អង្គការសុខភាពពិភពលោក ៖ អូមីក្រុងមិនសូវកាចមែន តែអាចធ្វើឱ្យអ្នកជំងឺចូលដេកពេទ្យច្រើន
អូមីក្រុងងាយឆ្លង ហើយឆ្លងលឿនខ្លាំងណាស់ ដូច្នេះអត្រាអ្នកជំងឺកូវីដចូលព្យាបាលក្នុងមន្ទីរពេទ្យនឹងមានចំនួនច្រើនខ្លាំង។ នេះបើតាមការព្រមានរបស់អង្គការសុខភាព ដែលអំពាវនាវឱ្យគ្រប់ប្រទេសនៅអឺរ៉ុបទាំងអស់ប្រយ័ត្នខ្លាំងមែន និងកុំមើលស្រាលមេរោគបំប្លែងថ្មីនេះ បើទោះបីជាអូមីក្រុងមិនសូវកំណាចយ៉ាងណាក៏ដោយ។
ចុះផ្សាយនៅថ្ងៃ៖
ស្តាប់ - ០២:០១
ឱ្យតែមានរោគ/ជំងឺអ្វីផ្សេងមួយទៀត ទោះជាជំងឺស្រាលក៏ដោយ ក៏អ្នកវិជ្ជមានកូវីដអូមីក្រុងអាចនឹងធ្លាក់ខ្លួនឈឺ ត្រូវបញ្ជូនទៅព្យាបាលនៅមន្ទីរពេទ្យភ្លាម ជាពិសេសចំពោះអ្នកដែលមិនបានចាក់ថ្នាំបង្ការ។ នេះជាអ្វីដែលអ្នកទទួលខុសត្រូវអង្គការសុខភាពពិភពលោកប្រចាំតំបន់អឺរ៉ុប បានសម្គាល់ឃើញ នៅក្នុងប្រទេសកំពុងជួបរលកចម្លងកូវីដ១៩ខ្លាំង។ ដូច្នេះវាហាក់ដូចជាឆាប់បន្តិចដែលគេហ៊ានអះអាងថាអូមីក្រុងមិនកំណាចដូចដែលតានោះ។
អ្នកជំនាញអឺរ៉ុបនៅអង្គការសុខភាពពិភពលោក បានអំពាវនាវឱ្យគ្រប់ប្រទេសទទួលយកទិន្នន័យបឋមស្តីពីអូមីក្រុងដោយប្រុងប្រយ័ត្នបំផុត ព្រោះ រហូតមកទល់ពេលនេះ អូមីក្រុងឆ្លងខ្លាំងលើតែមនុស្សវ័យក្មេង មានសុខភាពល្អ រស់នៅក្នុងប្រទេសមានអត្រាចាក់ថ្នាំបង្ការខ្ពស់ ហើយគេនៅមិនទាន់ឃើញឥទ្ធិពលរបស់អូមីក្រុង នៅកន្លែងផ្សេង លើមនុស្សទន់ខ្សោយ មនុស្សចាស់ មិនទាន់ចាក់វ៉ាក់សាំងគ្រប់ដូសនៅឡើយទេ។
ការសិក្សានៅក្នុងប្រទេសអាហ្វ្រិកខាងត្បូង ដែលជាទីកំណើតអូមីក្រុង នៅអេកូស និងនៅអង់គ្លេស ឬដាណឺម៉ាក បានបង្ហាញថា ដែលជាទិន្នន័យបឋម និងមិនពេញលេញ អូមីក្រុង ទំនងជាមានភាពកំណាចតិចជាងដែលតា ប្រមាណ ៣៥ទៅ៨០%។ កូវីដបំប្លែងខ្លួនអូមីក្រុងពុំសូវបង្កហានិភ័យធ្ងន់ធ្ងរ ធ្វើឱ្យអ្នកឆ្លងធ្លាក់ខ្លួនឈឺធ្ងន់ដូចមេរោគបំប្លែងខ្លួនដែលតាមែន ប៉ុន្តែអ្នកជំនាញមិនទាន់ដឹងថា មកពីមេរោគមិនសូវកាច ឬមកពីមនុស្សចាប់ផ្តើមមានភាពស៊ាំនឹងវីរុសកូវីដទេ។
មេរោគឆ្លងខ្លាំង នោះមេរោគនឹងមិនសូវកាចឡើយ។ នេះបើតាមអ្នកជំនាញជាច្រើនខ្លះទៀត។ ហើយ ឧបមាថាអូមីក្រុងមិនសូវកាចមែនក៏ដោយចុះ ក៏ចំនួនអ្នកចូលព្យាបាលក្នុងមន្ទីរពេទ្យត្រូវតែកើនឡើងខ្លាំងដែរ បើតាមគណិតវិទ្យា ព្រោះចំនួនអ្នកវិជ្ជមានកើនឡើងខ្លាំងពេក។ ឧទាហរណ៍ បើមួយថ្ងៃមានអ្នកឆ្លងកូវីដអូមីក្រុងចំនួន ១០ម៉ឺននាក់ ០,១%ឈឺធ្ងន់ គឺស្មើនឹងមានអ្នកជំងឺ១០០នាក់ចូលពេទ្យ។ ហើយបើដែលតាកំណាចជាង ចម្លងលើមនុស្ស ១០០០០នាក់ ០,៣%ឈឺធ្ងន់ នោះនឹងមានអ្នកជំងឺតែ៣០នាក់ប៉ុណ្ណោះចូលពេទ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ