គម្រោងលក់ក្លឹបបាល់ទាត់ឈែលស៊ី ត្រូវផ្អាក ដោយសារតែម្ចាស់ក្លឹបជាជនជាតិរុស្ស៊ី ត្រូវជាប់ទណ្ឌកម្មអង់គ្លេស
ថ្ងៃព្រហស្បតិ៍ទី១០មីនា រដ្ឋាភិបាលអង់គ្លេសបានបន្ថែមទណ្ឌកម្ម ទៅលើរុស្ស៊ី ដោយបានបង្កកទ្រព្យសម្បត្តិមហាសេដ្ឋីរុស្ស៊ីជាច្រើននាក់ទៀត ដែលស្និទ្ធនឹងរដ្ឋាភិបាលលោកពូទីន។ ក្នុងចំណោមមហាសេដ្ឋីរុស្ស៊ី ដែលរងទណ្ឌកម្មទាំងនេះ គឺមានលោក Roman Abramovitch ដែលជាម្ចាស់កម្មសិទ្ធិក្លឹបបាល់ទាត់ឈែលស៊ី។ មុនពេលរងទណ្ឌកម្ម មហាសេដ្ឋីរុស្ស៊ីរូបនេះ បានព្យាយាមអំពាវនាវ លក់ក្លឹបឈែលស៊ី តែពេលនេះគម្រោងលក់ ត្រូវជាប់គាំងដោយសារតែទណ្ឌកម្ម របស់រដ្ឋាភិបាលអង់គ្លេស។
ចុះផ្សាយនៅថ្ងៃ៖
ស្តាប់ - ០២:៤៩
វាសនាអនាគតនៃក្លឹបបាល់ទាត់ឈែលស៊ី (Chelsea) កំពុងត្រូវព្យួរទុកមួយកន្លែង ដោយសារតែទណ្ឌកម្ម របស់រដ្ឋាភិបាលអង់គ្លេស ដាក់ទៅលើមហាសេដ្ឋីរុស្ស៊ី។ ក្លឹបបាល់ទាត់នេះ គឺជាកម្មសិទិ្ធរបស់លោក Roman Abramovitch មហាសេដ្ឋីរុស្ស៊ី ដែលគ្រប់គ្នាដឹងថា មានទំនាក់ទំនងស្និទ្ធជាមួយរដ្ឋាភិបាលរបស់លោកពូទីន។
ចាប់ពីពេលនេះទៅ លោក Roman Abramovitch មិនអាចធ្វើប្រតិបត្តិការទិញលក់អ្វីទាំងអស់ មិនថាជាមួយបុគ្គលឯកជន ឬក្រុមហ៊ុនអង់គ្លេសណាមួយឡើយ។ តែយ៉ាងណា រដ្ឋាភិបាលអង់គ្លេស បានចេញអាជ្ញាបណ្ណ ឲ្យក្លឹប Chelsea អាចបន្តសកម្មភាពប្រកួតបានធម្មតា ហើយអាចបង់ប្រាក់ខែទៅបុគ្គលិក និងកីឡាករដូចប្រក្រតី។ អ្នកនាំពាក្យរដ្ឋាភិបាល បានបញ្ជាក់ថា រដ្ឋាភិបាលអាចនឹងពិនិត្យ ចេញអាជ្ញាបណ្ណមួយថ្មីទៀត ដើម្បីអនុញ្ញាតឲ្យគេលក់ក្លឹបបាល់ទាត់ Chelsea។ ក៏ប៉ុន្តែ លោក Roman Abramovitch ដែលជាម្ចាស់ក្លឹបនេះ មិនអាចទទួលបានប្រាក់ចំណេញ ពីការលក់ក្លឹបនេះឡើយ។
គួររំលឹកថា មហាសេដ្ឋីរុស្ស៊ីឈ្មោះ Roman Abramovitch បច្ចុប្បន្នអាយុ៥៥ឆ្នាំ បានទិញក្លឹបបាល់ទាត់ឈែលស៊ី នៅឆ្នាំ២០០៣ ក្នុងតម្លៃប្រមាណ១៦៨លានអឺរ៉ូ។ មហាសេដ្ឋីរុស្ស៊ីរូបនេះ មានភាគហ៊ុននៅក្នុងក្រុមហ៊ុនធំៗរុស្ស៊ីជាច្រើនដូចជាក្រុមហ៊ុនដែកថែប Evraz និងក្រុមហ៊ុនរ៉ែនីកែល Norilsk Nickel។ រដ្ឋាភិបាលអង់គ្លេសប៉ាន់ស្មានថា លោក Roman Abramovitch មានទ្រព្យសម្បត្តិប្រមាណ១ម៉ឺនលានអឺរ៉ូ។ ប៉ុន្មានថ្ងៃ មុននឹងរងទណ្ឌកម្មនេះ មហាសេដ្ឋីរូបនេះ បានព្យាយាមរកវិធីការពារខ្លួន ដោយបានប្រាកាសដាក់លក់ក្លឹប Chelsea ក្នុងតម្លៃប្រមាណ ៣ពាន់លានអឺរ៉ូ និងដោយអះអាងថា ប្រាក់ដែលបានមកពីការលក់នេះ នឹងប្រគល់ទៅឲ្យមូលនិធិ ជួយជនរងគ្រោះដោយសង្គ្រាមនៅអ៊ុយក្រែន។
គួរបញ្ជាក់ថា ក្រៅពីលោក Roman Abramovitch ដែលទើបតែជាប់ទណ្ឌកម្មអង់គ្លេស សម្រេចកាលពីថ្ងៃព្រហស្បតិ៍ គឺមានមហាសេដ្ឋីរុស្ស៊ីផ្សេងទៀត ដូចជា លោក Oleg Deripaska ម្ចាស់ក្រុមហ៊ុនអាលុយមីញ៉ូម Rusal លោក Igor Setchine អគ្គនាយក្រុមហ៊ុនប្រេង Rosneft លោក Andreï Kostin អគ្គនាយកធនាគារ VTB ធនាគារធំទី២របស់រុស្ស៊ី លោក Alexeï Miller អគ្គនាយកក្រុមហ៊ុន Gazprom លោក Nikolai Tokarev អគ្គនាយកក្រុមហ៊ុនដឹកជញ្ជូនប្រេងនិងហ្កាស Transneft និងលោក Dmitri Lebedev ប្រធានក្រុមប្រឹក្សារដ្ឋបាលធនាគារ Bank Rossiya។
លោកស្រី Liz Truss រដ្ឋមន្ត្រីការបរទេសអង់គ្លេស បានប្រកាសថា ទណ្ឌកម្មទាំងនេះគឺបញ្ជាក់ថា ក្រុមមហាសេដ្ឋីរុស្ស៊ី ដែលជាអ្នកចិញ្ចឹមឆ្នាំងបាយរបស់រដ្ឋាភិបាលរបស់លោកពូទីន គឺអង់គ្លេសមិនស្វាគមន៍ឡើយ។ លោកស្រីបន្ថែមថា មហាសេដ្ឋីទាំងនេះ គឺជាពួកសមគំនិតជាមួយលោកពូទីន មានបាតដៃប្រឡាក់ឈាម ហើយត្រូវតែដើរឱនមុខ ដោយភាពអាម៉ាសបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ