បូរីស ចនសុន៖ បញ្ហាអាកាសធាតុគឺជាការគំរាមកំហែងធ្ងន់ធ្ងរចំពោះសន្តិសុខពិភពលោក
នៅក្នុងកិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិ នាយករដ្ឋមន្ត្រីអង់គ្លេសលោក បូរីស ចនសុន បានប្រាប់មេដឹកនាំពិភពលោកថា បញ្ហាអាកាសធាតុគឺជាការគំរាមកំហែងធ្ងន់ធ្ងរដល់សន្តិសុខពិភពលោក។ ទន្ទឹមនេះ ក្នុងនាមជាប្រធានដឹកនាំអង្គប្រជុំ លោកចនសុន ក៏បានជំរុញផងដែរឲ្យក្រុមប្រឹក្សាសន្តិសុខ ចាត់វិធានការបន្ទាន់ឆ្លើយតបនឹងវិបត្តិអាកាសធាតុដែលមានសភាពកាន់តែអាក្រក់ទៅៗ។
ចុះផ្សាយនៅថ្ងៃ៖
ស្តាប់ - ០២:០២
ជាប្រពៃណី ក្រុមប្រឹក្សាសន្តិសុខអង្គការសហប្រជាជាតិ ផ្តោតការអន្តរាគមន៍របស់ខ្លួនតែក្នុងករណីបញ្ចៀសជម្លោះ ឬបង្កើតប្រតិបត្តិការថែរក្សាសន្តិភាពពិភពលោកតែប៉ុណ្ណោះ។ ក៏ប៉ុន្តែ កិច្ចប្រជុំកាលពីថ្ងៃអង្គារម្សិលមិញនេះ មានគោលដៅយកបញ្ហាអាកាសធាតុទៅដាក់បញ្ចូលក្នុងដែនសមត្ថកិច្ចរបស់ក្រុមប្រឹក្សាសន្តិសុខដែរ។
លោកនាយករដ្ឋមន្ត្រីអង់គ្លេស បូរីស ចនសុន ដែលជាប្រធានដឹកនាំកិច្ចប្រជុំ បានផ្តោតការយកចិត្តទុកដាក់ អំពីបញ្ហាអាកាសធាតុនិងសន្តិសុខពិភពលោក។ លោកចនសុន បាននិយាយថា វាពិតជាច្បាស់ណាស់ ដែលថាការប្រែប្រួលអាកាសធាតុគឺជាការគំរាមកំហែងខ្លាំង ចំពោះសន្តិសុខ និងស្ថិរភាពពិភពលោក។
នៅឯកិច្ចប្រជុំក្រុមប្រឹក្សាសន្តិសុខ មេដឹកនាំអង់គ្លេសរូបនេះបានលើកឡើងថា មេដឹកនាំប្រទេសខ្លះអាចនឹងតវ៉ាឬក៏មិនយល់ស្របថា ប្រធានបទអាកាសធាតុ មិនសមស្របសម្រាប់កិច្ចប្រជុំរបស់ក្រុមប្រឹក្សានោះទេ។ ក៏ប៉ុន្តែ លោកនៅតែបន្តអះអាងថា ក្រុមប្រឹក្សាសន្តិសុខចាំបាច់ណាស់ ត្រូវធ្វើសកម្មភាពអ្វីមួយហើយដើម្បីការពារ “សន្តិភាព សន្តិសុខ និងស្ថិរភាព” នៅជុំវិញពិភពលោក។
ស្របពេលជាមួយគ្នានោះ លោកប្រមុខរដ្ឋាភិបាលអង់គ្លេស បានគូសបញ្ជាក់ទៀតថា ទីក្រុងឡុងដ៍ កំពុងចាត់វិធានការ ដើម្បីដោះស្រាយការបំភាយឧស័ន្មពុល និងបានសង្កត់ធ្ងន់ផងដែរលើសារៈសំខាន់ ក្នុងការជួយប្រទេសងាយរងគ្រោះឲ្យសម្របខ្លួនទៅនឹងការប្រែប្រួលអាកាសធាតុ។
ទាក់ទងរឿងនេះ លោក ចន ឃែរី ដែលជា ប្រេសិតពិសេសទទួលបន្ទុកផ្នែកអាកាសធាតុរបស់សហរដ្ឋអាមេរិក បានលើកឡើងពីមន្ទីរប៉ង់តាហ្គោនដែលបានពិពណ៌នាជាច្រើនឆ្នាំមកហើយ អំពីផលប៉ះពាល់នៃអាកាសធាតុ ថាជាការគំរាមកំហែងដ៏ខ្លាំងមួយ។
មិនខុសពីលោកបូរីស ចនសុនឡើយ ប្រេសិតពិសេសទទួលបន្ទុកផ្នែកអាកាសធាតុរបស់អាមេរិករូបនេះ បាននិយាយថា ជាការពិតការប្រែប្រួលអាកាសសធាតុ គឺស្ថិតក្នុងចំណោមបញ្ហាសន្តិសុខស្មុគស្មាញបំផុតដែលពិភពលោកបាននិងកំពុងជួបប្រទះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ