មនុស្ស៨នាក់ បាត់ខ្លួន នៅក្នុងព្យុះទឹកភ្លៀងជន់លិច តំបន់ភាគអាគ្នេយ៍បារាំង
នៅប្រទេសបារាំង មនុស្ស៨នាក់បាត់ខ្លួន និងផ្ទះ ជាង ១ពាន់ខ្នង ត្រូវគ្មានភ្លើងអគ្គិសនីប្រើប្រាស់ ដោយសារខ្យល់ព្យុះ Alex ដែលបានបោកបាក់ដ៏ខ្លាំងក្លា កាលពីយប់ថ្ងៃសុក្រម្សិលមិញ។ ព្យុះAlex ដែលបក់ចេញពីភាគខាងត្បូង បារាំង បានទៅសម្លាប់មនុស្ស ២នាក់ នៅប្រទេសអ៊ីតាលី។
ចុះផ្សាយនៅថ្ងៃ៖
ស្តាប់ - ០១:៥៨
ចាប់តាំងពីថ្ងៃព្រហស្បតិ៍ ខ្យល់ព្យុះ Alex ក្នុងល្បឿន ១៨០គីឡូម៉ែត្រ ក្នុង១ម៉ោង បានបោកបក់ ភាគខាងជើង ប្រទេសបារាំង និងមួយផ្នែកខាងត្បូងនៃទឹកដីអង់គ្លេស មុននឹងបក់វិលខ្ញាល់ សំដៅ សមុទ្រមេឌីទែរ៉ាណេ ភាគខាងត្បូង ឈៀងខាងកើតប្រទេសបារាំង។ តំបន់ភាគខាងអាគ្នេយ៍ ដែលរួមមានទីក្រុងនីស កាន និងតំបន់ជ្រលងភ្នំ Alpesត្រូវចាត់ចូលក្នុងតំបន់ប្រកាសអាសន្ន ក្រហម កាលពីថ្ងៃសុក្រ។
ទីភ្នាក់ងារឧតុនិយមបារាំង វាយតម្លៃថា ទឹកភ្លៀងធ្លាក់ជោគជាំ ក្នុងរយៈពេលតែ១២ម៉ោង កាលពីថ្ងៃសុក្រម្សិលមិញ មានចំនួនស្មើនឹងទឹកភ្លៀង ធ្លាក់ក្នុងរយៈពេល១ឆ្នាំ។
ទឹកភ្លៀងធ្លាក់ខ្លាំង ហើយនិងទឹកជំនន់ ទឹកស្ទឹង បានហូរផ្តាច់ផ្លូវ និងបាក់ស្ពាន ដែលធ្វើឲ្យភូមិជាច្រើន នៅតំបន់ជួរភ្នំ Alpes ត្រូវកាត់ផ្តាច់ ពិភពខាងក្រៅ និងគ្មានអគ្គិសនី ប្រើប្រាស់។ នៅតាមកន្លែងខ្លះ ទឹកភ្លៀងធ្លាក់ខ្លាំងធ្វើឲ្យកំពស់ទឹកស្ទឹងកើនឡើង បន្ថែម ដល់ទៅ ៧ម៉ែត្រ ដែលជាហេតុជន់លិច ពន្លិច ពាំនាំអស់ផ្ទះជាច្រើនខ្នង។
នៅព្រឹកថ្ងៃសៅរ៍ ឧទ្ធម្ភាគចក្រ របស់ក្រុមជួយសង្រ្គោះបន្ទាន់ បានព្យាយាមហោះក្រវែលពីលើតំបន់រងគ្រោះដោយសារខ្យល់ព្យុះ Alex ដើម្បី ស្វែងរកមនុស្សបាត់ខ្លួន ៨នាក់ ដែលនៅក្នុងនោះ ២នាក់ ជាបុគ្គលិករបស់ក្រុមជួយសង្រ្គោះ។ នាយករដ្ឋមន្រ្តីបារាំង លោកJean Castex បានប្រកាសនៅថ្ងៃនេះថា នឹងធ្វើដំណើរទៅកាន់តំបន់រងគ្រោះមហន្តរាយ បើសិនអាកាសធាតុ អំណោយផល។ ចំណែកប្រធានាធិបតីបារាំង បានសរសេរសារ Twitter កោតសរសើរការងារស្វាហាប់ និងសេចក្តីក្លាហានរបស់អាជ្ញាធរ និងក្រុមជួយសង្រ្គោះបារាំង។
ខ្យល់ព្យុះ ទឹកជំនន់ទឹកភ្លៀង ជាគ្រោះធម្មជាតិដែលតំបន់ភាគខាងត្បូងបារាំងឧស្សាហ៍ជួបប្រទះនៅអំឡុងខែ តុលា និងវិច្ឆិកាចុងឆ្នាំ។ នៅឆ្នាំ ២០១៩ ខ្យល់ព្យុះទឹកភ្លៀង ក្នុងរយៈពេល ២សប្តាហ៍ បានសម្លាប់មនុស្ស ១៤នាក់ នៅភាគអាគ្នេយ៍បារាំង។ ប៉ុន្តែ អ្វីដែលធ្វើឲ្យអាជ្ញាធរបារាំង ភ្ញាក់ផ្អើលលើកនេះ គឺចំនួនទឹកភ្លៀងដ៏ជោគជាំ ហើយនិងកម្លាំង ខ្យល់ព្យុះ ដែលបោកបក់ក្នុងល្បឿន តិចបំផុត ១២០គីឡូម៉ែត្រ ក្នុងមួយម៉ោង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ