ធនាគារកណ្តាលអឺរ៉ុបថា កម្រិតអតិផរណានឹងធ្លាក់ថយមកចុះវិញ នៅអំឡុងឆ្នាំ ២០២២
នៅពេលបណ្តាប្រទេសអឺរ៉ុបកំពុងជួបវិបត្តិអតិផរណា ទំនិញឡើងថ្លៃ ធនាគារកណ្តាលអឺរ៉ុប វាយតម្លៃ នៅថ្ងៃសុក្រ ទី ១៤មករា ថា កម្រិតអតិផរណាដែលឡើងខ្ពស់ ដោយសារវិបត្តិថាមពលឡើងថ្លៃនឹងអាចធ្លាក់ថយចុះមកវិញ នៅក្នុងអំឡុង ឆ្នាំ ២០២២។ នៅប្រទេសបារាំង អត្រាអតិផរណាបានកើនឡើងក្នុងកម្រិតមួយខ្ពស់ មិនធ្លាប់មានគិតចាប់ពីឆ្នាំ ២០១៨។ នៅ៣ខែមុនការបោះឆ្នោត រដ្ឋាភិបាលបារាំងចាត់វិធានការអន្តរាគមន៍ជាច្រើនដើម្បីសម្រាលបន្ទុកប្រជាជន នៅចំពោះមុខទំនិញ ដែលកាន់តែឡើងថ្លៃ។
ចុះផ្សាយនៅថ្ងៃ៖
ស្តាប់ - ០២:១៦
បន្ថែមពីលើវិបត្តិកូវីដដែលកាន់តែតានតឹងដោយសារមេរោគអូមីក្រុង អឺរ៉ុបត្រូវរួបរឹតមួយជាន់ទៀតដោយសារវិបត្តិអតិផរណា។ ដូចអាមេរិកដែលកំពុងប្រឈមនឹងកម្រិតអតិផរណាកើនឡើងខ្ពស់ មិនធ្លាប់ក្នុងរយៈពេល ៤០ឆ្នាំចុងក្រោយ (៧% នៅខែធ្នូឆ្នាំ ២០២១) ប្រទេសសមាជិកតំបន់ចាយប្រាក់អឺរ៉ូ ដូចជា អេស្ប៉ាញក៏មានអត្រាអតិផរណាកើនឡើងដល់កម្រិតមួយដ៏ខ្ពស់ ៦,៥% ចំណែក ក្រិកមាន៥,១%។ នៅបារាំង ទំនិញ និងសេវាទូទៅឡើងថ្លៃ ប្រមាណ១,៦% ជាអត្រាទាប បើប្រៀបធៀបនឹងប្រទេសអឺរ៉ុបដទៃទៀត និងអាមេរិក ប៉ុន្តែ វានៅតែជាអត្រាដ៏ខ្ពស់ បើមើលទៅលើប្រវត្តិបញ្ហាអតិផរណានៅបារាំង ដែលខ្ពស់បំផុត គឺ១,៨% នៅឆ្នាំ២០១៨។
វិបត្តិអតិផរណានៅបណ្តាប្រទេសអឺរ៉ុប និងនៅសហរដ្ឋអាមេរិក កើតឡើងដោយសារ វិបត្តិថាមពលឡើងថ្លៃ ភាពរអាក់រអួលខាងផ្នែកដឹកជញ្ជូន ផ្គត់ផ្គង់ទំនិញ បូកផ្សំនិងតម្រូវការទំនិញ វត្ថុធាតុដើម កើតមាននៅគ្រប់កន្លែង នៅក្នុងពិភពលោក នៅក្រោយវិបត្តិកូវីដ។
តាមការវាយតម្លៃរបស់ប្រធានធនាគារកណ្តាលអឺរ៉ុប លោកស្រី Christine Lagarde កម្រិតអតិផរណានៅតំបន់ចាយប្រាក់អឺរ៉ូកើនឡើងខ្ពស់ ក៏ដោយសារតែសកម្មភាពសេដ្ឋកិច្ចចាប់មានសន្ទុះលឿនខ្លាំងនៅក្រោយវិបត្តិកូវីដ។ តម្រូវការច្រើននៃប្រភពថាមពលដើម្បីឆ្លើយតបទៅនឹងការងើបស្ទុះឡើងវិញ នៃសេដ្ឋកិច្ច បានធ្វើឲ្យតម្លៃប្រេង ឧស្ម័ន និងអគ្គិសនីឡើងថ្លៃខ្ពស់។
ប៉ុន្តែ បើតាមការព្យាកររបស់ប្រធានធនាគារកណ្តាលអឺរ៉ុប បន្ទាប់ពីកើនឡើងខ្លាំង នៅខែធ្នូចុងឆ្នាំមុន (ប្រមាណ ៥%) កម្រិតអតិផរណានៅតំបន់ចាយប្រាក់អឺរ៉ូ នឹងអាចធ្លាក់ចុះ មកវិញ នៅក្នុងអំឡុងឆ្នាំ២០២២នេះ។ ហេតុផលនោះគឺ វិបត្តិថាមពលឡើងថ្លៃ ដែលជាកត្តាជំរុញឲ្យទំនិញឡើងថ្លៃសព្វសារពើ នឹងត្រូវដោះស្រាយចេញ តាមរយៈការប្រើប្រាស់ថាមពលបៃតងដូចជាឧស្ម័ន ធម្មជាតិ។ គេរំពឹងដែរថាតម្លៃប្រេង ហ្គាសនឹងអាចធ្លាក់ថយចុះវិញ នៅពេលដែលការផ្គត់ផ្គង់ឧស្ម័នធម្មជាតិ និងថាមពលកកើតឡើងវិញ ដូចជាថាមពលបានមកពីកង្ហារខ្យល់ ឬផ្ទាំងស្រូបកំដៅព្រះអាទិត្យ មានលក្ខណៈកាន់តែសំបូរបែប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ