អឺរ៉ុបបើកជំនួបកំពូលជាមួយអាហ្វ្រិកដើម្បីប្រជែងឥទ្ធិពលជាមួយចិន និងរុស្ស៊ីនៅអាហ្វ្រិក
នៅក្នុងជំនួបកំពូលអាហ្វ្រិក អឺរ៉ុប បើកធ្វើ នៅថ្ងៃព្រហស្បតិ៍ និងថ្ងៃសុក្រនេះ សហភាពអឺរ៉ុប និងមេដឹកនាំបណ្តាប្រទេសអាហ្រ្វិក ត្រូវពិភាក្សា ចរចាគ្នា ដើម្បីរកផ្លូវដើរថ្មី សម្រាប់ទំនាក់ទំនង សហប្រតិបត្តិការរវាងទ្វីបទាំងពីរ។ ជំនួបកំពូលអាហ្វ្រិក អឺរ៉ុបបើកធ្វើឡើងនៅចំថ្ងៃ ដែលបារាំង និងសម្ព័ន្ធមិត្តអឺរ៉ុប ប្រកាសជាផ្លូវការដកទ័ពចេញពីម៉ាលី ប្រទេសមួយនៅអាហ្វ្រិកខាងលិច ដែលងាកទៅចាប់ដៃសហការជាមួយទាហានស៊ីឈ្នួលរុស្ស៊ី នៅក្រោយរដ្ឋប្រហារយោធា។
ចុះផ្សាយនៅថ្ងៃ៖
ស្តាប់ - ០២:៣៨
ភាពជាដៃគូរវាងអឺរ៉ុប និងអាហ្វ្រិកត្រូវឈរនៅលើការដោះដូរ និងចែករំលែកគ្នា។ នេះជាសាររួមរបស់ប្រធានសហភាពអឺរ៉ុប លោកCharles Michel និងប្រធានសហភាពអាហ្វ្រិក នៅថ្ងៃបើកជំនួបកំពូលអាហ្វ្រិកអឺរ៉ុបលើកទី ៦ នៅទីក្រុងព្រុចស៊ែល ប្រទេសបែលហ្សិក។
នៅក្នុងជំនួបកំពូលដែលមានការចូលរួមពីមេដឹកនាំប្រទេសអាហ្វ្រិកចំនួន ៤០ ក្នុងចំណោមសមាជិកសរុប៥៥ប្រទេសរបស់សហភាពអាហ្វ្រិក សន្តិសុខ ស្ថិរភាពនិងសុខភាពនៅទឹកដីអាហ្វ្រិក ជាសំណុំរឿងសំខាន់ ដែលថ្នាក់ដឹកនាំបណ្តាប្រទេសអាហ្វ្រិក និងមេដឹកនាំប្រទេសសមាជិកសហភាពអឺរ៉ុបត្រូវជជែកគ្នា ដើម្បីផ្តល់សន្ទុះថ្មីដល់ទំនាក់ទំនង ភាពជាដៃគូរវាងទ្វីបទាំងពីរ។
រដ្ឋប្រហារ ជម្លោះប្រដាប់អាវុធ ភេរវនិយម ការជួញដូរមនុស្ស និងចោរសមុទ្រ នៅទឹកដីអាហ្វ្រិក ក៏កំពុងជះផលអាក្រក់មកលើអឺរ៉ុប ដូចជាបញ្ហាលំហូរជនអន្តោប្រវេសន៍មកពីអាហ្វ្រិក។ តាមប្រមុខការទូតអឺរ៉ុប លោកJosep Borrell អឺរ៉ុបមិនអាចជួយអាហ្វ្រិក ដែលស្គាល់តែអសន្តិសុខ អស្ថិរភាព បានឡើយ។ អាហ្វ្រិកកាន់តែរងរញ្ជួយដោយអស្ថិរភាព ដោយសារមានការលូកដៃពីតួអង្គ ចិន និងរុស្ស៊ី ដែលមានវិធីសាស្រ្ត និងគោលដៅ នៅទឹកដីអាហ្វ្រិក ខុសប្លែកពីអឺរ៉ុប។
វត្តមានរបស់កងទ័ពស៊ីឈ្នួលរបស់ក្រុមហ៊ុនWagner សម្រាប់ការពារប្រយោជន៍ក្រុមហ៊ុនឯកជនរុស្ស៊ី នៅតាមបណ្តាប្រទេសនៅអាហ្វ្រិក កំពុងបង្កអស្ថិរភាព នៅក្នុងតំបន់ដែលដើរតួនាទី សំខាន់របស់សហភាពអឺរ៉ុប។ នៅទ្វីបអាហ្វ្រិក ដែលសំបូរដោយធនធានរ៉ែ វត្ថុធាតុដើម ប្រទេសអឺរ៉ុបត្រូវប្រឈមផងដែរនឹងមហាអំណាចចិន ដែលកំពុងចាក់គ្រឹះឥទ្ធិពល នៅអាហ្វ្រិក ដើម្បីប្រយោជន៍សេដ្ឋកិច្ច។
ភូមិសាស្រ្តនយោបាយ និងភាពសំបូរធនធានរ៉ែ បានធ្វើឲ្យអាហ្វ្រិក ក្លាយជាគោលដៅចង់បានពីគ្រប់ទិស។ សម្រាប់ប្រមុខការបរទេសអឺរ៉ុប អាហ្វ្រិកមានជម្រើសច្រើន ប៉ុន្តែ សហភាពអឺរ៉ុបគ្រាន់តែបញ្ជាក់ទៅបណ្តាប្រទេសនៅអាហ្វ្រិកថា ភាពជាដៃគូដែលអឺរ៉ុបស្នើទៅឲ្យអាហ្វ្រិក គឺនវានុវត្តន៍ និងការគោរពសិទ្ធិ ជនជាតិអាហ្វ្រិក ពោលគឺមិនមែនមហិច្ឆតាធ្វើអាណានិគមនោះទេ។
សហភាពអឺរ៉ុបចង់ពិនិត្យមើលឡើងផងដែរ ជំនួយគាំទ្រហិរញ្ញវត្ថុ សម្រាប់អាហ្វ្រិក។ ទឹកប្រាក់១៥០ពាន់លានអឺរ៉ូ ត្រូវបានសហភាពអឺរ៉ុបគ្រោង សម្រាប់ការវិនិយោគ នៅអាហ្វ្រិក ដូជា ហេដ្ឋារចនាសម្ព័ន្ធ និងសម្រាប់គម្រោងការដែលជនជាតិអាហ្វ្រិកស្នើឡើងសម្រាប់អភិវឌ្ឍសេដ្ឋកិច្ចរបស់ខ្លួន។ វាជាផ្នែកមួយនៃយុទ្ធសាស្រ្តរបស់អឺរ៉ុប ដែលបានគ្រោងទឹកប្រាក់សរុប ៣០០ពាន់លានអឺរ៉ូ សម្រាប់គម្រោងវិនិយោគលើហេដ្ឋារចនាសម្ព័ន្ធ នៅក្នុងពិភពលោក ពីពេលនេះ ដល់ឆ្នាំ ២០២៧ ក្នុងគោលដៅ ប្រជែងទប់ទល់មហិច្ឆតារបស់មហាអំណាចចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ