អង់គ្លេសថាការដកកងទ័ពអាមេរិកចេញពីអាហ្វហ្កានីស្ថានគឺជាកំហុសឆ្គងមួយ
បន្ទាប់ពីពួកតាលីបង់ វាយលុកទៅកាន់តែកៀកជិតដល់រដ្ឋធានីកាប៊ុល ប្រទេសអង់គ្លេសនៅថ្ងៃសុក្រ ១៣សីហា បានចេញមុខរិះគន់ថាការដកកងទ័ពអាមេរិកចេញពីអាហ្វហ្កានីស្ថាន គឺជាកំហុសឆ្គងមួយ។ ទន្ទឹមនេះ ទីក្រុងឡុងដ៍ ព្រមានដែរថាការវិលត្រលប់មកវិញរបស់ចលនាឧទ្ទាមតាលីបង់ នឹងអាចបើកផ្លូវឲ្យមានការបង្កើតមូលដ្ឋានសម្រាប់ពួកជ្រុលនិយមដែលជាការគំរាមកំហែងចំពោះពិភពលោក។
ចុះផ្សាយនៅថ្ងៃ៖
ស្តាប់ - ០២:៥៥
ការម្រេចរបស់អាមេរិកក្នុងការដកកងទ័ពចេញពីអាហ្វហ្កានីស្ថាន បន្សល់ទុកនូវបញ្ហាធំមួយ។ នេះគឺជាប្រសាសន៍របស់លោក បេន វ៉លឡេស (Ben Wallace) រដ្ឋមន្ត្រីការពារជាតិអង់គ្លេស។
សម្រាប់លោក វ៉លឡេស អវត្តមានកងទ័ពលោកខាងលិចគឺហាក់បីដូចជាការបើកផ្លូវឲ្យក្រុមឧទ្ទាមតាលីបង់ត្រឡប់ទៅកាន់អំណាចវិញ ហើយវានឹងហុចផលប្រយោជន៍ដល់ពួកអាល់កៃដា។ ពួកអាល់កៃដា ដែលត្រូវបានក្រុមតាលីបង់ផ្តល់ជម្រកដ៏រឹងមាំ មុនការវាយប្រហារភេរវកម្មទៅលើទីក្រុងញូវយ៉ក និងវ៉ាស៊ីនតោនកាលពីថ្ងៃទី១១ ខែកញ្ញា ឆ្នាំ ២០០១ ដែលជាចំណុចចាប់ផ្តើម នាំអាមេរិក និងសម្ព័ន្ធមិត្តលោកខាងលិចទៅរកសង្រ្គាមដ៏ធំរយៈពេល ២០ឆ្នាំ នៅអាហ្វហ្កានីស្ថាន។
ក្នុងពេលផ្តល់បទសម្ភាសន៍ឲ្យទូរស្សន៍ Sky News លោករដ្ឋមន្ត្រីការពារជាតិអង់គ្លេស បានគូសបញ្ជាក់ពីក្តីបារម្ភរបស់លោកដែលថាប្រសិនបើពួកភេរវជនអាល់កៃដាត្រលប់មកវិញនៅកន្លែងចាស់ដែលជាជម្រកសុវត្ថិភាពរបស់ពួកគេ នោះពិភពលោកនឹងរងការគំរាមកំហែងផ្នែកសន្តិសុខ និងផលប្រយោជន៍ជាមិនខាន។
ក្រោមហេតុផលនេះ អង់គ្លេសយល់ថាកិច្ចព្រមព្រៀងទីក្រុងដូហាឆ្នាំ២០២០ ដែលបានចុះហត្ថលេខាដោយសហរដ្ឋអាមេរិកនិងក្រុមតាលីបង់គឺជាកំហុសឆ្គងមួយ ហើយគឺសហគមន៍អន្តរជាតិនេះហើយដែលទំនងជាអ្នកត្រូវទទួលខុសត្រូវចំពោះផលវិបាកដែលកើតឡើងជាយថាហេតុ។
គួរជម្រាបជូនថា កិច្ចព្រមព្រៀងទីក្រុងដូហារវាងអាមេរិកនិងចលនាឧទ្ទាមតាលីបង់ធ្វើឡើងក្នុងសម័យដឹកនាំរបស់អតីតប្រធានាធិបតីអាមេរិកដូណាល់ ត្រាំ។ នៅក្នុងកិច្ចព្រមព្រៀងនេះ អាមេរិកសន្យាដកទ័ពចេញទាំងអស់ចេញពីអាហ្វហ្កានីស្ថាន ហើយពួកតាលីបង់វិញបានយល់ព្រមចូលអង្គុយតុចរចាសន្តិភាពជាមួយរដ្ឋាភិបាលក្រុងកាប៊ុល។
លោកបេន វ៉លឡេស បាននិយាយថា កិច្ចព្រមព្រៀងដែលបានចុះហត្ថលេខាក្រោមរដ្ឋបាលលោកត្រាំនេះ បានធ្វើឲ្យអង់គ្លេសគ្មានជម្រើសផ្សេងក្រៅតែពីដកកងទ័ពចេញនោះទេ។
គួរជ្រាបថា ខណៈពួកតាលីបង់កំពុងបន្តគោលដៅសំដៅឆ្ពោះទៅរដ្ឋធានីកាប៊ុល ប្រទេសអង់គ្លេស បានបញ្ជូនទ័ពប្រមាណ ៦០០ នាក់ដើម្បីជម្លៀសមន្ត្រីទូតនិងជនជាតិអង់គ្លេសចេញពីអាហ្វហ្កានីស្ថាន។
ក្រោយឃើញថា ស្ថានការណ៍នៅអាហ្វហ្កានីស្ថានកាន់តែធ្លាក់ដុនដាបខ្លាំង ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួន បានអំពាវនាវដល់ប្រទេសជិតខាងអាហ្វហ្កានីស្ថាន ឲ្យនៅបន្តបើកព្រំដែន ព្រោះមានជនស៊ីវិលជាច្រើនម៉ឺននាក់ កំពុងរត់ភៀសខ្លួនពីការវាយលុកលុយរបស់ពួកតាលីបង់។ ចំណែកអង្គការអូតង់វិញ បានកោះហៅកិច្ចប្រជុំបន្ទាន់មួយនៅថ្ងៃសុក្រ ១៣ សីហានេះដើម្បីពិភាក្សាអំពីស្ថានភាពក្នុងប្រទេសអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ