អូមីក្រុង មេរោគកូវីដ បំប្លែងខ្លួនដែលបំពុលបរិយាកាសបុណ្យឆ្លងឆ្នាំសកល
នៅតែប៉ុន្មានម៉ោងដែលប្រជាជនក្នុងពិភពលោកត្រៀមរៀបចំកម្មវិធីបុណ្យ ឆ្លងឆ្នាំសកល មេរោគកូវីដបំប្លែងខ្លួន អូមីក្រុងបានរុញច្រានឲ្យចំនួនអ្នកឆ្លងកូវីដថ្មី ក្នុងពិភពលោក កើនឡើងដល់ជាង ១លាននាក់ ក្នុងមួយថ្ងៃ។ នៅប្រទេសបារាំង ជាមួយនឹងករណីឆ្លងថ្មីប្រមាណ២សែននាក់ ក្នុងមួយថ្ងៃ អូមីក្រុងបានក្លាយជាមេរោគកូវីដនាំមុខគេ ចំណែកនៅអាមេរិក កុមារដែលឆ្លងមេរោគកូវីដ អូមីក្រុង បានចូលព្យាបាលនៅមន្ទីរពេទ្យ ក្នុងចំនួនកាន់តែច្រើន។
ចុះផ្សាយនៅថ្ងៃ៖
ស្តាប់ - ០២:៣២
ជាមួយអូមីក្រុងដែលងាយឆ្លង និងឆ្លងលឿនជាងមេរោគដែលតា ករណីឆ្លងកូវីដ ក្នុងទូទាំងពិភពលោកបានហក់កើនឡើងដល់ចំនួន ជាង ១លាននាក់ ក្នុងមួយថ្ងៃ គិតត្រឹមថ្ងៃព្រហស្បតិ៍ម្សិលមិញ ពោលគឺកើនឡើង ប្រមាណ ៤៦%បើប្រៀបធៀបនឹងសប្តាហ៍មុន។ នេះបើតាមការគន់គណនារបស់ទីភ្នាក់ងារព័ត៌មានបារាំង AFP។
៨៥%នៃករណីឆ្លងកូវីដថ្មី ប្រមូលផ្តុំក្នុងតំបន់ពីរ គឺអឺរ៉ុប និងសហរដ្ឋអាមេរិក។ ក្នុងរយៈពេល ៧ថ្ងៃចុងក្រោយនេះ ចំនួនអ្នកឆ្លងកូវីដនៅអឺរ៉ុបមានជាង ៤លាននាក់ ចំណែកអាមេរិកមានជាង ២លាននាក់។ ជាការកត់សំគាល់ នៅអាស៊ី ចំនួនអ្នកឆ្លងកូវីដបានធ្លាក់ថយចុះ មកត្រឹម ជាង ២សែនករណី។
នៅអឺរ៉ុប ករណីឆ្លងមេរោគកូវីដ ដែលកើនឡើងលឿនដូចព្រួញ កើតមាននៅស្ទើរគ្រប់ប្រទេស។ ដើម្បីទប់ស្កាត់ការឆ្លងរាលដាលខ្លាំង នៅក្នុងអំឡុងបុណ្យឆ្លងឆ្នាំសកល ប្រទេសអឺរ៉ុបកាន់តែច្រើនបានសម្រេចចាត់វិធានការរឹតបន្តឹងបន្ថែម ដូចជានៅអេស្ប៉ាញ អាជ្ញាធរបានលុបចោលកម្មវិធីអបអរបុណ្យចូលឆ្នាំថ្មី នៅតាមតំបន់ជាច្រើន។ នៅបារាំង ជាទីដែលអូមីក្រុងកំពុងនាំមុខមេរោគកូវីដដទៃទៀត និងមានអ្នកឆ្លងកូវីដ ជាង ២សែននាក់ ក្នុងមួយថ្ងៃ រដ្ឋាភិបាលបានកាត់បន្ថយពេលវេលាអបអរបុណ្យឆ្លងឆ្នាំសកល មកនៅត្រឹម ម៉ោង ២ភ្លឺ ចំណែកប្រជាជន ត្រូវតម្រូវឲ្យពាក់ម៉ាសសាជាថ្មី។
នៅអាមេរិក ជាទីដែលមានករណីឆ្លងកូវីដច្រើនបន្ទាប់ពីអឺរ៉ុប អាជ្ញាធរសុខាភិបាលបានសង្កេតឃើញមានចំនួនកុមារដែលធ្លាក់ខ្លួនឈឺ ដោយសារកូវីដ ១៩ កើនឡើង ជាមធ្យម៦៦% បើធៀបនឹងសប្តាហ៍មុន។ តាមតួលេខផ្តល់ដោយបណ្ឌិតសភាកុមារអាមេរិក ក្នុងរលកឆ្លងថ្មី បង្កឡើងដោយអូមីក្រុង ចំនួន កុមារ ដែលឆ្លងកូវីដមានចំនួនសរុបជាង ២សែននាក់ ពោលគឺ កើនឡើង ៥០%។ អ្នកជំនាញបានពន្យល់ថា ការចាក់វ៉ាក់សាំងតិចតួចក្នុងចំណោមកុមារ ធ្វើឲ្យកុមារងាយនឹងឆ្លង ជាពិសេស នៅចំពោះមុខអូមីក្រុងដែលឆ្លងលឿនជាងមេរោគដទៃ។ លោកAnthony Fauci ទីប្រឹក្សារបស់សេតវិមានសម្រាប់វិបត្តិសុខភាពបានវាយតម្លៃថា ជាមួយអូមីក្រុងដែលឆ្លងខ្លាំង ករណីកុមារឆ្លងកូវីដនឹងអាចកើនឡើងខ្ពស់ ទៅថ្ងៃមុខ។ ម្យ៉ាង ទោះបីកុមារមិនសូវធ្លាក់ខ្លួនឈឺធ្ងន់ធ្ងរ ដូចមនុស្សចាស់ ដោយសារមេរោគអូមីក្រុង ប៉ុន្តែគេនៅ ប្រុងប្រយ័ត្ន តាមដានតទៅទៀត ដើម្បីដឹង ថា តើកុមារដែលឆ្លងកូវីដរួចហើយ នឹងអាចធា្លក់ខ្លួនឈឺរ៉ាំរ៉ៃដែរឬទេ ទៅថ្ងៃមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ