ឧត្តមស្នងការសិទ្ធិមនុស្សអន្តរជាតិទាមទារឲ្យដាក់ទណ្ឌកម្មលើឧក្រិដ្ឋជនសង្រ្គាមក្នុងប្រទេសស្រីលង្កា
លោកស្រីមីស្ហែល បាស្ហឺឡេ ឧត្តមស្នងការសិទ្ធិមនុស្សអន្តរជាតិស្នើឲ្យមានការស៊ើបអង្កេតពីតុលាការព្រហ្មទណ្ឌអន្តរជាតិលើជម្លោះរវាងចលនាឧទ្ទាមផ្តាច់ទឹកដីនិយមតាមូល និងរដ្ឋាភិបាលក្នុងប្រទេសស្រីលង្កា។ សំណើនេះបានធ្វើឡើងនៅក្នុងរបាយការណ៍មួយកម្រាស់ ១៧ទំព័រដែល AFP ទទួលបាននៅមុនឧត្តមស្នងការដ្ឋានសិទ្ធិមនុស្សអន្តរជាតិផ្សព្វផ្សាយជាសាធារណៈ។ នៅក្នុងរបាយការណ៍ដដែល លោកស្រីបាស្ហឺឡេបានទាមទារឲ្យមានការដាក់ទណ្ឌកម្មលើក្រុមជនជាប់ចោទក្នុងបទឧក្រិដ្ឋកម្មសង្រ្គាមដែលស្ថិតក្នុងជួរកងទ័ព និងនៅខាងចលនាឧទ្ទាមតាមូល។
ចុះផ្សាយនៅថ្ងៃ៖
ស្តាប់ - ០២:៥២
នៅក្នុងប្រទេសស្រីលង្កា សង្រ្គាមរវាងរដ្ឋាភិបាល និងចលនាឧទ្ទាមផ្តាច់ទឹកដីនិយមតាមូលមានរយៈពេល ៣៧ឆ្នាំ និងបានបណ្តាលឲ្យមានមនុស្សស្លាប់ជាង ១០០ ០០០នាក់។ គឺទើបនៅជាង ១០ឆ្នាំមុននេះទេ ពោលក្នុងខែឧសភា ឆ្នាំ ២០០៩ ដែលជម្លោះមួយនេះបានបិទបញ្ចប់។ តែនៅប៉ុន្មានខែមុនការបិទបញ្ចប់ មានការប្រយុទ្ធគ្នាយ៉ាងបង្ហូរឈាមរវាងភាគីទាំងពីរ ពិសេសការសម្លាប់រង្គាលលើពួកឧទ្ទាមតាមូល និងជនស៊ីវិលតាមូលពីសំណាក់កងទ័ពរដ្ឋាភិបាលជំនាន់នោះ។ គឺនៅត្រង់ចំណុចនេះហើយដែលលោកស្រីបាស្ហឺឡេចង់ឲ្យមានការស៊ើបអង្កេតពីតុលាការព្រហ្មទណ្ឌអន្តរជាតិ។ កម្មវត្ថុដែលលោកស្រីបាស្ហឺឡេចង់បាន គឺអូស ក ក្រុមជនជាប់ចោទក្នុងបទឧក្រិដ្ឋកម្មសង្រ្គាមទៅកាត់ទោស ទោះជាស្ថិតក្នុងជួរកងទ័ព ឬក្នុងចលនាឧទ្ទាមតាមូល។
តាមក្រុមអង្គការការពារសិទ្ធិមនុស្ស មានជនស៊ីវិលតាមូលយ៉ាងតិច ៤០ ០០០នាក់ត្រូវបានទ័ពរដ្ឋាភិបាលសម្លាប់នៅប៉ុន្មានខែមុនសង្រ្គាមបិទបញ្ចប់។ តែតួលេខនេះត្រូវបានរដ្ឋាភិបាលស្រីលង្កាច្រានចោល។ របាយការណ៍ជាច្រើនរបស់អង្គការសហប្រជាជាតិធ្លាប់បានចោទទ័ពរដ្ឋាភិបាលស្រីលង្កាពីបទទទួលខុសត្រូវលើការបាត់ខ្លួនប្រជាជនតាមូលជាច្រើនពាន់នាក់ ទម្លាក់គ្រាប់បែកលើតំបន់តាមូលគ្រប់ទីកន្លែង វាយប្រហារលើមន្ទីរពេទ្យ និងសម្លាប់ពួកឧទ្ទាមតាមូលដែលបានចុះចូល។ គួររម្លឹកថានៅក្រោយបិទបញ្ចប់សង្រ្គាម រដ្ឋាភិបាលស្រីលង្កាជំនាន់នោះបានសន្យាពីការផ្សះផ្សាជាតិ និងវែកមុខរកជនដៃដល់ទៅកាត់ទោស។ តែពាក្យសន្យានេះមានតែនៅលើក្រដាស។
បន្ទាប់មក លោកហ្គោតាបាយ៉ា រ៉ាយ៉ាប៉ាក់សាដែលបានជាប់ឆ្នោតប្រធានាធិបតីក្នុងឆ្នាំ ២០១៩ បានលុបចោលការសន្យាមួយចំនួនរបស់រដ្ឋាភិបាលមុន និងសន្យាមិនតាមកាត់ទោសទាហានដែលបានសម្លាប់ពួកឧទ្ទាមតាមូលទេ។ គួរបញ្ជាក់ថា លោករ៉ាយ៉ាប៉ាក់សាជាអតីតអ្នកទទួលខុសត្រូវជាន់ខ្ពស់ម្នាក់នៃក្រសួងការពារជាតិក្នុងរដ្ឋាភិបាលចាស់ដែលបានវាយឈ្នះពួកឧទ្ទាមតាមូល។ នៅក្នុងរបាយការណ៍ លោកស្រីបាស្ហឺឡេបានស្នើជាលើកទី១ ឲ្យមានការបញ្ជូនសំណុំរឿងស្រីលង្កាទៅកាន់តុលាការព្រហ្មទណ្ឌអន្តរជាតិ និងអំពាវនាវឲ្យមានវិធានការប្រឆាំងនឹងឧក្រិដ្ឋជនសង្រ្គាមដោយរាប់បញ្ចូលពួកឧទ្ទាមតាមូលផង។
ទន្ទឹមគ្នានេះ លោកស្រីបាស្ហឺឡេក៏បានស្នើឲ្យមានទណ្ឌកម្មផ្ទាំងស៊ីបដូចជាការបង្កកទ្រព្យសម្បត្តិ ឬការហាមមិនឲ្យធ្វើដំណើរឆ្លងដែនរបស់ក្រុមជនជាប់សង្ស័យក្នុងរឿងរំលោភសិទ្ធិមនុស្ស។ សូមបញ្ជាក់ថា ស្រីលង្កាមិនមែនជាសមាជិករបស់តុលាការព្រហ្មទណ្ឌអន្តរជាតិទេ។ តែលោកស្រីបាស្ហឺឡេបានអះអាងថា បើរដ្ឋសមាជិកមិនអាចបញ្ចូនរដ្ឋមិនសមាជិកទៅកាន់តុលាការព្រហ្មទណ្ឌអន្តរជាតិបាន អង្គការសហប្រជាជាតិមានសិទ្ធិពេញទីដើម្បីធ្វើកិច្ចការនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ