លោកពូទីនបញ្ជាក់ប្រាប់លោកម៉ាក្រុងពីលក្ខខណ្ឌដែលរុស្ស៊ីព្រមបញ្ឈប់សង្គ្រាម
ខណៈដែលកងទ័ពរុស្ស៊ីនៅបន្តការវាយប្រហារលើអ៊ុយក្រែន កាលពីថ្ងៃចន្ទ ទី២៨ កម្ភៈម្សិលមិញនេះ លោកពូទីននៅក្នុងកិច្ចសន្ទនាតាមទូរសព្ទជាមួយលោកប្រធានាធិបតីបារាំងម៉ាក្រុង បានបញ្ជាក់ប្រាប់ពីលក្ខខណ្ឌធំៗដែលត្រូវបំពេញដើម្បីឲ្យរុស្ស៊ីព្រមបញ្ឈប់ប្រតិបត្តិការយោធានៅអ៊ុយក្រែន។ តើលក្ខខណ្ឌទាំងនោះមានអ្វីខ្លះ?
ចុះផ្សាយនៅថ្ងៃ៖
ស្តាប់ - ០២:១៩
ការដាក់លក្ខខណ្ឌរបស់លោកពូទីននេះ ធ្លាក់មកនៅស្របពេលដែលការចរចារវាងអ៊ុយក្រែន និងរុស្ស៊ីកាលពីថ្ងៃចន្ទម្សិលមិញបញ្ចប់ទៅដោយគ្មានសម្រេចបានលទ្ធផលឡើយ។ លោក ពូទីន បានបញ្ជាក់ប្រាប់លោកម៉ាក្រុងថាសង្គ្រាមនឹងអាចបញ្ចប់ទៅបាន ល្គឹកណាតែផលប្រយោជន៍សន្តិសុខស្របច្បាប់របស់រុស្ស៊ីត្រូវបានគេយកទៅពិចារណាដោយឥតលក្ខខណ្ឌ ដែលនេះរួមមានការទទួលស្គាល់អធិបតេយ្យភាពរបស់រុស្ស៊ីនៅគ្រីមេ ការរំសាយកងទ័ពអ៊ុយក្រែន ការទម្លាក់រដ្ឋាភិបាលក្រុងកៀវបច្ចុប្បន្នពីអំណាច និងចុងក្រោយគេគឺការធានានូវស្ថានភាពអព្យាក្រឹតរបស់អ៊ុយក្រែន។
នាខណៈពេលនេះ គេនៅមិនទាន់ដឹងនោះទេថាតើលោកប្រធានាធិបតីបារាំងម៉ាក្រុងដែលជាប្រធានផ្លាស់វេនអឺរ៉ុបនឹងឆ្លើយតបយ៉ាងដូចម្តេចនោះទៅកាន់លក្ខខណ្ឌដែលលោកពូទីនបានបញ្ជាក់ប្រាប់លោកតាមទូរសព្ទកាលពីថ្ងៃចន្ទម្សិលមិញ។ ក៏ប៉ុន្តែលក្ខខណ្ឌដែលវិមានក្រេមឡាំង បានដាក់ដើម្បីជាថ្នូរក្នុងការបញ្ឈប់សង្គ្រាមនៅអ៊ុយក្រែននេះត្រូវបានគេមើលឃើញថាជាលក្ខខណ្ឌមិនងាយស្រួលសោះឡើយ។
គួរជ្រាបថាកាលពីថ្ងៃចន្ទម្សិលមិញ គណៈប្រតិភូរស្ស៊ី និងអ៊ុយក្រែនបានជួបចរចាគ្នាជាលើកដំបូង ចាប់តាំងពីផ្ទុះសង្គ្រាមកាលពីសប្តាហ៍មុនមក។ ជំនួបលោកទី ១បញ្ចប់ទៅដោយគ្មានលទ្ធផលទេ ហើយភាគីទាំងសងខាងបានព្រមព្រៀងជួបចរចាគ្នាជុំទីពីរទៀតក្នុងពេលឆាប់ៗនេះ។
គួររំឭកជូនដែរថា នៅក្នុងកិច្ចចរចាកាលពីម្សិលមិញអ៊ុយក្រែនបានទាមទារឲ្យមានបទឈប់បាញ់ជាបន្ទាន់ជាមួយរស្ស៊ី និងបានទាមទារឲ្យរុស្ស៊ីដកកងទ័ពចេញពីទឹកដីអ៊ុយក្រែនភ្លាមៗផងដែរ។
នាខណៈនេះ ផ្លូវឈានឆ្ពោះទៅដោះស្រាយសង្គ្រាមនៅអ៊ុយក្រែនត្រូវគេមើលឃើញថាពិបាកស្មុគស្មាញខ្លាំងណាស់ ហើយខណៈដែលចំនួនជនស៊ីវិលស្លាប់កាន់តែច្រើនឡើង គេបានចោទជាសំណួរឡើងថាតើរយៈពេលប៉ុន្មានទៀតទៅទើបសង្គ្រាមនេះចប់?
បើតាមអាជ្ញាធរអ៊ុយក្រែន មានជនស៊ីវិលជាង ៣៥០នាក់ក្នុងនោះមានកុមារ ១៤នាក់ត្រូវបានសម្លាប់ ចាប់តាំងពីរុស្ស៊ីវាយឈ្លានពានអ៊ុយក្រែននាថ្ងៃទី២៤ កម្ភៈមក។ ចំណែកមនុស្សដែលរត់ភៀសខ្លួនចេញពីប្រទេសអ៊ុយក្រែនវិញកើនឡើងដល់ជាងកន្លះលាននាក់ហើយ និងកំពុងបន្តកើនឡើងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ