យុវសកម្មជនបរិស្ថាន ហ្ក្រេតា ធុនប៊ែរ ថា COP២៦ មិនអាច ប្តូរផ្លាស់អ្វីទេ
នៅព្រលប់ថ្ងៃ សៅរ៍ទី ១៦តុលា ម្សិលមិញ ក្រុមយុវសកម្មជនបរិស្ថាននៅក្នុងបណ្តាប្រទេសជាង ៤០ប្រទេសបានរៀបចំពិធីប្រគុំតន្រ្តីដើម្បីបុព្វហេតុអាកាសធាតុ។ ពីទីក្រុងស្តុកខុល ប្រទេសស៊ុយអែត កញ្ញាហ្រ្គេតា ធុនប៊ែរ Greta Thunberg បានថ្លែងបរិហារ អំពីភាពអសកម្មរបស់អ្នកនយោបាយក្នុងការចាត់វិធានការទប់ស្កាត់នឹងការប្រែប្រួលអាកាសធាតុ និងបានអំពាវនាវឱ្យយុវវ័យប្រមូលផ្តុំកម្លាំងគ្នាដើម្បីអាកាសធាតុ ទោះក្នុងឱកាសជួបជុំគ្នារីករាយក៏ដោយ។
ចុះផ្សាយនៅថ្ងៃ៖
ស្តាប់ - ០១:៤០
វិបត្តិកូវីដ១៩ បានធ្វើឱ្យសកម្មភាពដើម្បីអាកាសធាតុ ស្ងប់ស្ងាត់អស់ជាច្រើនខែ។ ប៉ុន្តែពេលនេះ ជាមួយនឹងការលើកបម្រាម និងវិធានការ ជាបន្តបន្ទាប់ នៅតាមបណ្តាប្រទេសជាច្រើននោះ ក្រុមយុវសកម្មជនបរិស្ថាន ចង់បង្ហាញពិភពលោកថា បុព្វហេតុការពារអាកាសធាតុ អាចធ្វើទៅបាន ដោយរីករាយ។
នៅក្នុងកម្មវិធីប្រគុំតន្ត្រីអាកាសធាតុ ប្រិយមិត្តយុវវ័យមិនបានឃើញតារាចម្រៀងស៊ុយអែតទាំងអស់លើឆាកមែន តែគេបានឮអ្នកវិទ្យាសាស្ត្រ ឬសកម្មជនបរិស្ថាន មានជាអាទិ៍សកម្មជនបរិស្ថានមកពីហ្វីលីពីន រៀបរាប់ពីផលវិបាកបង្កឡើងដោយការប្រែប្រួលអាកាសធាតុ។ កាន់តែផ្អើលទៀត កញ្ញា ហ្ក្រេតា ធុនប៊ែរ បានឡើងឆាក រាំ ច្រៀង ជាមួយតារាចម្រៀង និងបានបិទបញ្ចប់កម្មវិធី ដោយបរិហារ អំពីភាពអសកម្មរបស់អ្នកនយោបាយក្នុងចំណាត់ការទប់ស្កាត់ការប្រែប្រួលអាកាសធាតុ។
ថ្វីបើនៅក្នុងអំឡុងពេលប្រគុំតន្ត្រី សកម្មជនបរិស្ថានបានលើកឡើងច្រើនដងអំពីសន្និសីទអន្តរជាតិស្តីពីអាកាសធាតុ Cop២៦ នៅ Glasgowមែន តែសម្រាប់កញ្ញា ធុនប៊ែរ បើយោលទៅស្ថានភាពជាក់ស្តែងនាពេលបច្ចុប្បន្ននេះ សន្និសីទអង្គការសហប្រជាជាតិ COP២៦មិនអាចនាំឱ្យមានការប្តូរផ្លាស់អ្វី ជាដុំកំភួនទេ។ ការប្តូរផ្លាស់ដើម្បីអាកាសធាតុ អាចកើតមានបានគឺចេញពីឆន្ទៈរបស់ប្រជាពលរដ្ឋ នៅពេលប្រជាពលរដ្ឋចុះដើរតាមថ្នល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ