ទីភ្នាក់ងារថាមពលអន្តរជាតិព្យាករណ៍ពីកំណើនតម្រូវការអគ្គិសនីតិចតួចនៅឆ្នាំ ២០២១
នៅថ្ងៃចន្ទ ទី១៤ ធ្នូ ទីភ្នាក់ងារថាមពលអន្តរជាតិបានចេញផ្សាយរបាយការណ៍មួយស្តីពីស្ថានភាពទីផ្សារអគ្គិសនីក្នុងលោក។ របាយការណ៍បានបញ្ជាក់ពីតម្រូវការអគ្គិសនីធ្លាក់ចុះយ៉ាងគំហុកជាប្រវត្តិសាស្រ្តក្នុងឆ្នាំ ២០២០ ដោយសារវិបត្តិសេដ្ឋកិច្ចដែលបង្កឡើងដោយជំងឺកូវីដ១៩។ តែនៅឆ្នាំ ២០២១ ខាងមុខ តម្រូវការអគ្គិសនីក៏នឹងមិនកើនឡើងខ្លាំងដែរ។
ចុះផ្សាយនៅថ្ងៃ៖
ស្តាប់ - ០២:២៩
វិបត្តិសេដ្ឋកិច្ចដែលបង្កឡើងដោយវិបត្តិកូវីដ១៩ បានធ្វើឲ្យតម្រូវការអគ្គិសនីលើពិភពលោកក្នុងឆ្នាំ ២០២០ ធ្លាក់ចុះចំនួន ២% នេះបើតាមរបាយការណ៍របស់ទីភ្នាក់ងារថាមពលអន្តរជាតិហៅកាត់ជាភាសាបារាំង AIE។ តែជាការធ្លាក់ចុះមួយដែលមានអត្រាទាបជាងការព្យាករណ៍កាលពីនិទាឃរដូវកន្លងទៅ។ យ៉ាងណាក៏ដោយ និងបើយោងតាមរបាយការណ៍របស់ AIE ដដែល ការធ្លាក់ចុះតម្រូវការអគ្កិសនីដល់ទៅ ២% ក្នុងឆ្នាំ ២០២០ នេះជាព្រឹត្តិការណ៍មួយដែលមិនធ្លាប់ឃើញតាំងពីពាក់កណ្តាលសតវត្សទី២០។
ជាការប្រៀបធៀប តម្រូវការអគ្គិសនីបានធ្លាក់ចុះប្រមាណតែ ០,៦% ប៉ុណ្ណោះក្នុងឆ្នាំ ២០០៩ ដែលពិភពលោកបានធ្លាក់ក្នុងវិបត្តិហិរញ្ញវត្ថុ។ ទោះជាយ៉ាងនេះក្តី ចិននៅជាប្រទេសដែលបន្តត្រូវការអគ្គិសនីក្នុងឆ្នាំ ២០២០ ជាមួយនឹងកំណើន ២%។ តែអត្រានេះទាបខ្លាំង បើធៀបនឹងប៉ុន្មានឆ្នាំចុងក្រោយនៅមុនផ្ទុះវិបត្តិកូវីដ១៩។ សម្រាប់ឆ្នាំ ២០២១ និងជាមួយនឹងការងើបឡើងវិញនូវសេដ្ឋកិច្ចសកល ពិសេសសន្ទុះកំណើ់នសេដ្ឋកិច្ចក្នុងប្រទេសចិន និងឥណ្ឌា របាយការណ៍របស់ AIE បានព្យាករណ៍ពីកំណើនតម្រូវការអគ្គិសនីក្នុងលោកប្រមាណជា ៣%។
តែអត្រាកំណើន ៣% នេះនៅមានកម្រិតតិចតួច បើធៀបនៅក្រោយវិបត្តិហិរញ្ញវត្ថុសកលក្នុងឆ្នាំ ២០១០ ដែលតម្រូវការអគ្គិសនីបានហាក់ឡើងដល់ទៅ ៧,២%។ ក្រៅពីចាប់អារម្មណ៍លើស្ថានភាពទីផ្សារអគ្គិសនីក្នុងលោក របាយការណ៍របស់ទីភ្នាក់ងារថាមពលអន្តរជាតិក៏បានចាប់អារម្មណ៍ពីប្រភពអគ្គិសនីដែរ។ សម្រាប់ឆ្នាំ ២០២១ AIE បានព្យាករណ៍ពីកំណើនថាមពលកកើតឡើងវិញទន្ទឹមគ្នានឹងកំណើននៃការប្រើធ្យូងថ្មដើម្បីផលិតអគ្គិសនី។
AIE បានកត់សម្គាល់ឃើញថា ថាមពលកកើតឡើងវិញ និងថាមពលបានមកពីនុយក្លេអ៊ែរ គឺមិនគ្រប់គ្រាន់ដើម្បីបំពេញតម្រូវការអគ្គិសនីរបស់ក្រុមប្រទេសដែលមានសេដ្ឋកិច្ចរីកលូតលាស់ខ្លាំង និងប្រទេសកំពុងអភិវឌ្ឍទេ។ នេះស បញ្ជាក់ឲ្យឃើញពីតម្រូវការធ្យូងថ្ម និងឧស្ម័នហ្កាស់ដើម្បីផលិតអគ្គិសនី។ ត្រង់ចំណុចនេះត្រូវបាន AIE ប្រមើលមើលពីកំណើនឧស្ម័នកាបូនិចនៅក្នុងបរិយាកាសប្រមាណជា ២% នៅឆ្នាំ ២០២១ បន្ទាប់ពីបានធ្លាក់ចុះប្រមាណជា ៥% ក្នុងឆ្នាំ ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ