ធនាគារកណ្តាលចេញមុខដោះស្រាយវិបត្តិអតិផរណា
វិបត្តិកូវីដ១៩ នៅមិនទាន់បិទបញ្ចប់។ ទោះកំពុងប្រឈមនឹងកំណើនស្ទុះលឿននៃករណីឆ្លងជំងឺកូវីដ ដោយសារមេរោគបំប្លែងខ្លួនអូមីក្រុង ធនាគារកណ្តាលអឺរ៉ុប បានដើរតាមធនាគារកណ្តាលអាមេរិក ដែលបានសម្រេចកាលពីថ្ងៃពុធទី ១៥ ធ្នូ បិទបញ្ចប់ ផែនការសង្រ្គោះសេដ្ឋកិច្ច ដែលគេបានធ្វើឡើងនៅឆ្នាំ ២០២០ ដើម្បីជួយទ្រទ្រង់សេដ្ឋកិច្ច ដែលរងគ្រោះ ចុះទន់ខ្សោយ ដោយសារ ជំងឺរាតត្បាតកូវីដ។ ចាប់ពីខែ មីនា ឆ្នាំក្រោយ ធនាគារកណ្តាលអាមេរិកនឹងឈប់ទិញបំណុលឯកជន ដោយបើកផ្លូវឲ្យមានការដំឡើងអត្រាការប្រាក់ឡើងវិញ។ ការសម្រេចរបស់ធនាគារកណ្តាលអឺរ៉ុប និងធនាគារកណ្តាលអាមេរិកបានទទួលការស្វាគមពីអ្នកវិនិយោគនៅទីផ្សារភាគហ៊ុននៅអាស៊ី អឺរ៉ុបនិងអាមេរិកកាលពីថ្ងៃព្រហស្បតិ៍ ទី១៦ធ្នូឆ្នាំ ២០២១។
ចុះផ្សាយនៅថ្ងៃ៖
ស្តាប់ - ០២:០៧
នៅចំពោះមុខអត្រាអតិផរណាកើនឡើងខ្ពស់ ដែលកើតឡើង ដោយសារវិបត្តិថាមពលឡើងថ្លៃ និងការខ្វះខាតក្នុងការផ្គត់ផ្គង់ផលិតផល ធនាគាកណ្តាលនៅអាមេរិក និងនៅអឺរ៉ុប បានចេញមុខចាត់វិធានការជាបន្តបន្ទាប់គ្នា។
នៅថ្ងៃព្រហស្បតិ៍ នៅប៉ុន្មានម៉ោងក្រោយធនាគារកណ្តាលអាមេរិកសម្រេចដកខ្លួន លែងជួយទ្រទ្រង់ សេដ្ឋកិច្ច ដោយឈប់ទិញបំណុលជាតិ និងឯកជន ចាប់ពីខែមីនា ឆ្នាំ ២០២២ ធនាគារកណ្តាលអឺរ៉ុប បានប្រកាសបិទបញ្ចប់ផែនការសង្រ្គោះសេដ្ឋកិច្ចអឺរ៉ុប នៅខែមីនាឆ្នាំក្រោយដែរ។ តាំងពីខែមីនាឆ្នាំ មុន ធនាគារកណ្តាលអឺរ៉ុបបានបញ្ចេញកញ្ចប់ថវិកាបន្ទាន់ តម្លៃ១៨៥០ពាន់លានអឺរ៉ូ សម្រាប់ជួយសេដ្ឋកិច្ចអឺរ៉ុបដែលចុះខ្សោយដោយសារវិបត្តិកូវីដ។
វិបត្តិកូវីដនៅមិនទាន់ចប់។ ទ្វីបអឺរ៉ុបក៏កំពុងនៅប្រឈមនឹងការឆ្លងរាលដាលដ៏ខ្លាំងក្លាជាពិសេស ដោយសារមេរោគអូមីក្រុងមួយទៀត ប៉ុន្តែ ធនាគារកណ្តាលអឺរ៉ុបបានសម្រេចឈប់ជួយសេដ្ឋកិច្ចអឺរ៉ុប ដោយកាត់បន្ថយ ការទិញប្រាក់បំណុល រដ្ឋ និងបំណុលឯកជន ពីពេលនេះ រហូតដល់ខែមីនាឆ្នាំ ក្រោយ។
នៅក្នុងសេចក្តីថ្លែងការណ៍ កាលពីថ្ងៃព្រហស្បតិ៍ ធនាគារកណ្តាលអឺរ៉ុបបានពន្យល់ថា សេដ្ឋកិច្ចចាប់ងើបដើរឡើងវិញ នៅតំបន់ចាយប្រាក់អឺរ៉ូ និងការកើនឡើងជាវិជ្ជមាននៃអតិផរណានៅក្នុងរយៈពេលមធ្យមជាហេតុផលមួយដែលធ្វើឲ្យធនាគារត្រូវបិទបញ្ចប់ការទិញប្រាក់បំណុលយ៉ាងយូរនៅខែមីនាឆ្នាំក្រោយ។
ទោះឈប់ទ្រទ្រង់សេដ្ឋកិច្ច តាមរយៈ ការឈប់ទិញប្រាក់បំណុលជាតិ និងប្រាក់បំណុលឯកជន ប៉ុន្តែ ធនាគារកណ្តាលអឺរ៉ុប គ្មានផែនការដំឡើងអត្រាការប្រាក់ ដូចដែលធនាគារកណ្តាលអាមេរិកបានសម្រេច កាលពីថ្ងៃពុធ ដើម្បី ដោះស្រាយបន្ទាន់ វិបត្តិអតិផរណា។ ប្រឈមនឹងកម្រិតអតិផរណា កើនឡើងខ្ពស់ មិនធ្លាប់មាន នៅក្នុងរយៈពេល ៣០ឆ្នាំចុងក្រោយនេះ ដែលមានប្រមាណ ៦,៨% ធនាគារកណ្តាលអាមេរិកបានប្រកាសឈប់ជួយសេដ្ឋកិច្ច ក្នុងអំឡុងវិបត្តិកូវីដ ដោយឈប់ទិញប្រាក់បំណុលតទៅទៀត និងបើកផ្លូវឲ្យធនាគារកណ្តាលអាមេរិក ដំឡើងអត្រាការប្រាក់ឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ