ពលរដ្ឋស្វីសគាំទ្រវិធានការទប់ស្កាត់កូវីដរបស់រដ្ឋាភិបាល
មេរោគបំប្លែងខ្លួន “អូមីក្រុង” កំពុងរីករាលដាលខ្លាំងនៅជុំវិញពិភពលោករហូតបង្ខំឲ្យប្រទេសជាច្រើន ត្រលប់ទៅចាត់វិធានការរឹតបន្តឹងឡើងវិញមានតាំងពីការបិទព្រំដែន និងការត្រួតពិនិត្យយ៉ាងតឹងរ៉ឹងចំពោះអ្នកដំណើរមកពីខាងក្រៅជាដើម។ ដោយឡែកកាលពីថ្ងៃអាទិត្យ ២៨ វិច្ឆិកាម្សិលមិញ នៅក្នុងការបោះឆ្នោតប្រជាមតិមួយ ពលរដ្ឋស្វីសជាច្រើននាក់បានបោះឆ្នោតគាំទ្រវិធានការទប់ស្កាត់កូវីដរបស់រដ្ឋាភិបាល ខណៈយុទ្ធនាការប្រឆាំងនឹងការប្រើបណ្ណសុខភាពកំពុងកើតឡើងនៅក្នុងប្រទេស។
ចុះផ្សាយនៅថ្ងៃ៖
ស្តាប់ - ០២:១៥
អ្នកបោះឆ្នោតស្វីសបានបង្ហាញពីការគាំទ្ររបស់ពួកគេ ចំពោះវិធានការរបស់រដ្ឋាភិបាលក្នុងការប្រយុទ្ធទល់នឹងជំងឺកូវីដ១៩ ជាពិសេសនៅក្នុងកាលៈទេសៈដែលពិភពលោកកំពុងប្រឈមទៅនឹងមេរោគបំប្លែងខ្លួនថ្មីដែលមានឈ្មោះថាអូមីក្រុង។
លទ្ធផលបឋមនៃការបោះឆ្នោតប្រជាមតិ បានបង្ហាញថាជាង ៦០%នៃអ្នកបោះឆ្នោតគាំទ្រច្បាប់ទប់ស្កាត់កូវីដ។ ពួកគេប្រឆាំងនឹងទៅគំនិតដែលចង់ឲ្យដកចេញនូវការរឹតបន្តឹងមួយចំនួនរួមមានទាំងការប្រើប្រាស់បណ្ណសុខភាព ឬបណ្ណចាក់វ៉ាក់សាំងកូវីដផង។
គួរបញ្ជាក់ថា ដើម្បីទប់ស្កាត់ការឆ្លងរីករាលដាលកូវីដ ចាប់ពីខែកញ្ញាមក រដ្ឋាភិបាលស្វីសបានតម្រូវឲ្យមានបណ្ណសុខភាពឬលទ្ធផលតេសអវិជ្ជមានកូវីដដើម្បីអាចចូលបារ ហាងកាហ្វេ ភោជនីយដ្ឋាន រោងកុន សារមន្ទីរ និងព្រឹត្តិការណ៍ប្រកួតកីឡាផ្សេងៗជាដើម។
ការចាក់ថ្នាំបង្ការកូវីដ គឺជាបញ្ហារសើបមួយនៅក្នុងប្រទេសស្វីស។ មិនមែនគ្រប់ប្រជាពលរដ្ឋស្វីសនោះទេដែលគាំទ្រច្បាប់តម្រូវឲ្យមានឯកសារសុខភាពនេះ។ ក្រុមអ្នកប្រឆាំង និយាយថាបណ្ណសុខភាពដែលត្រូវបានទាមទារចាប់តាំងពីខែកញ្ញាមកនោះគឺជារំលោភសិទ្ធិសេរីភាពរបស់ពួកគេ។
បន្ទាប់មក ក្រុមអ្នកតវ៉ាបាននាំគ្នាចេញផ្លូវធ្វើបាតុកម្មប្រឆាំងនឹងវិធានការរបស់រដ្ឋាភិបាល រហូតជំរុញឲ្យមានការបោះឆ្នោតប្រជាមតិតែម្តង។ ហើយលទ្ធផលបឋមនៃបោះឆ្នោតបង្ហាញថាក្នុងចំណោមអ្នកបានទៅបោះឆ្នោត ៦៤ % មានពលរដ្ឋស្វីស ច្រើនជាង ៦០% គាំទ្រចំពោះវិធានការទប់ស្កាតកូវីដរបស់អាជ្ញាធរ។
គួររំឭកថា ការធ្វើប្រជាមតិនៅស្វីសបានធ្វើឡើងនៅពេលអូមីក្រុងដែលជាមេរោគបំប្លែងខ្លួនថ្មីចាត់ថ្នាក់គួរឲ្យព្រួយបារម្ភ ដោយអង្គការសុខភាពពិភពលោក កំពុងវាយលុកតែពិភពលោកកាន់តែខ្លាំង។ បន្ថែមលើនេះ ការធ្វើប្រជាមិតខាងលើត្រូវបានរៀបចំឡើងផងដែរ នៅខណៈករណីឆ្លងថ្មីនៃជំងឺកូវីដ១៩ នៅក្នុងប្រទេសស្វីសកើនខ្លាំងបើប្រៀបធៀបនឹងពេលកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ