កូវីដ១៩បំប្លែងខ្លួនកំពុងបន្តបំភ័យអឺរ៉ុបដែលមានអ្នកឆ្លងឡើងដល់២៥លាននាក់
អឺរ៉ុបជាទ្វីបដែលមានចំនួនអ្នកឆ្លងជំងឺកូវីដ១៩ ច្រើនជាងគេបង្អស់នៅលើពិភពលោក ដោយរាប់ឃើញមានចំនួនកើនឡើងដល់ជាង២៥លាននាក់។ ចំនួនអ្នកឆ្លងថ្មីបន្តកើនឡើងកាន់តែលឿន មេរោគជាភ្នាក់ងារបង្កជំងឺកូវីដ១៩ចេះបំប្លែងខ្លួនទៀត ប៉ុន្តែយុទ្ធនាការចាក់ថ្នាំបង្ការ នៅក្នុងរង្វង់សហភាពអឺរ៉ុប អាចនឹងចាប់ផ្តើម នៅថ្ងៃអាទិត្យទី ២៧ ធ្នូ ២០២០នេះតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១៧
បើនិយាយសរុបជាទូទៅ ទ្វីបអឺរ៉ុប ដែលមាន៥២ប្រទេស ដោយរាប់បញ្ចូលទាំងប្រទេសរុស្ស៊ី និងអាហ្សែបៃហ្សង់ជាប់របងអាស៊ីបំផុតផង បានក្លាយជាតំបន់ដែលរងគ្រោះដោយកូវីដ១៩ខ្លាំងជាងគេបំផុតនៅលើពិភពលោក។ ចំនួនអ្នកឆ្លងកូវីដ១៩បានឡើងដល់ជាង២៥លាននាក់នៅទ្វីបអឺរ៉ុប ទល់នឹងជាង១៩លាននាក់នៅទ្វីបអាមេរិក (សហរដ្ឋអាមេរិកនិងកាណាដា) ជាង១៥លាននាក់នៅតំបន់អាមេរិកឡាទីន/ប្រជុំកោះការ៉ាអ៊ីប និងជាង១៣លានប៉ុណ្ណោះនៅទ្វីបអាស៊ី។ នេះបើតាមតួលេខរបស់ភ្នាក់ងារសារព័ត៌មានបារាំង AFPចេញផ្សាយនៅថ្ងៃសុក្រទី២៥ធ្នូ២០២០ ដោយបានបញ្ជាក់ទៀតថា គិតត្រឹមថ្ងៃ១៧ធ្នូ អឺរ៉ុបមានអ្នកស្លាប់ដល់ទៅជាងកន្លះលាននាក់ ក្នុងចំណោមអ្នកស្លាប់សរុបទូទាំងពិភពលោកជាង១លាន៧សែននាក់។
បើតាមអ្នកស្រាវជ្រាវអង់គ្លេសនៃវិទ្យាស្ថាន London School of Hygiene and Tropical Medicine (LSHTM) ប្រសិនបើគ្មានវិធានការតឹងតែងទេ ចំនួនអ្នកជំងឺត្រូវចូលព្យាបាលនៅមន្ទីរពេទ្យ និងស្លាប់ នៅឆ្នាំ២០២១ អាចនឹងមានចំនួនច្រើនជាងឆ្នាំ២០២០ទៅទៀត ព្រោះមេរោគបំប្លែងកូវីដ១៩ លេចឡើងនៅប្រទេសអង់គ្លេសពិតជាមានអំណាចចម្លងខ្លាំងប្រមាណពី៥០%ទៅ៧៤%ជាង Sars-Cov-2 មេរោគកូវីដដើមមែន។ លទ្ធផលនៃការសិក្សាបានចេញផ្សាយតាមអ៊ីនធ័រនែតរួចហើយ គ្រាន់តែមិនទាន់ត្រូវបានអនុម័តដោយក្រុមអ្នកវិទ្យាសាស្ត្រតែប៉ុណ្ណោះ។ ម្យ៉ាងវិញទៀត មេរោគកូវីដ១៩បំប្លែងខ្លួនបានឆ្លងមកដល់ប្រទេសអាល្លឺម៉ង់មួយករណី ដល់ប្រទេសលីបង់មួយករណី តាមរយៈអ្នកដំណើរមកពីអង់គ្លេស។
តែសំណាងល្អ ថ្នាំបង្ការប្រឆាំងកូវីដ១៩បានមកដល់។ យុទ្ធនាការចាក់ថ្នាំវ៉ាក់សាំងបានលឿនកាលណា គេអាចកាត់បន្ថយហានិភ័យសុខភាពបានកាន់តែច្រើន។
“មនុស្សជាតិបានប្រឹងលះបង់ច្រើនណាស់ក្នុងឆ្នាំ២០២០នេះ ដើម្បីការពារសុខភាពនិងជីវិត ដូច្នេះសូមប្រឹងបន្តិចទៀត កុំធ្វើឱ្យការលះបង់មួយឆ្នាំមកនេះក្លាយទៅជាអត់ប្រយោជន៍វិញ។ ក្តីសង្ឃឹមចាប់មានពន្លឺហើយ ថ្នាំបង្ការនឹងជួយពិភពលោកឱ្យចេញផុតពីសោកដនាកម្ម ប៉ុន្តែគេត្រូវការប្រើពេលវេលាទម្រាំគ្រប់គ្នាបានទទួលថ្នាំការពារ” នេះជាសារណូអែលរបស់លោក តេដ្រូស អាដាណុម ហ្គេប្រេយេស៊ូស នាយកអង្គការសុខភាពពិភពលោក។ បើតាមអង្គការសុខភាពពិភពលោក មានថ្នាំវ៉ាក់សាំងប្រឆាំងកូវីដ១៩ចំនួន ៦១ កំពុងស្ថិតក្នុងដំណាក់កាលសាកល្បងលើមនុស្ស ក្នុងនោះ១៦ឈានដល់ដំណាក់កាលចុងក្រោយ។ ១៧២ផ្សេងទៀតកំពុងសិក្សាដោយមន្ទីរពិសោធន៍ផ្សេងៗនៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ