មូស្គូព្រមានរដ្ឋមន្ត្រីបារាំងជុំវិញរឿងប្រកាសធ្វើសង្គ្រាមសេដ្ឋកិច្ចប្រឆាំងរុស្ស៊ី
រដ្ឋមន្ត្រីហិរញ្ញវត្ថុបារាំងលោក ប៊្រុយណូ ឡឺម៊ែរ (Bruno Le Maire) បាននិយាយនៅថ្ងៃអង្គារ ១មីនាថា អឺរ៉ុបកំពុងធ្វើសង្គ្រាមផ្តួលរំលំសេដ្ឋកិច្ចរបស់រុស្ស៊ី ដើម្បីជាការដាក់ទណ្ឌកម្មចំពោះមូស្គូដែលឈា្លនពានអ៊ុយក្រែន។ ភ្លាមមួយរំពេច មន្ត្រីជាន់ខ្ពស់វិមានក្រេមឡាំងបានចេញព្រមានឲ្យរដ្ឋមន្ត្រីបារាំងប្រយ័ត្នសម្តីរបស់ខ្លួន និងបានគំរាមពីគ្រោះថ្នាក់ដែលកើតចេញពីសង្គ្រាមសេដ្ឋកិច្ចរវាងអឺរ៉ុបជាមួយនឹងរុស្ស៊ី។
ចុះផ្សាយនៅថ្ងៃ៖
ស្តាប់ - ០២:២៧
"យើងកំពុងធ្វើទាំងសង្គ្រាមសេដ្ឋកិច្ច និងហិរញ្ញវត្ថុលើរុស្ស៊ី"។ "យើងនឹងធ្វើឲ្យសេដ្ឋកិច្ចរុស្ស៊ីដួលរលំ"។ នេះគឺជាសម្តីរបស់រដ្ឋមន្ត្រីហិរញ្ញវត្ថុបារាំងដែលបានទៅប្រាប់វិទ្យុ Franceinfoកាលពីព្រឹកថ្ងៃអង្គារម្សិលិញក្រោយពីបារាំង សហភាពអឺរ៉ុប និងប្រទេសជាច្រើនទៀតប្រកាសថានឹងបន្ថែមទណ្ឌកម្មថ្មីលើទីក្រុងមូស្គូ។
នៅថ្ងៃអង្គារដដែលនោះ អតីតប្រធានាធិបតីរុស្ស៊ីលោក ឌីមីទ្រី មេដវេដេវ (Dmitry Medvedev) ដែលបច្ចុប្បន្នមានឋានៈជាមន្ត្រីសន្តិសុខជាន់ខ្ពស់រុស្ស៊ីបានឆ្លើយតបតាមរយៈសារធ្វីតវិញថា "រដ្ឋមន្ត្រីបារាំងខ្លះបានប្រកាសសង្គ្រាមសេដ្ឋកិច្ចប្រឆាំងរុស្ស៊ី។ សូមប្រយ័ត្នសម្តីរបស់អ្នក សុភាពបុរសទាំងឡាយ។ ហើយចូរកុំភ្លេចថានៅក្នុងប្រវត្តិសាស្ត្រមនុស្សជាតិ សង្រ្គាមសេដ្ឋកិច្ចជារឿយៗតែងនាំនូវគ្រោះថ្នាក់ធំ"។
បន្តិចក្រោយមក រដ្ឋមន្ត្រីហិរញ្ញវត្ថុបារាំងបានប្រាប់ទីភ្នាក់សារព័ត៌មាន AFP ថាភាសានិយាយរបស់លោកមិនសមរម្យ និងបញ្ជាក់បន្ថែមទៀតថាអឺរ៉ុបគ្មានជម្លោះជាមួយប្រជាជនរុស្ស៊ីឡើយ។
គួរកត់សម្គាល់ថា ទោះស្ថិតក្នុងកាលៈទេសៈសង្គ្រាមក្តីក៏លោកប្រធានាធិបតីបារាំងម៉ាក្រុងបានព្យាយាមបន្តបើកកិច្ចសន្ទនាជាមួយសមភាគីរុស្ស៊ីលោកពូទីនដែរ។ ហើយមេដឹកនាំទាំងពីរក៏បានជជែកគ្នាតាមទូរសព្ទម្តងទៀតកាលពីថ្ងៃចន្ទ ទី២៨ កុម្ភៈ ឆ្នាំ២០២២។
ក៏ប៉ុន្តែ ក្នុងពេលជាមួយគ្នានេះរដ្ឋមន្ត្រីបារាំងបាននិងកំពុងប្រើវោហាសាស្ត្រមិនប្រាកដប្រជាកាន់តែខ្លាំងឡើងដើម្បីពិពណ៌នាអំពីយុទ្ធសាស្ត្ររបស់លោកខាងលិចក្នុងការព្យាយាមច្របាច់កសេដ្ឋកិច្ចរុស្ស៊ី និងការចាត់វិធានប្រឆាំងក្រុមអ្នកជំនួញគ្រាក់ៗដែលស្និទ្ធនឹងលោកពូទីន។
ជាក់ស្តែងកាលពីយប់ថ្ងៃចន្ទដើមសប្តាហ៍ រដ្ឋមន្ត្រីការបរទេសបារាំងលោក Jean-Yves Le Drian បានប្រាប់ទូរទស្សន៍ BFM ថាក្រុមសេដ្ឋីជំនួញដ៏មានឥទ្ធិពលរបស់រុស្ស៊ីគួរមានការប្រុងប្រយ័ត្ន ព្រោះថាក្នុងបញ្ជីរបស់អឺរ៉ុបមានកំណត់គោលដៅក៏ដូចជាមុខសញ្ញាសំខាន់ៗរួចអស់ហើយ។
គួររំឭកដែរថា ដើម្បីឆ្លើយតបនឹងទង្វើរបស់រុស្ស៊ីដែលវាយប្រហារលើអ៊ុយក្រែន សហរដ្ឋអាមេរិក និងបណ្តាសម្ព័ន្ធមិត្តបានដាក់ទណ្ឌកម្មលើធនាគារកណ្តាលរុស្ស៊ី អ្នកជំនួញស្និទ្ធនឹងក្រុងមូស្គូ ប្រធានាធិបតីពូទីននិងមន្ត្រីរដ្ឋរបស់លោក ព្រមទាំងបានដកធនាគាររុស្ស៊ីចេញពីប្រព័ន្ធទូទាត់លុយអន្តរជាតិ SWIFT ទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ