អាមេរិកប្រកាសផ្តល់ជំនួយយោធាក្នុងតម្លៃ៣៥០លានដុល្លារដល់អ៊ុយក្រែន
ខណៈការប្រយុទ្ធគ្នាកំពុងបន្តមានក្នុងរដ្ឋធានីគៀវ និងតំបន់ផ្សេងៗទៀតនៃប្រទេសអ៊ុយក្រែន អាមេរិកបានប្រកាសនៅថ្ងៃសៅរ៍ ២៦កុម្ភៈ ផ្តល់ជំនួយយោធាបន្ថែមតម្លៃ ៣៥០លានដុល្លារដល់អ៊ុយក្រែន។ ប្រមុខការបរទេសអាមេរិកលោក អង់តូនី ប្ល៊ីងកិននិយាយថាជំនួយនេះគឺសម្រាប់អ៊ុយក្រែនយកទៅការពារខ្លួនពីការវាយប្រហារដ៏ឃោរឃៅ និងមិនញញើតរបស់រុស្ស៊ី។
ចុះផ្សាយនៅថ្ងៃ៖
ស្តាប់ - ០២:១៩
ជំនួយយោធាថ្មីរបស់អាមេរិកនឹងរួមបញ្ចូលសព្វាវុធការពារខ្លួនបន្ថែមទៀតដើម្បីជួយឲ្យអ៊ុយក្រែនមានសមត្ថភាពប្រឆាំងទល់នឹងរថពាសដែក ការពារខ្លួនពីការវាយប្រហារតាមអាកាស និងការគំរាមកំហែងផ្សេងទៀតដែលអ៊ុយក្រែនកំពុងប្រឈមមុខក្នុងសង្គ្រាមនាពេលនេះ។
ជំនួយថ្មីខាងលើធ្លាក់មកក្រោយការដាក់ទណ្ឌកម្មជាច្រើនរបស់សហរដ្ឋអាមេរិក និងលោកខាងលិចប្រឆាំងទល់នឹងរុស្ស៊ីរបស់ពូទីនដែលបើការវាយលុកលុយឈ្លានពានអ៊ុយក្រែន។ លោកប្រមុខការបរទេសអាមេរិកប្ល៊ីងកិនបាននិយាយនៅថ្ងៃសៅរ៍ ទី២៦ កុម្ភៈថា ជំនួយយោធារបស់អាមេរិកនេះគឺជាសញ្ញាថ្មីមួយទៀតដែលបញ្ជាក់យ៉ាងច្បាស់ថាអាមេរិកឈរនៅជាមួយប្រជាជនអ៊ុយក្រែន ខណៈពួកគេកំពុងតែតស៊ូការពារអធិបតេយ្យភាពរបស់ខ្លួនប្រកបដោយក្តីក្លាហាន។
គួរបញ្ជាក់ថា អាមេរិកបានប្រកាសផ្តល់ជំនួយយោធាបន្ថែមដល់អ៊ុយក្រែន នៅខណៈដែលមូស្គូចោទក្រុងគៀវថាបដិសេធកិច្ចចរចា។ ដោយសំអាងលើហេតុផលនេះ រុស្ស៊ីបានបន្តការវាយប្រហារទៀតទៅលើអ៊ុយក្រែន។ រដ្ឋាភិបាលក្រុងគៀវបានច្រានចោលនូវការលើកឡើងរបស់មូស្គូ និងថាខ្លួនបានត្រៀមខ្លួនរួចជាស្រេចក្នុងការចរចាជាមួយមេដឹកនាំរុស្ស៊ី ដើម្បីឈានទៅបិទបញ្ចប់ការប្រយុទ្ធគ្នា។
ដោយឡែក ខណៈរុស្ស៊ីនៅបន្តប្រតិបត្តិការសឹកលើអ៊ុយក្រែន សមាជិកអង្គការអូតង់ទាំង ៣០ប្រទេសបានឯកភាពគ្នាដាក់ពង្រាយកងកម្លាំងឆ្លើយតបរហ័សរបស់ខ្លួន នៅអឺរ៉ុបខាងកើតដើម្បីត្រៀមប្រឈមនឹងការឈ្លានពានរបស់រុស្ស៊ីលើអ៊ុយក្រែន។ យ៉ាងណាក៏ដោយ អង្គការអូតង់នឹងមិនបញ្ជូនកងទ័ពទៅក្នុងប្រទេសអ៊ុយក្រែនឡើយ ព្រោះអ៊ុយក្រែនមិនមែនជាសមាជិករបស់ខ្លួន។
គួរបញ្ជាក់ដែរថា កងកម្លាំងឆ្លើយតបរហ័សរបស់អូតង់មានសរុបទាំងអស់មានប្រមាណ ៤ម៉ឺននាក់ និងត្រូវបានបង្កើតឡើងក្នុងឆ្នាំ ២០០២ ដើម្បីពន្លឿនសមត្ថភាពឆ្លើយតបរបស់អូតង់ដែលរួមមានកម្លាំងទ័ពជើងគោក ផ្លូវអាកាស សមុទ្រ និងកងកម្លាំងប្រតិបត្តិការពិសេស និងមានបំណងឆ្លើយតបទៅនឹងបញ្ហាប្រឈមជាច្រើនផ្សេងទៀត។ ប្រទេសបារាំងនឹងបញ្ជូនយោធាចំនួន ៥០០ នាក់ទៅកាន់ប្រទេសរូម៉ានីក្នុងបេសកកម្មថ្មីរបស់អូតង់ថ្មីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ