សង្រ្គាមពាក្យសម្តីកំពុងបន្តមានយ៉ាងផុសផុលរវាងអង់គ្លេស និងចិនជុំវិញដែនដីហុងកុង
ចាប់ពីថ្ងៃអាទិត្យ ទី៣១ មករាទៅ ពលរដ្ឋហុងកុងដែលកាន់លិខិតឆ្លងដែនអង់គ្លេសនៅឯនាយសមុទ្រ (British National Overseas) ឬហៅកាត់ BNO មានសិទ្ធិសុំទិដ្ឋាការថ្មីដើម្បីអាចរស់នៅ និងធ្វើការក្នុងប្រទេសអង់គ្លេសសម្រាប់រយៈពេល ៥ឆ្នាំ។ បន្ទាប់ពីបានរស់នៅ និងធ្វើការ ពលរដ្ឋហុងកុងទាំងនេះក៏មានសិទ្ធិសុំចូលសញ្ជាតិអង់គ្លេសបានដែរ។ វិធានការថ្មីរបស់អង់គ្លេសនេះបានធ្វើឡើងដើម្បីឆ្លើយតបនឹងប្រទេសចិនដែលបានដាក់ច្បាប់សន្តិសុខជាតិរឹតបន្តឹងសេរីភាពលើហុងកុងកាលពីឆ្នាំ ២០២០។ ចិនតាមរយៈកាសែតផ្លូវការស៊ីនហួរបានចោទអង់គ្លេសពីបទមានចិត្តគំនិតអាណានិគមនិយម និងព្រមានថា វិធានការរបស់អង់គ្លេសនឹងធ្វើឲ្យប៉ះពាល់ធ្ងន់ធ្ងរដល់ទំនាក់ទំនងទ្វេភាគី និងផលប្រយោជន៍របស់អង់គ្លេសសម្រាប់រយៈពេលយូរ។ ក្នុងចំណោមពលរដ្ឋហុងកុងទាំង ៧លាន ៥សែននាក់ មានជាង ៥លាននាក់មានសិទ្ធិទទួលបានលិខិតឆ្លងដែនអង់គ្លេស BNO និងទិដ្ឋាការថ្មី។ តែអ្វីដែលស្ថាបនិកអង្គការក្រៅរដ្ឋាភិបាល Hong Kong Watch លោក Benedict Rogers បារម្ភ និងចោទជាសំណួរនោះគឺថា បើមានការដាក់ពាក្យសុំពីពលរដ្ឋហុងកុងយ៉ាងច្រើនសម្បើម តើរដ្ឋាភិបាលអង់គ្លេសបានត្រៀមខ្លួនរួចហើយឬនៅដើម្បីទទួលពួកគេ?។
ចុះផ្សាយនៅថ្ងៃ៖
ស្តាប់ - ០១:៣៤
« គេបាននិយាយថាមានមនុស្សយ៉ាងច្រើនសម្បើមនឹងដាក់ពាក្យសុំលិខិតឆ្លងដែនអង់គ្លេស BNO។ វាច្បាស់ណាស់ថា រដ្ឋាភិបាលអង់គ្លេសបានផ្តួចផ្តើមគំនិតនេះឡើង ហើយនេះជានយោបាយដែលទីក្រុងឡុងដ៏នឹងមិនដកថយវិញឡើយ។ សម្រាប់ខ្ញុំ បញ្ហាប្រឈម និងចំណោតដែលខ្ញុំបានមើលឃើញពេលនេះគឺថា អ្វីដែលរដ្ឋាភិបាលអង់គ្លេសកំពុងធ្វើពេលនេះហាក់មិនបានគិតគូរពិចារណាឲ្យបានម៉ត់ចត់លើអ្វីដែលនឹងអាចកើតមាននៅពេលបន្ទាប់។
ទោះបីថាមានពលរដ្ឋហុងកុង ១០០ ០០០នាក់ ២លាននាក់ ឬ ៣លាននាក់ទៅដល់ទឹកដីអង់គ្លេសក៏ដោយមិនសំខាន់ទេ។ សំខាន់នៅត្រង់ថា តើរដ្ឋាភិបាលនឹងគ្រប់គ្រងពីការធ្វើសមាហរណកម្មរបស់ពួកគេយ៉ាងម៉េចនៅនៅក្នុងសង្គមអង់គ្លេស?។ តើត្រូវទទួលពួកគេយ៉ាងម៉េច?។ តើត្រូវធ្វើដូចម្តេចដើម្បីអាចឲ្យពួកគេរួមរស់ បន្សំខ្លួនត្រឹមត្រូវនៅក្នុងសង្គម?។ ទាំងអស់នេះជាក្តីបារម្ភរបស់ខ្ញុំ។ គឺហាក់ដូចជាគ្មានការសម្របសម្រួលណាមួយពីរដ្ឋាភិបាលទេ។
ពិតណាស់ មានសង្គមស៊ីវិលជាច្រើនបានចូលរួម និងត្រៀមខ្លួនដើម្បីជួយ។ តែយើងទាំងអស់គ្នានៅក្នុងសង្គមស៊ីវិល យើងមានការបារម្ភពីចម្លើយរបស់រដ្ឋាភិបាលទាក់ទងនឹងប្រភពធនធានចំាបាច់មួយចំនួន។ ទោះជាយ៉ាងនេះក្តី យើងធ្វើអ្វីៗដែលអាចធ្វើបានដើម្បីធានាថា រដ្ឋាភិបាលដាក់ចេញនូវយុទ្ធសាស្រ្តពិតប្រាកដមួយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ