ហេតុអ្វីអង់គ្លេសសម្រេចបង្កើនក្បាលគ្រាប់នុយក្លេអ៊ែរ នៅពេលនេះ?
រដ្ឋាភិបាលអង់គ្លេស បានសម្រេចចិត្តបង្កើនចំនួនក្បាលគ្រាប់នុយក្លេអ៊ែរ របស់ខ្លួនប្រមាណ ៤០%។ នេះបើតាមរបាយការណ៍ស្តីពីយុទ្ធសាស្រ្តរបស់អង់គ្លេស ខាងផ្នែកសន្តិសុខ ការពារជាតិ ហើយនិងនយោបាយការបរទេស ដែលរដ្ឋាភិបាលអង់គ្លេស បានដាក់បង្ហាញជូនសភាពិនិត្យ កាលពី ថ្ងៃអង្គារម្សិលមិញ។ នេះជាលើកទី១ ក្នុងរយៈពេល ៣០ឆ្នាំក្រោយចប់សង្រ្គាមត្រជាក់ ដែលអង់គ្លេស សម្រេច សើរើយុទ្ធសាស្រ្តកងទ័ព តាមរយៈ ការបង្កើនក្បាលគ្រាប់បែកនុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០២:៤៦
នៅក្នុងរបាយការណ៍ជាង ១០០ទំព័រ ស្តីពីយុទ្ធសាស្រ្តអង់គ្លេសខាងផ្នែកសន្តិសុខ ការពារជាតិនិងនយោបាយការបរទេស មានវិធានការគោលមួយដែលសរសេរថា អង់គ្លេសនឹងបង្កើនក្បាលគ្រាប់នុយក្លេអ៊ែររបស់ខ្លួន ពីចំនួន ១៨០ ទៅ ២៦០គ្រាប់ ពោលគឺប្រមាណ ៤០ភាគរយនៃចំនួនក្បាលគ្រាប់នុយក្លេអ៊ែរសរុប ដែលអង់គ្លេសកំពុងមានសព្វថ្ងៃ។
ដោយសម្រេចចិត្តបង្កើនចំនួនក្បាលគ្រាប់នុយក្លេអ៊ែរ រហូតដល់ ២៦០គ្រាប់ រដ្ឋាភិបាលអង់គ្លេស ក្រោមការដឹកនាំរបស់លោកបូរីស ចនសុនបានរំលោភមាត្រាទី ៦នៃ សន្ធិសញ្ញាស្តីពីការមិនរីកសាយភាពអាវុធនុយក្លេអ៊ែរ ដែលនៅក្នុងនោះ អង់គ្លេស ធ្លាប់បានសន្យា នៅឆ្នាំ ២០១០ ដើម្បីកាត់បន្ថយ ចំនួន ក្បាលគ្រាប់នុយក្លេអ៊ែរអង់គ្លេស ឲ្យមកនៅត្រឹម ចំនួន ១៨០គ្រាប់ នៅខែធ្នូ ឆ្នាំ ២០២០។
ការផ្លាស់ប្តូរជំហររបស់រដ្ឋាភិបាលអង់គ្លេស នឹងទៅបិទបញ្ចប់ ការប្រឹងប្រែងរបស់ពិភពលោក ក្នុងការកាត់បន្ថយអាវុធនុយក្លេអ៊ែរ ដែលមានចាប់ តាំងពីចប់សង្រ្គាមត្រជាក់ ឬការដួលរលំនៃសហភាពសូវៀត កាលពី ៣០ឆ្នាំមុន។
សម្រាប់ គណបក្សប្រឆាំង និងក្រុមសកម្មជនដើម្បីលុបបំបាត់អាវុធនុយក្លេអ៊ែរ វិធានការរបស់រដ្ឋាភិបាលអង់គ្លេស ដើម្បី បង្កើនក្បាលគ្រាប់នុយក្លេអ៊ែរ គឺជាការបោះមួយជំហានទៀតឆ្ពោះទៅរកការប្រកួតប្រជែងអាវុធនុយក្លេអ៊ែរ និងជាការញុះញង់មួយដ៏ខ្លាំង នៅលើឆាកអន្តរជាតិ។
ប៉ុន្តែ រដ្ឋមន្រ្តីការបរទេសអង់គ្លេស លោកDominic Raab ដែលជួបសម្ភាសន៍ដោយទូរទស្សន៍អង់គ្លេស BBC បានអះអាងថា ការបង្កើនអាវុធនុយក្លេអ៊ែរគឺប្រៀបដូចជាប៉ូលិស សម្រាប់ធានាសន្តិសុខដ៏ចាំបាច់ ដើម្បីទប់ទល់ប្រឆាំងនឹងរដ្ឋសត្រូវ ដែលចង់គំរាមកំហែងអង់គ្លេស។
របាយការណ៍ដែលសើរើឡើងវិញយុទ្ធសាស្រ្តកងទ័ពអង់គ្លេស ធ្វើឡើងនៅពេលដែលអង់គ្លេស គ្រោង រៀបចំ តាំងខ្លួន ជាមហាអំណាចមួយឡើងវិញ នៅក្រោយចាកចេញពីសហភាពអឺរ៉ុប និងនៅពេលអង់គ្លេសកំពុងជួបភាពតានតឹងកាន់តែខ្លាំងជាមួយរុស្ស៊ី និងចិន ដោយសារសំណុំរឿងបំពុលទីភ្នាក់ងាររុស្ស៊ី ក្នុងទឹកដីអង់គ្លេស ហើយនិងសំណុំរឿងហុងកុង ឬជនជាតិអ៊ុយហ្គួរ ក្នុងខេត្តស៊ីនជាំង។
ប៉ុន្តែ នៅពេល អង់គ្លេសបានចាត់ទុករុស្ស៊ី របស់លោកប្រធានាធិបតី វ្លាឌីមៀរ ពូទីនថា ជាការគំរាមកំហែងដោយផ្ទាល់ និងស្រួចស្រាវ សម្រាប់អង់គ្លេស ប្រទេសចិនឯណោះវិញ ត្រូវបានអង់គ្លេសចាត់ទុកត្រឹមជាគូប្រជែងដោយស្វ័យប្រវត្តិតែប៉ុណ្ណោះ។
អង់គ្លេស ដែលកំពុងសំឡឹងបែរឆ្ពោះទៅរកប្រយោជន៍នៅតំបន់ឥណ្ឌូប៉ាស៊ីហ្វិក យល់ថា ការសហការជាមួយចិន គឺជារឿងចាំបាច់ នៅក្នុងរឿងប្រយុទ្ធប្រឆាំងនឹងការប្រែប្រួលអាកាសធាតុ។ នាយករដ្ឋមន្រ្តី អង់គ្លេស ផ្ទាល់បានវាយតម្លៃថា អ្នកដែលប្រកាសឲ្យមានសង្រ្គាមត្រជាក់ជាមួយ ចិន ឬ ធ្វើឲ្យសេដ្ឋកិច្ចចិន នៅឯកោរ គឺកំពុងយល់ច្រលំធំហើយ។ ជាថ្មីម្តងទៀត លោកនាយករដ្ឋមន្រ្តីអង់គ្លេស ដែលជាសម្ព័ន្ធមិត្តសំខាន់របស់អាមេរិក បានបង្ហាញថា លោកជាមនុស្សបត់បែនបានតាមកាលៈទេសៈជានិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ