តើកូរ៉ូណាវីរុស ផ្លាស់ប្តូររូបរាងថ្មីនឹងអាចប៉ះពាល់ដល់ប្រសិទ្ធិភាពរបស់វ៉ាក់សាំងដែរឬទេ?
ខណៈពេលដែអង់គ្លេសកំពុងបើកយុទ្ធនាការចាក់វ៉ាក់សាំងបង្ការ ជំងឺកូវីដ១៩ អ្នកជំនាញសុខភាពអង់គ្លេសបានកត់សំគាល់ រកឃើញ មេរោគកូរ៉ូណាផ្លាស់ប្តូរ រូបរាងក្នុងចំណោមអ្នកជំងឺអង់គ្លេសប្រមាណ ១ ០០០នាក់។ អង់គ្លេសបានជូនដំណឹងនេះរួចរាល់ហើយ ទៅ អង្គការសុខភាពពិភពលោក។ អង្គការសុខភាពពិភពលោកដែលទើបបានប្រកាសកាលពី ថ្ងៃពុធថា នឹងបញ្ជូនអ្នកជំនាញ អន្តរជាតិទៅទីក្រុងវូហាន ប្រទេសចិន នៅខែមករា ដើមឆ្នាំក្រោយ ដើម្បី ឲ្យទៅស្រាវជ្រាវ ស៊ើបអង្កេតរកប្រភពដើមដំបូងនៃជំងឺកូវីដ ១៩។
ចុះផ្សាយនៅថ្ងៃ៖
ស្តាប់ - ០២:២៥
នៅប្រទេសអង់គ្លេស រដ្ឋមន្រ្តីក្រសួងសុខាភិបាលបានជូនដំណឹង ទៅអង្គការសុខភាពពិភពលោក នៅ សប្តាហ៍នេះ ពីការរកឃើញករណីបំផ្លែងខ្លួន របស់មេរោគកូរ៉ូណា ក្នុងខ្លួនរបស់អ្នកជំងឺអង់គ្លេស ១ពាន់នាក់។ ការបំផ្លែង ផ្លាស់ប្តូរទម្រង់ដើម ជារឿងធម្មតា ដែលធ្លាប់កើតមានជាញឹកញយ នៅក្នុងដំណើរការវិវឌ្ឍរបស់មេរោគ។ ចាប់តាំងពីផ្ទុះជំងឺកូវីដ ១៩នៅទីក្រុងវូហាន កូរ៉ូណាវីរុសបានបំផ្លែងខ្លួន ខុសៗគ្នា ក្នុងចំនួន ១២០០០។ នៅខែវិច្ឆិកាកន្លងទៅ អាជ្ញាធរដាណឺម៉ាក បានបញ្ជាឲ្យគេសម្លាប់សត្វសំពោចចិញ្ចឹម ១៥លានក្បាល នៅក្រោយរកឃើញថា មេរោគកូរ៉ូណាដែលឆ្លងចេញពី សត្វសំពោចទៅ មនុស្ស បានផ្លាស់ប្តូររូបរាងថ្មី។
នៅក្នុងករណីអង់គ្លេស អាជ្ញាធរកំពុងសង្ស័យថា មេរោគកូរ៉ូណា ដែលផ្លាស់ប្តូររូបរាងថ្មីនេះ អាចឆ្លងលឿន ជាងមេរោគចាស់ ព្រោះថា នៅ មួយរយៈចុងក្រោយនេះ ករណី ឆ្លងជំងឺកូវីដ នៅអង់គ្លេស បានកើនឡើងលឿនខ្ពស់។ អ្នកជំនាញសុខភាពអង់គ្លេសកំពុងតាមដានផងដែរថា តើមេរោគកូរ៉ូណា ដែលបំផ្លែងខ្លួន ថ្មីនឹងអាចប៉ះពាល់ទៅដល់ប្រសិទ្ធិភាពរបស់វ៉ាក់សាំង បង្ការកូវីដ ដូចជាវ៉ាក់សាំងរបស់ក្រុមហ៊ុន Pfizer ឬModerna ដែរឬទេ។
សូមបញ្ជាក់ថា ដើម្បីផលិតវ៉ាក់សាំង ប្រឆាំងជំងឺកូវីដ អ្នកជំនាញបានពឹងផ្អែក ច្រើនលើព័ត៌មានស្តីពីប្រូតេអ៊ីន Spike ដែលមេរោគកូរ៉ូណាប្រើជាគន្លឹះសំខាន់ សម្រាប់ពង្រីករាលដាលក្នុងខ្លួនមនុស្ស។ អ្នកជំនាញសុខភាពអង់គ្លេសកំពុងសិក្សាតាមដានបន្តមើលថា បើប្រូតេអ៊ីន Spike បំផ្លែងខ្លួន តើវានឹងអាចប៉ះពាល់ ដល់វ៉ាក់សាំង ក៏ដូចជាល្បឿននៃការឆ្លងរាលដាលរបស់មេរោគថ្មីដែរឬទេ។
នៅពេលអាជ្ញាធរអង់គ្លេសកំពុងតាមដានពីផលប៉ះពាល់នៃការបំផ្លែងខ្លួនរបស់មេរោគកូរ៉ូណាថ្មី អង្គការសុខភាពពិភពលោក កាលពីថ្ងៃពុធបានបញ្ជាក់ពីការចាប់ផ្តើមការស៊ើបអង្កេតជាផ្លូវការទៅលើប្រភពដើមដំបូងរបស់កូរ៉ូណាវីរុស នៅទីក្រុងវូហានប្រទេសចិន។ តាមអ្នកនាំពាក្យរបស់អង្គការសុខភាពពិភពលោក ក្រុមវិទ្យាសាស្រ្តអន្តរជាតិ ១០នាក់ មកពី ១០ប្រទេស ដូចជា អង់គ្លេស អាមេរិក ដាណឺម៉ាក អូស្ត្រាលី វៀតណាម អាល្លឺម៉ង់ កាណាដា និងជប៉ុនជាដើម នឹងធ្វើដំណើរទៅទីក្រុងវូហាន នៅខែមករាខាងមុខ។ នៅចុងខែតុលា អ្នកជំនាញចិន ធ្លាប់បានប្រជុំតាមសន្និសីទវីដេអូ ជាមួយ ក្រុមអ្នកវិទ្យាសាស្រ្ត អន្តរជាតិ ប៉ុន្តែ មិនកំណត់ថ្ងៃចុះធ្វើបេសកកម្មនៅចិននោះទេ។ អាមេរិកដែលមានអ្នកឆ្លង និងស្លាប់ច្រើនជាងគេនៅក្នុងពិភពលោក ធ្លាប់បានចោទប្រកាន់ ចិនថា បានព្យាយាមលាក់បាំង ការពិត និងពន្យារពេល មិនឲ្យអ្នកជំនាញអន្តរជាតិ ចូលទៅ ស៊ើបអង្កេតរកប្រភពដើមនៃមេរោគកូរ៉ូណា ដែលផ្ទុះកើតចេញ ដំបូងពីផ្សារលក់សាច់ព្រៃ នៅទីក្រុងវូហាន។
បេសកកម្មរបស់អ្នកវិទ្យាសាស្រ្តអន្តរជាតិ មានគោលដៅ រកប្រភពដំបូងនៃ មេរោគកូរ៉ូណា និងដើម្បីចង់ដឹងថា តើមេរោគកូរ៉ូណាអាចឆ្លងមកមនុស្សបានយ៉ាងម៉េច។ អ្នកវិទ្យាសាស្រ្តគិតថា សត្វប្រជៀវជាអ្នកផ្ទុកមេរោគកូរ៉ូណា ប៉ុន្តែ គេនៅតែមិនទាន់ដឹងច្បាស់ថា តើសត្វណាមួយ ដែលអាចចម្លងមេរោគកូរ៉ូណា មកមនុស្ស។ សម្រាប់អង្គការសុខភាពពិភពលោក គោលដៅស៊ើបអង្កេតរបស់អ្នកវិទ្យាសាស្រ្ត គឺរកប្រភព និងដើម្បីជៀសវាងការឆ្លងមេរោគរាតត្បាត បែបនេះ ទៅថ្ងៃអនាគត ពោលគឺមានចេតនាដើម្បីរករឿងស្តីបន្ទោសភាគីណាមួយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ