ក្រុមហ៊ុនផលិតឱសថបារាំងSanofiប្រកាសថា ខ្លួនមិនអាចផលិតវ៉ាក់សាំងបង្ការកូវីដមុនដាច់ឆ្នាំ ២០២១
ក្រុមហ៊ុនផលិឱសថបារាំង Sanofi បានប្រកាសនៅថ្ងៃសុក្រនេះ ថា វ៉ាក់សាំងដែលក្រុមហ៊ុនស្រាវជ្រាវអភិវឌ្ឍសម្រាប់ប្រឆាំងជំងឺកូវីដ១៩ នឹងមិនអាចផលិតចេញជារូបរាង ទាន់ពេលវេលា តាមកាលកំណត់នោះទេ។ ដំណើរការស្រាវជ្រាវរបស់ក្រុមហ៊ុនត្រូវយឺតយ៉ាវ ដោយសារ តេស្តសាកល្បងលើកទី ១ និងលើកទី២ មិនសូវផ្តល់លទ្ធផល គួរជាទីពេញចិត្ត។ វាជាការខកចិត្ត សម្បើម សម្រាប់ក្រុមហ៊ុនបារាំង ជាពិសេសនៅក្នុងកាលៈទេសៈដែលវ៉ាក់សាំងរបស់ក្រុមហ៊ុនដទៃ ត្រូវបានដាក់ឲ្យប្រើប្រាស់ ជាផ្លូវការ ឬកំពុងទទួលការអនុញ្ញាតពីអាជ្ញាធរ។
ចុះផ្សាយនៅថ្ងៃ៖
ស្តាប់ - ០២:១៨
តាមសេចក្តីប្រកាសរបស់ក្រុមហ៊ុនSanofi កម្មវិធីអភិវឌ្ឍវ៉ាក់សាំងបង្ការកូវីដរបស់ក្រុមហ៊ុនត្រូវយឺតយ៉ាវ ដោយសារថា លទ្ធផលនៃតេស្តសាកល្បង វ៉ាក់សាំង ទៅលើមនុស្ស ក្នុងដំណាក់កាលទី១ និងទី ២ មិនសូវបានល្អ តាមការរំពឹងទុក។ លទ្ធផលបឋមនៃការសិក្សាដំណាក់កាលទី២ បង្ហាញថា ប្រព័ន្ធការពារខ្លួន បានកើនឡើងខ្ពស់ក្នុងចំណោមអ្នកដែលមានអាយុពី ១៨ ទៅ ៤៩ឆ្នាំ។ ប៉ុន្តែ សម្រាប់អ្នកដែលមានវ័យចំណាស់ វ៉ាក់សាំងមិនបានទៅជួយបង្កើន ប្រព័ន្ធការពារ ទប់ទល់នឹងមេរោគកូរ៉ូណានោះទេ។
ដោយសារលទ្ធផលមិនសូវជាទីពេញចិត្ត ក្រុមហ៊ុន Sanofi ត្រូវចាប់ផ្តើមដំណាក់កាលសាកល្បង ទី ២ សាជាថ្មីម្តងទៀត នៅ ខែ កុម្ភៈ ឆ្នាំ ក្រោយ ជាមួយរូបមន្តថ្មី ដែលក្រុមហ៊ុនធ្លាប់បានសាកល្បងដោយជោគជ័យលើសត្វស្វា។ តាមអនុប្រធានក្រុមហ៊ុនSanofi លោក Thomas Triomphe ការធ្វើតេស្តទៅលើសត្វស្វាបានបង្ហាញថា នៅពេលគេចាក់បញ្ចូលមេរោគចូលច្រើន នោះ គេទទួលបានលទ្ធផលល្អខ្ពស់។ បេក្ខជនវ៉ាក់សាំងដែលSanofiកំពុងសិក្សា មានប្រសិទ្ធិភាព ជួយការពារសួត និងកាត់បន្ថយ ចំនួនមេរោគកូរ៉ូណា នៅក្នុងច្រមុះ និងសួត ក្នុងរយៈពេល ពី ទៅ ៤ថ្ងៃ។
សូមបញ្ជាក់ថា ដើម្បីផលិតវ៉ាក់សាំងបង្ការជំងឺកូវីដ ក្រុមហ៊ុនSanofiដោយមានការសហការពីក្រុមហ៊ុនអង់គ្លេស GSK GlaxoSmithKlineបានប្រើបច្ចេកវិទ្យា ទម្លាប់ចាស់ ដែលគេប្រើស្រាប់ ផលិតវ៉ាក់សាំងប្រឆាំងជំងឺផ្តាសាយធំ។
បើសិន ការធ្វើតេស្តសាកល្បងបន្ថែម លើដំណាក់កាលទី ២ បានជោគជ័យ នោះ ក្រុមហ៊ុនSanofiនឹងអាចចាប់ផ្តើមដំណាក់កាលសាកល្បងទី ៣ ដែលជាដំណាក់កាលចុងបញ្ចប់មុននឹងឈានដល់ការផលិតវ៉ាក់សាំង នៅត្រីមាសទី២ ឆ្នាំ ២០២១។ ជាលទ្ធផល Sanofiនឹងអាចផលិតបញ្ចេញ វ៉ាក់សាំងរបស់ខ្លួន បាននៅចុងឆ្នាំ ២០២១ ពោលគឺយឺតអស់៣ ទៅ ៤ខែ បើប្រៀបធៀបនឹងគម្រោងដែលថា Sanofi នឹងផលិតវ៉ាក់សាំង នៅពាក់កណ្តាលឆ្នាំ២០២១។
នៅក្នុងកាលៈទេសៈ ដែល វ៉ាក់សាំងរបស់ក្រុមហ៊ុនអាមេរិកាំង Pfizer ត្រូវដាក់ឲ្យប្រើប្រាស់ ជាផ្លូវការនៅ អង់គ្លេស ចំណែក វ៉ាក់សាំងចំនួន ១៣ផ្សេងទៀត បានឈានចូលដល់ដំណាក់កាលសាកល្បងចុងក្រោយហើយនោះ ភាពយឺតយ៉ាវ របស់ក្រុមហ៊ុនបារាំង Sanofiដែលជាក្រុមហ៊ុនផលិតវ៉ាក់សាំង ធំមួយ នៅក្នុងពិភពលោក គឺជាការអាម៉ាស់ និងអាចប៉ះពាល់ដល់ប្រាក់ចំណេញរបស់ក្រុមហ៊ុន។ Sanofi ផ្ទាល់ធ្លាប់បានចុះកិច្ចសន្យាលក់វ៉ាក់សាំង ៣០០លានដូសដល់សហភាពអឺរ៉ុប។ សម្រាប់ អនុប្រធានក្រុមហ៊ុនSanofi ក្រុមហ៊ុនបានយឺតពេល តែ៣ទៅ ៤ខែប៉ុណ្ណោះ។ ដូច្នេះ ការសម្រេចអ្វីៗ គឺអាស្រ័យទៅលើដៃគូ ដែលថា គេចង់កុម្ម៉ង់ទិញ វ៉ាក់សាំងដែរឬទេ។
ដើម្បី ផលិតចេញបានវ៉ាក់សាំងមួយៗ គេត្រូវថវិកាប្រមាណ ១ពាន់លានដុល្លារ និងរយៈពេលយូរ យ៉ាងតិច ១០ឆ្នាំ។ ប៉ុន្តែ ក្នុងករណីស្រាវជ្រាវរកវ៉ាក់សាំងបង្ការកូវីដ Sanofi បានទទួលថវិកាប្រមាណ ២ពាន់លានដុល្លារ ពីរដ្ឋាភិបាលអាមេរិក សម្រាប់ការស្រាវជ្រាវ និងផលិតវ៉ាក់សាំង ដែលត្រូវផ្តល់ជាអាទិភាពដល់ពលរដ្ឋអាមេរិកាំង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ