ប៉ូលិសអង់គ្លេស៖ឃាតកម្មសម្លាប់អ្នកតំណាងរាស្រ្តលោកដវីដ អាម៉េសជាអំពើភេរវកម្ម
នៅក្នុងប្រទេសអង់គ្លេស ប៉ូលិសបានចាត់ទុកឃាតកម្មសម្លាប់អ្នកតំណាងរាស្រ្តលោកដេវីដ អាម៉េសថាជាអំពើភេរវកម្ម។ មានអាយុ ៦៩ឆ្នាំ អ្នកតំណាងរាស្រ្តនៃគណបក្សអភិរក្សនិយមលោកដេវីដ អាម៉េសត្រូវបានបុរសខ្មាន់កាំបិតម្នាក់អាយុ ២៥ឆ្នាំចាក់ជាច្រើនកំាបិតរហូតដល់ស្លាប់នៅក្នុងវិហារកាតូលិកមួយស្ថិតក្នុងស្រុក Leigh-on-Sea នៃតំបន់Essex។ សោកនាដកម្មមួយនេះបានបំផុសមានសំណួរចោទឡើងទាក់ទងនឹងសន្តិសុខ សុវត្ថិភាពរបស់ក្រុមអ្នកតំណាងរាស្រ្ត។
ចុះផ្សាយនៅថ្ងៃ៖
ស្តាប់ - ០២:១៩
នៅប៉ុន្មានម៉ោងក្រោយការវាយប្រហារដោយប្រើកាំបិតចាក់លើអ្នកតំណាងរាស្រ្តលោកដេវីដ អាម៉េស ការស៊ើបអង្កេតត្រូវបានប្រគល់ទៅឲ្យប៉ូលិសប្រឆាំងភេរវកម្ម។ លទ្ធផលនៃការស៊ើបអង្កេតដំបូងបានបង្ហាញថា ទង្វើរបស់បុរសខ្មាន់កាំបិតមានជាប់ពាក់ព័ន្ធនឹងទង្វើអ៊ីស្លាមនិយមជ្រុល នេះបើតាមបើបញ្ជាក់របស់ប៉ូលិសតំបន់ Essex នៅក្នុងសេចក្តីប្រកាសព័ត៌មានមួយផ្សព្វផ្សាយនាយប់ថ្ងៃសុក្រ ទី១៥ឆ្លងចូលថ្ងៃសៅរ៍ ទី១៦ តុលា។ សេចក្តីប្រកាសព័ត៌មានរបស់ប៉ូលិសដដែលមិនបានបញ្ជាក់ពីអត្តសញ្ញាណរបស់បុរសខ្មាន់កាំបិតទេ។ តែបើតាមបណ្តាញសារព័ត៌មានអង់គ្លេស ជនដៃដល់ជាជនជាតិអង់គ្លេសមានដើមកំណើតសូម៉ាលី។
គួររម្លឹកថា អ្នកតំណាងរាស្រ្តលោកដេវីដ អាម៉េសអាយុ ៦៩ឆ្នាំត្រូវបានជនដៃដល់អាយុ ២៥ឆ្នាំចាក់ជាច្រើនកាំបិត។ តែស្ថានភាពរបួសធ្ងន់បានផ្តាច់ជីវិតលោកដេវីដ អាម៉េសភ្លាមៗនៅនឹងកន្លែង ទោះបីជាមានអន្តរាគមន៍ឆាប់រហ័សពីក្រុមអ្នកជួយសង្រ្គោះក៏ដោយ។ ចំណែកជនដៃដល់ក៏ត្រូវបានប៉ូលិសចាប់ខ្លួនភ្លាមៗនៅនឹងកន្លែងដែរ រួមទាំងរកឃើញកាំបិតមួយផង។ នៅក្នុងបទអន្តរាគមន៍ខ្លីតាមកញ្ចក់ទូរទស្សន៍ នាយករដ្ឋមន្រ្តីលោកបូរីស ចនសុនបានសម្តែងទុក្ខសោក និងតក់ស្លុត។ « គឺជាថ្ងៃសោកនាដកម្មសម្រាប់លទ្ធិប្រជាធិបតេយ្យរបស់យើង » នេះជាប្រតិកម្មរបស់អតីតនាយករដ្ឋមន្រ្តីលោកស្រីទែរ៉េសា មេ។
ដោយឡែក រដ្ឋមន្រ្តីក្រសួងមហាផ្ទៃលោកស្រីព្រីធី ផាថែលបានស្នើឲ្យកម្លាំងប៉ូលិសទាំងអស់ពិនិត្យមើលឡើងវិញនូវវិធានការសន្តិសុខសម្រាប់ការពារក្រុមអ្នកតំណាងរាស្រ្ត។ គួរបញ្ជាក់ថា នេះមិនមែនជាលើកទី១ ទេដែលមានឃាតកម្មសម្លាប់អ្នកតំណាងរាស្រ្ត។ ក្នុងឆ្នាំ ២០១៦ អ្នកតំណាងរាស្រ្តលោកស្រីចូ ខក្សត្រូវបានជនស្តាំនិយមជ្រុលសម្លាប់នៅកណ្តាលផ្លូវ។ តាមតួលេខរបស់ប៉ូលិស សកម្មភាពប្រឆាំងនឹងអ្នកតំណាងរាស្រ្តមានការកើនឡើងគួរឲ្យកត់សម្គាល់។ ក្នុងឆ្នាំ ២០១៩ ប៉ូលិសបានលើកឡើងពីកំណើន ១២៦% នៅចន្លោះឆ្នាំ ២០១៧ និង ២០១៨។ បន្ទាប់មក មានការកើនឡើងចំនួន ៩០% នៅក្នុង ៤ខែដំបូងនៃឆ្នាំ ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ