ទោះមានបាតុភូត La Nina ឆ្នាំ២០២០នៅតែជាឆ្នាំ ដែលផែនដីមានអាកាសធាតុក្តៅខ្លាំងបំផុត ដូចឆ្នាំ ២០១៦
ឆ្នាំ២០២០បានចូលរួមជាមួយឆ្នាំ ២០១៦ និងឆ្នាំ ២០១៩ ក្នុងនាមជាឆ្នាំ ដែលក្តៅបំផុត នៅក្នុងប្រវត្តិសាស្រ្តមនុស្សលោក។ ដូចឆ្នាំ ២០១៦ កំដៅលើផែនដី នៅ ឆ្នាំ ២០២០ បានកើនឡើង ១,២៥អង្សា។ ប៉ុន្តែ ខុសផ្ទុយពីឆ្នាំ ២០១៦ ដែលមានបាតុភូត El Nino ជួយជំរុញផែនដីឲ្យឡើងកំដៅ នៅឆ្នាំ ២០២០ កន្លងទៅ ផែនដីនៅតែឡើងកំដៅដដែល បើទោះបី ជាមានបាតុភូត La Nina ជួយធ្វើឲ្យអាកាសធាតុចុះត្រជាក់ក៏ដោយ។ សម្រាប់បណ្តាញ អឺរ៉ុប Copernicusដែលធ្វើការតាមដានការប្រែប្រួលអាកាសធាតុ ការណ៍នេះ សបញ្ជាក់ឲ្យឃើញថា គេត្រូវប្រញាប់ចាត់វិធានការបន្ទាន់ ដើម្បីជួយប្រយុទ្ធប្រឆាំងនឹងការឡើងកំដៅលើផែនដី។
ចុះផ្សាយនៅថ្ងៃ៖
ស្តាប់ - ០២:៣៤
នៅក្នុងរបាយការណ៍ ចេញផ្សាយ នៅដើមខែធ្នូ កន្លងទៅ អង្គការឧតុនិយមអន្តរជាតិ ដែលជាស្ថាប័នរបស់អង្គការសហប្រជាជាតិ ធ្លាប់បានចេញ សេចក្តី សន្និដ្ឋានហើយថា ឆ្នាំ ២០២០ ស្ថិតក្នុងចំណាត់ថ្នាក់ឆ្នាំ ដែលផែនដីមានអាកាសធាតុក្តៅខ្លាំង ដូចឆ្នាំ ២០១៦ និងឆ្នាំ ២០១៩។ ប៉ុន្តែ អ្វីដែលបណ្តាញ អឺរ៉ុប Copernicusដែលតាមដានការប្រែប្រួលអាកាសធាតុ បានកត់សំគាល់ឃើញថ្មី គឺ ឆ្នាំ ២០២០ ផែនដី នៅតែមានអាកាសធាតុក្តៅខ្លាំងដូច ជាឆ្នាំ ២០១៦ បើទោះបីមាន បាតុភូត La Nina ជួយធ្វើឲ្យអាកាសធាតុចុះត្រជាក់។
គេវាយតម្លៃថា នៅឆ្នាំ ២០១៦ ឆ្នាំ ដែលផែនដីមានអាកាសធាតុក្តៅខ្លាំង មិនធ្លាប់មាន គឺធ្លាប់កើតមាន បាតុភូត El Nino ដែលគេវាយតម្លៃថា បានជួយបន្ថែម ធ្វើឲ្យកំដៅ លើផែនដី កើនឡើង ០,១ ឬ ០,២អង្សា។ ដូច្នេះ គេអាចនិយាយបានថា បើសិន ជាគ្មានបាតុភូត ធម្មជាតិ ទាំងពីរ El Nino និងLa Nina ទេ កំដៅនៅលើផែនដី នៅ ឆ្នាំ ២០២០ គឺក្តៅ ជាងឆ្នាំណាៗទាំងអស់។ ផែនដីឡើងកម្តៅ ខ្លាំង នៅឆ្នាំ ២០២០ អាចបណ្តាលជាលទ្ធផលនៃការឡើងកំដៅ បន្តិចម្តងៗ នៅប៉ុន្មានទសវត្សរ៍ ចុងក្រោយនេះ។ បើតាមការបញ្ជាក់របស់អ្នកជំនាញ អាកាសធាតុ នៃវិទ្យាស្ថាន Breakthrough ចាប់តាំងពីឆ្នាំ ១៩៧៩ ផែនដីឡើងកំដៅ ប្រមាណ ០,២អង្សា ក្នុងមួយទសវត្សរ៍។
នៅទឹកដី អឺរ៉ុបដែលរងគ្រោះដោយសាររលកកំដៅ មិនធ្លាប់មាននៅឆ្នាំ ២០២០ សីតុណ្ហភាព បានកើនឡើងប្រមាណ ០,៤អង្សា បើប្រៀបធៀបនឹងឆ្នាំ ២០១៩ ឬ ២,២អង្សារ បើប្រៀបធៀបនឹងរយៈពេល បុរេឧស្សាហកម្ម។
សម្រាប់ប្រធានបណ្តាញ អឺរ៉ុប Copernicusដែលតាមដានការប្រែប្រួលអាកាសធាតុ វាមិនមែនជារឿងភ្ញាក់ផ្អើលទេ ដែលផែនដីឡើងកម្តៅកាន់តែ ខ្លាំង នៅ ប៉ុន្មានទសវត្សរ៍ចុងក្រោយនេះ។ វាក៏ជាសញ្ញាដាស់តឿនផងដែរ ឲ្យគេចាត់វិធានការបន្ទាន់ និងសំខាន់បំផុត ក្នុងការ កាត់បន្ថយ ការបញ្ចេញឧស្ម័នកាបូនិក ដើម្បីទប់ស្កាត់គ្រោះមហន្តរាយ ដែលជាលទ្ធផលនៃការប្រែប្រួលអាកាសធាតុ។
កិច្ចព្រមព្រៀងអាកាសធាតុក្រុងប៉ារីសឆ្នាំ២០១៥ បានកំណត់នូវគោលដៅរួមមួយ គឺត្រូវធ្វើយ៉ាងណាទប់ស្កាត់កុំឲ្យសីតុណ្ហភាពមធ្យមលើភពផែនដីរបស់យើងកើនឡើង លើសពី ២អង្សា ឬបើអាចធ្វើទៅរួច កម្រិតឲ្យបានត្រឹមយ៉ាងច្រើន ១,៥អង្សា។ ប៉ុន្តែ នៅពេលកំដៅ នៅលើផែនដី កើនឡើង ប្រមាណ ១,១អង្សា មនុស្សលើផែនដីបានជួបរងគ្រោះ បណ្តើរៗរួចទៅហើយ ដោយសារការប្រែប្រួលអាកាសធាតុ ដែលមានតាំងពីគ្រោះមហន្តរាយធម្មជាតិ ទឹកភ្លៀង ទឹកជំនន់ ព្យុះ សង្ឃរានៅតំបន់ការ៉ាអ៊ីប ភាពរាំងស្ងួត ភ្លើងឆេះព្រៃនៅ តំបន់ស៊ីបេរី និងនៅរដ្ឋកាលីហ្វ័នី ដោយសារអាកាសធាតុ ក្តៅខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ