អាល្លឺម៉ង់ដំឡើងសំឡេងដាក់រុស្ស៊ី នៅពេលផ្លូវចរចាការទូតឲ្យវិបត្តិអ៊ុយក្រែនកាន់តែតូចចង្អៀត
រងរិះគន់ថា ប្រកាន់ជំហរធូរលុងជាមួយរុស្ស៊ី រដ្ឋាភិបាលអាល្លឺម៉ង់ បានដំឡើងសំឡេងដាក់រុស្ស៊ីកាលពីថ្ងៃអាទិត្យ ទី ១៣កុម្ភៈ។ នៅ២ថ្ងៃមុនធ្វើដំណើរទៅជួបផ្ទាល់ លោកប្រធានាធិបតីរុស្ស៊ី វ្លាឌីមៀរ ពូទីនដើម្បីបញ្ចុះបញ្ចូលឲ្យបន្ថយភាពតានតឹងនៅព្រំដែនអ៊ុយក្រែន នាយករដ្ឋមន្រ្តី អូឡាហ្វ ស្ហុលស៍ បានព្រមានពីការដាក់ទណ្ឌកម្មភា្លមៗលើរុស្ស៊ី ក្នុងករណីរុស្ស៊ីចូលរំលោភឈ្លានពានអ៊ុយក្រែន។ នៅមុនធ្វើដំណើរទៅជួបលោកពូទីន នៅទីក្រុងម៉ូស្គូ ប្រមុខរដ្ឋាភិបាលអាល្លឺម៉ង់ត្រូវចុះចតនៅទីក្រុងគៀវ នៅថ្ងៃចន្ទ ទី១៤កុម្ភៈដើម្បីជួបពិភាក្សាផ្ទាល់ជាមួយនាយករដ្ឋមន្រ្តីអ៊ុយក្រែនជាមុន។
ចុះផ្សាយនៅថ្ងៃ៖
ស្តាប់ - ០២:២១
ដោយធ្វើដំណើរទៅទីក្រុងគៀវ ទៅជួបផ្ទាល់ នាយករដ្ឋមន្រ្តីអ៊ុយក្រែន មុនទៅជួបប្រធានាធិបតីរុស្ស៊ី នៅទីក្រុងម៉ូស្គូ នាយករដ្ឋមន្រ្តីអាល្លឺម៉ង់ទំនងចង់បញ្ជាក់ថា អាល្លឺម៉ង់មិនបានលំអៀងទៅរករុស្ស៊ី របស់លោកពូទីន។ នៅថ្ងៃអាទិត្យ ប្រមុខរដ្ឋាភិបាលអាល្លឺម៉ង់ បានព្រមានរុស្ស៊ី ពីការដាក់ទណ្ឌកម្មបន្ទាន់ភ្លាម ពីសហភាពអឺរ៉ុប អាមេរិក និងអង់គ្លេស ដែលនៅក្នុងនោះ មានផងដែរ គម្រោងបំពង់ បង្ហូរឧស្ម័នពីរុស្ស៊ីទៅអាល្លឺម៉ង់។
នៅមួយថ្ងៃមុនដំណើរទស្សនកិច្ចរបស់នាយករដ្ឋមន្រ្តីអាល្លឺម៉ង់ នៅទីក្រុងគៀវ ប្រភពមន្រ្តីរដ្ឋាភិបាលអាល្លឺម៉ង់បានពន្លយ ឲ្យដឹងកាលពីថ្ងៃអាទិត្យថា រដ្ឋាភិបាលអាល្លឺម៉ង់កំពុងគ្រោងបង្កើនជំនួយសេដ្ឋកិច្ចសម្រាប់អ៊ុយក្រែន។
គួរំលឹកថា ចាប់តាំងពីរុស្ស៊ីកាត់យកទឹកដីគ្រីមេ របស់អ៊ុយក្រែននៅឆ្នាំ ២០១៤ អាល្លឺម៉ង់ជាប្រទេសនាំមុខគេខាងផ្តល់ជំនួយហិរញ្ញវត្ថុទ្វេភាគី ដែលមានប្រមាណ ២ពាន់លានអឺរ៉ូ។ បន្ថែមពីលើនោះ មានជំនួយឥណទាន របស់អាល្លឺម៉ង់ ៥០០លានដុល្លារសម្រាប់ជួយទ្រទ្រង់សេដ្ឋកិច្ចអ៊ុយក្រែន។
អាល្លឺម៉ង់កំពុងពិចារណា បង្កើនជំនួយសេដ្ឋកិច្ច ប៉ុន្តែ នៅតែបដិសេធមិនព្រមលក់ ប្រគល់អាវុធទៅឲ្យអ៊ុយក្រែន ទោះប្រធានាធិបតីអាមេរិកបញ្ជាក់សាជាថ្មី កាលពីថ្ងៃអាទិត្យ ថា អ៊ុយក្រែនកំពុងប្រឈមនឹងការរំលោភចូលឈ្លានពាន គ្រប់ពេលវេលាពីសំណាក់កងទ័ពរុស្ស៊ី។ ដោយប្រកាន់គោលនយោបាយមិនបញ្ជូនទៅកាន់តំបន់ជម្លោះប្រដាប់អាវុធ ដែលអាល្លឺម៉ង់ បានអនុវត្ត ចាប់តាំងពីសម័យណាហ្ស៊ី អាល្លឺម៉ង់បានប្រឆាំងដាច់ខាត រហូតមក មិនឲ្យគេបញ្ជូនសព្វាវុធរបស់អាល្លឺម៉ង់ សម្រាប់បេសកកម្មអូតង់ ទៅកាន់ប្រទេសអ៊ុយក្រែន។
នៅមុនទស្សនកិច្ចរបស់នាយករដ្ឋមន្រ្តីអាល្លឺម៉ង់ រដ្ឋាភិបាលអ៊ុយក្រែនបានបញ្ជូនបញ្ជីមួយទៅឲ្យភាគីអាល្លឺម៉ងពិចារណា។ តាមកាសែតក្នុងស្រុកអាល្លឺម៉ង់ ក្នុងបញ្ជីនោះ ក្រុងគៀវប្រថ្នាចង់បានប្រព័ន្ធខែលមីស៊ីល ប្រព័ន្ធប្រឆាំងដ្រូន ប្រព័ន្ធកំណត់ទីតាំងគ្រឿងអេឡិចត្រូនិក ឧបករណ៍សម្រាប់ឆ្លុះមើលពេលយប់ ហើយនិងអាវុធគ្រាប់បែក។ ប៉ុន្តែមន្រ្តីរដ្ឋាភិបាលអាល្លឺម៉ង់បានពន្លយឲ្យដឹងថា ទាក់ទងនឹងបញ្ជីសំណើរបស់អ៊ុយក្រែន គេមិនអាចទន្ទឹងរង់ចាំអ្វីធំដំពីដំណើរទស្សនកិច្ចរបស់នាយករដ្ឋមន្រ្តីអាល្លឺម៉ង់ នៅទីក្រុងគៀវនៅថ្ងៃចន្ទនោះទេ។
អាល្លឺម៉ង់អាចពិចារណាសំណើចង់បានឧបករណ៍ឆ្លុះមើលពេលយប់ ដែលអាល្លឺម៉ង់ មានច្រើនលើសពីតម្រូវការ ចំណែកសព្វាវុធផ្សេងទៀត ដែលអ៊ុយក្រែនចង់បាននោះ គឺអាល្លឺម៉ង់មានត្រឹមប្រើសម្រាប់ខ្លួនឯងប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ