កូវីដ ៖ “ដែលតា” បង្កើនហានិភ័យឈឺធ្ងន់ចូលពេទ្យ ពីរដងលើសមេរោគបំប្លែងអង់គ្លេស
មេរោគកូវីដបំប្លែងដែលតាឆ្លងខ្លាំងជាងអាល់ហ្វា អាល់ហ្វាឆ្លងជាងមេរោគកូវីដដើម ... និង មានព័ត៌មានតិចតួចនៅឡើយ ទាក់ទងនឹងភាពកំណាចរបស់ដែលតា ។ ប៉ុន្តែពេលនេះ បើតាមការសិក្សារបស់អង់គ្លេសទើបចេញផ្សាយនៅថ្ងៃសៅរ៍ទី ២៨សីហា អ្នកឆ្លងមេរោគកូវីដ “ដែលតា” មានហានិភ័យធ្លាក់ខ្លួនឈឺដល់ថ្នាក់ត្រូវចូលព្យាបាលនៅមន្ទីរពេទ្យ ដល់ទៅពីរដង លើសអ្នកឆ្លងកូវីដ ប្រភេទមេរោគអាល់ហ្វា។
ចុះផ្សាយនៅថ្ងៃ៖
ស្តាប់ - ០២:១៩
ការសិក្សាអង់គ្លេស ដែលមានចុះផ្សាយក្នុងទំព័រទស្សនាវដ្តីវិទ្យាសាស្ត្រ The Lancet Infectious Diseases នៅថ្ងៃសៅរ៍ទី២៨សីហានេះ បានបង្ហាញឱ្យឃើញថា អ្នកឆ្លងជំងឺកូវីដ ប្រភេទដែលតា មានហានិភ័យរងគ្រោះធ្លាក់ខ្លួនឈឺ ដល់ថ្នាក់ចូលដេកពេទ្យ ជាងឆ្លងកូវីដប្រភេទផ្សេង។ ពោលគឺដូចទិន្នន័យបឋមរបស់អេកូស និងសិង្ហបុរី ដែលធ្លាប់លើកឡើងថាដែលតាអាចបង្កើនគ្រោះធ្លាក់ខ្លួនឈឺ និងឈឺក្នុងទម្រង់ធ្ងន់។
នៅក្នុងការវិភាគទិន្នន័យលើអ្នកជំងឺកូវីដអង់គ្លេសចំនួន ៤៣០០០នាក់ ឈឺនៅរវាងពីថ្ងៃទី ២៩មីនា ដល់ថ្ងៃទី ២៣ឧសភា ពោលគឺ៨០%នៃអ្នកវិជ្ជមានកូវីដ មានផ្ទុកមេរោគអាល់ហ្វា និង ២០% មានផ្ទុកមេរោគដែល ព្រោះពេលនោះតាដែលតាទើបតែចាប់ផ្តើមវាយលុកនៅអង់គ្លេស។ ជាលទ្ធផល ២,៣% នៃអ្នកជំងឺចូលព្យាបាលនៅមន្ទីរពេទ្យ ជាអ្នកឆ្លងមេរោគដែលតា និង២,២% ជាអ្នកឆ្លងមេរោគប្រភេទអាល់ហ្វា។ ជាតួលេខខុសគ្នាតិចតួចមែន ប៉ុន្តែប្រសិនបើ គេយកកត្តាផ្សេងទៀត ដែលអាចជាមូលហេតុនាំជំងឺទៅជាធ្ងន់ធ្ងរបាន ដូចជា កត្តាអាយុ ពូជសាសន៍ ឬការចាក់ថ្នាំបង្ការ មកគណនាជាមួយទៅ ហានិភ័យធ្លាក់ខ្លួនឈឺដល់ថ្នាក់ចូលដេកពេទ្យ បានកើនឡើងមួយគុណនឹង២,២៦ (ជាងពីរដង)នៅពេលឆ្លងកូវីដប្រភេទដែលតា បើប្រៀបទៅនឹងការឆ្លងកូវីដប្រភេទអាល់ហ្វា។
ងាយធ្លាក់ខ្លួនឈឺធ្ងន់ចូលពេទ្យហើយ ដែលតាអាចឆ្លងលើអ្នកជំងឺក្នុងវ័យកាន់តែក្មេងទៀត ជាមធ្យម អាយុ ២៩ឆ្នាំ ទល់នឹង៣១ឆ្នាំចំពោះអ្នកជំងឺឆ្លងមេរោគអាល់ហ្វា។ ការសិក្សានេះបានបង្ហាញឱ្យឃើញទៀត អំពីហានិភ័យនៃការធ្លាក់ខ្លួនឈឺត្រូវការចូលទៅព្យាបាលក្នុងមន្ទីរពេទ្យចំពោះអ្នកមិនបានចាក់ថ្នាំបង្ការ ឬចាក់មិនទាន់គ្រប់ដូសពេញលេញ។
ថ្នាំបង្ការមាននៅតែមានប្រសិទ្ធភាពខ្ពស់ក្នុងទប់ស្កាត់មិនឱ្យអ្នកឆ្លងកូវីដប្រភេទដែលតាធ្លាក់ខ្លួនឈឺក្នុងទម្រង់ធ្ងន់ធ្ងរបាន ដរាបណាតែអ្នកជំងឺបានចាក់គ្រប់ដូស។ ការចាក់តែមួយដូស មិនអាចការពារទល់នឹងដែលតាបានទេ។ នេះបើតាមការសិក្សាជាច្រើនផ្សេងទៀត។
សូមបញ្ជាក់ថាមេរោគកូវីដបំប្លែងដែលតា ដែលលេចឡើងជាដំបូងនៅប្រទេសឥណ្ឌា មានសមត្ថភាពចម្លងខ្លាំងជាងមេរោគកូវីដបំប្លែងអង់គ្លេស (អាល់ហ្វា)ដែលលេចឡើងនៅប្រទេសអង់គ្លេសកាលពីចុងឆ្នាំ២០២០ ដល់ទៅប្រមាណពី ៤០ទៅ៦០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ