសសុំឈប់ពីតួនាទីដែរ។
ទាំងនេះ ជាសម្ពាធធ្ងន់ថែមលើសម្រែកតាមដងផ្លូវ ធ្វើឱ្យប្រមុខរដ្ឋាភិបាល លោក ហាសសាន ឌីយ៉ាប ប្រកាសសុំចុះពីតំណែងតែម្តង។ ការសុំលាឈប់នេះ បានទទួលយល់ព្រមភ្លាមៗ ពីប្រធានាធិបតី មីសែល អ៊ូន។
ក្នុងសុន្ទរកថាលាចុះពីតំណែង នាយករដ្ឋមន្ត្រីលីបង់ បានលើកឡើងពីអំពើពុករលួយ ដែលស៊ីរូងយ៉ាងជ្រៅក្នុងស្ថាប័នជាតិលីបង់។ នេះជាការទទួលស្គាល់ ជាផ្លូវការ លើកទី១ ដែលថា ការចោទប្រកាន់ពីសំណាក់ប្រជាជនថារដ្ឋាភិបាលពុករលួយ គឺពិតជារលួយពិតមែន។ ព្រោះតែពលរដ្ឋស្អប់អំពើពុករលួយនិងខឹងរដ្ឋាភិបាល ទើបធ្វើបាតុកម្មជាច្រើនខែ ទម្លាក់អតីតនាយករដ្ឋមន្ត្រី Saad Hariri ធ្លាក់ពីតំណែង កាលពីខែមករា។ លោក ហាសសាន ឌីយ៉ាប ដែលចូលកាន់តំណែង បានតែជាង៦ខែ ក៏ត្រូវធ្លាក់ពីកៅអីថែមទៀត នៅពេលនេះ។
ក្នុងសុន្ទរកថាលាឈប់ដដែល នាយករដ្ឋមន្ត្រីសង្កត់ធ្ងន់ថា ដោយសារអំពើពុករលួយនេះហើយ ដែលបណ្តាលឱ្យមានហេតុការណ៍ផ្ទុះនៅកំពង់ផែ ហើយលោកសង្ឃឹមថា ឧក្រិដ្ឋជនដែលត្រូវទទួលខុសត្រូវ នឹងត្រូវប្រព័ន្ធយុត្តិធម៌កាត់ទោស។
ក្រោយហេតុការណ៍ផ្ទុះនៅកំពង់ផែបេរូត ថ្ងៃទី៤សីហា គឺបណ្តាលឱ្យមនុស្ស៣សែននាក់ គ្មានជម្រកស្នាក់នៅ ហើយមនុស្សជាង២០នាក់ទៀត កំពុងតែបន្តបាត់ខ្លួន គ្មានសង្ឃឹមថាមានជីវិតរស់នោះទេ។ ក្រុមគ្រួសារពួកគេ បានស្តីបន្ទោសរដ្ឋាភិបាល ថាយឺតយ៉ាវខ្លាំងក្នុងការរុករកជនរងគ្រោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ