សង្គ្រាមអ៊ុយក្រែន ៖ ស្វីស សិង្ហបុរី អាមេរិកផ្តើមដាក់ទណ្ឌកម្មលើរុស្ស៊ី ដូចអឺរ៉ុប
ទន្ទឹមនឹងសេចក្តីប្រកាសរបស់សហរដ្ឋអាមេរិកបិទខ្ទប់សកម្មភាពដោះដូរលុយរបស់ធនាគារកណ្តាលរុស្ស៊ីនៅបរទេស ស្វីស សិង្ហបុរី ប្រទេសដែលគ្មានទម្លាប់លូកលាន់ដាក់ទណ្ឌកម្មសោះ បានសម្រេចដើរតាមគំរូអឺរ៉ុប ដាក់ទណ្ឌកម្មហិរញ្ញវត្ថុលើរុស្ស៊ី និងរូបលោកពូទីនផ្ទាល់តែម្តងផង។ នេះបើតាមសេចក្តីជូនដំណឹងរបស់ប្រមុខដឹកនាំប្រទេសស្វីស និងប្រទេសសិង្ហបុរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ស្វីសបានសម្រេចចិត្ត ដោយច្បាស់លាស់ ប្រកបដោយវិចាណញ្ញាណ ដាក់ទណ្ឌកម្មសេដ្ឋកិច្ចលើរុស្ស៊ី តាមគំរូទណ្ឌកម្មរបស់អឺរ៉ុបទាំងស្រុង ហើយថែមទាំងសម្រេចដាក់ទណ្ឌកម្មលើរូបលោកវ្លាដេមៀ ពូទីនផ្ទាល់ទៀត។ ទ្រព្យធនរបស់បុគ្គលនិងឥស្សរជនរុស្ស៊ីក្នុងបញ្ជីខ្មៅអឺរ៉ុប ត្រូវបង្កកភ្លាម។ នេះបើតាមការគូសបញ្ជាក់របស់រដ្ឋមន្ត្រីក្រសួងហិរញ្ញវត្ថុស្វីស នៅថ្ងៃចន្ទទី ២៨ កុម្ភៈ អមដោយសេចក្តីបញ្ជាក់របស់រដ្ឋមន្ត្រីក្រសួងយុត្តិធម៌ថា មហាសេដ្ឋី បុគ្គលស្និទ្ធនឹងលោកពូទីន ដែលមានចំណងទំនាក់ទំនងសេដ្ឋកិច្ចខ្លាំងជាមួយស្វីស ត្រូវជាប់បម្រាមមិនឱ្យចូលជាន់ទឹកដីស្វីសទេ។
ចំណែកសិង្ហបុរី បានប្រកាសនៅក្នុងថ្ងៃចន្ទនេះដូចគ្នា បិទខ្ទប់រាល់គ្រប់សកម្មភាពដោះដូរហិរញ្ញវត្ថុ របស់ធនាគាររុស្ស៊ីមួយចំនួន និងបង្កើនការត្រួតពិនិត្យការនាំចេញលុយណាដែលអាចយកទៅប្រើប្រាស់ជាប្រយោជន៍ប្រឆាំងនឹងអ៊ុយក្រែន។ សិង្ហបុរីកម្រដាក់ទណ្ឌកម្មប្រឆាំងនឹងប្រទេសផ្សេងដោយគ្មានសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិណាស់ ប៉ុន្តែការវាយប្រហាររបស់រុស្ស៊ីលើអ៊ុយក្រែន ជាទង្វើធ្ងន់ធ្ងរមិនធ្លាប់មាន ទើបសិង្ហបុរីអត់មិនបញ្ចេញទណ្ឌកម្មមិនបាន។ នេះបើតាមសេចក្តីប្រកាសរបស់រដ្ឋមន្ត្រីក្រសួងការបរទេសសិង្ហបុរី ដោយបានបន្ថែមទៀតថា រដ្ឋាភិបាលសិង្ហបុរី កំពុងរៀបចំគម្រោងទណ្ឌកម្មពិសេសផ្សេង ដែលនឹងប្រកាសជូនដំណឹងនៅពេលក្រោយ។ ក្រៅពីទណ្ឌកម្ម ក្រុមហ៊ុនអាកាសចរណ៍សិង្ហបុរីក៏បានប្រកាសនៅថ្ងៃទី ២៨កុម្ភៈ ផ្អាកជើងហោះហើរទៅម៉ូស្គូមួយរយៈ។
ហើយដើម្បីបន្សាបអំណាចធនាគារកណ្តាលរុស្ស៊ី សហរដ្ឋអាមេរិកក៏បានប្រកាសហាមឃាត់ភ្លាមដែរ បិទរាល់គ្រប់សកម្មភាពដោះដូរហិរញ្ញវត្ថុជាមួយធនាគាររុស្ស៊ី ចាប់ពីថ្ងៃចន្ទទី ២៨កុម្ភៈនេះទៅ ក្នុងបំណងបង្កករាល់គ្រប់ទ្រព្យធនរបស់ធនាគារកណ្តាលរុស្ស៊ី មិនថាលុយនោះជារបស់បុគ្គលណាម្នាក់ជាជនជាតិអាមេរិកទេ។ ដាក់ទណ្ឌកម្មដោយមានការសម្របសម្រួលគ្នា ភ្ជាប់នឹងទណ្ឌកម្មអឺរ៉ុប នឹងធ្វើឱ្យសេដ្ឋកិច្ចរុស្ស៊ីវិលវល់ ក្នុងវិបត្តិអតិផរណាឡើងខ្ពស់ខ្លាំង ការវិនិយោគដាំក្បាលចុះ។ នេះជាការព្យាករណ៍របស់អាមេរិក។
សូមរំលឹកថា នៅថ្ងៃអាទិត្យទី ២៧កុម្ភៈ សហភាពអឺរ៉ុប សហការជាមួយក្រុមប្រទេសមហាឧស្សាហកម្មហ្សេ៧ បានសម្រេចដករុស្ស៊ីចេញពីប្រព័ន្ធប្រតិបត្តិការធនាគារអន្តរជាតិ Swift និងបិទដែនអាកាសអឺរ៉ុបមិនឱ្យយន្តហោះរុស្ស៊ីឆ្លងកាត់ទេ។ វិធានការនេះបានធ្វើឱ្យប្រាក់រូប្លិ៍រុស្ស៊ីធ្លាក់ថ្លៃជាប្រវត្តិសាស្ត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ