តុលាការរុស្ស៊ី កាត់ទោសលោក អាឡិចសី ណាវ៉ាល់នី ឲ្យជាប់ពន្ធនាគារ៩ឆ្នាំ
លោកអាឡិចសី ណាវ៉ាល់នី សកម្មជនប្រឆាំងដ៏ល្បីឈ្មោះនៅរុស្ស៊ី ដែលជាប់ឃុំ តាំងតែពីខែមករា ឆ្នាំ២០២១មកនោះ ទើបតែត្រូវបានតុលាការរុស្ស៊ី កាត់ទោសកាលពីថ្ងៃអង្គារ ទី២២មីនា ឲ្យជាប់ពន្ធនាគារ៩ឆ្នាំ។ ការសម្រេចទោស ដែលលោកអាឡិចសី ណាវ៉ាល់នី ចាត់ទុកថាជាឆន្ទៈនយោបាយរបស់លោកពូទីន ដែលចង់បំបិទមាត់ចលនាប្រឆាំងរិះគន់។ គួរបញ្ជាក់ថា ទន្ទឹមគ្នា រដ្ឋាភិបាលរុស្ស៊ី ក៏ទើបតែបានចេញច្បាប់ថ្មីមួយ ផ្តន្ទាទោសយ៉ាងធ្ងន់ រាល់ការផ្សព្វផ្សាយព័ត៌មានទាំងឡាយណា ដែលរិះគន់ការងាររបស់ស្ថាប័នរដ្ឋរុស្ស៊ី។
ចុះផ្សាយនៅថ្ងៃ៖
ស្តាប់ - ០២:៤០
អង្គសវនាការ រៀបចំនៅក្នុងមន្ទីរឃុំឃាំងផ្ទាល់តែម្តង លោកស្រីចៅក្រុមរុស្ស៊ី បានប្រកាសផ្ទន្ទាទោស លោកអាឡិចសី ណាវ៉ាល់នី ឲ្យជាប់ពន្ធនាគារចំនួន៩ឆ្នាំ ពីបទ ឆបោក និងបទល្មើស ប្រមាថមើលងាយចៅក្រម។ បទឆបោក គឺតុលាការរុស្ស៊ី បានលើកឡើងថា លោកអាឡិចសី ណាវ៉ាល់នី បានកឹបកេងប្រាក់របស់អង្គការលោក ជាច្រើនលានរូប្ល ដែលបានមកពីអំណោយសប្បុរសជន។ ចំណែកបទល្មើស ប្រមាថមើលងាយចៅក្រម គឺពាក់ព័ន្ធ និងសវនាការកាត់ទោសកាលពីឆ្នាំ២០២១ ដែលលោកបានបង្ហាញអាកប្បកិរិយាមិនគោរពចៅក្រម។
គួរបញ្ជាក់ថា ក្នុងសវនាការនៅថ្ងៃទី២២មីនា អាជ្ញាធររុស្ស៊ីបានអនុញ្ញាតឲ្យអ្នកកាសែតជាង១០០នាក់ចូលទៅស្តាប់ការប្រកាសសាលក្រម។ អ្នកយកព័ត៌មានបារាំង AFP ដែលមានវត្តមាន បានលើកឡើងថា គេឃើញរូបលោកអាឡិចសី ណាវ៉ាល់នី ក្នុងសំលៀកបំពាក់អ្នកទោស មានរូបរាងចុះស្គមច្រើន អមដំណើរដោយមេធាវីរបស់លោក។ យ៉ាងណាមិញ ក្រោយចប់សវនាការ មេធាវីរបស់អាឡិចសី ណាវ៉ាល់នី ត្រូវបាននគរបាលឃាត់ខ្លួនមួយសន្ទុះធំ នឹងបានបណ្តេញឲ្យចេញឆ្ងាយ កុំផ្តល់បទសម្ភាសន៍ឲ្យអ្នកកាសែត នៅខាងមុខមន្ទីរឃុំឃាំង។
ក្រោយចប់សវនាការ នៅលើទំព័រ Twitter លោកអាឡិចសី ណាវ៉ាល់នី បានបង្ហោះសារមួយដោយបានចាត់ទុកថា វាជាសវនាការនយោបាយ។ លោកអាឡិចសី ណាវ៉ាល់នី បន្ថែមថា លោកពូទីនខ្លាចការពិត ដែលលោកតែងតែនិយាយជាដរាបមក។ លោកបានអះអាងថា ការប្រយុទ្ធប្រឆាំងនឹងការបំបិទមាត់ ដើម្បីនាំយកការពិតមកប្រាប់ប្រជាជនរុស្ស៊ី គឺនៅតែជាអាទិភាពរបស់លោក និងក្រុមការងារលោកជានិច្ច។
គួរបញ្ជាក់ផងដែរថា លោកអាឡិចសី ណាវ៉ាល់នី នឹងត្រូវគេបញ្ជូនយកទៅដាក់ នៅមន្ទីរឃុំឃាំងមួយទៀត ដែលមានលក្ខខណ្ឌតឹងតែងខ្លាំងជាងនេះ។ ដោយឡែក មេធាវីលោកអាឡិចសី ណាវ៉ាល់នី អះអាងថានឹងប្តឹងឡើងទៅសាលាឧទ្ធរណ៍ បើទោះបីជាមានសង្ឃឹមឈ្នះតិចក៏ដោយ។ លោកអាឡិចសី ណាវ៉ាល់នី បច្ចុប្បន្នមានអាយុ៤៥ឆ្នាំ គឺជាអតីតមេធាវី ត្រូវបានគេស្គាល់ថាជាអ្នកចេញមុខរិះគន់ អំពើពុករលួយ និងអំណាចផ្តាច់ការ បក្សពួកនិយម របស់លោកពូទីន។ កាលពីខែសីហា ឆ្នាំ២០២០ លោកត្រូវបានគេប៉ុនប៉ងធ្វើឃាត ដោយការដាក់ថ្នាំបំពុល មុននឹងត្រូវបានអាជ្ញាធររុស្ស៊ីចាប់ដាក់ឃុំ ពេលលោកត្រលប់ចូលស្រុកវិញ នៅខែមករា ឆ្នាំ២០២១។
គួរកត់សំគាល់ថា ក្រៅពីផ្តន្ទាទោសលោកអាឡិចសី ណាវ៉ាល់នី តុលាការកំពូលរុស្ស៊ីបានសម្រេចកាលពីថ្ងៃអង្គារ រំលាយអង្គការសង្គមស៊ីវីលដ៏ធំមួយ ឈ្មោះ Mémorial។ មិនត្រឹមតែប៉ុណ្ណោះ រុស្ស៊ីបានចេញច្បាប់ថ្មី ផ្តន្ទាទោសដាក់ ពន្ធនាគារចំពោះការផ្សព្វផ្សាយ « ព័ត៌មានមិនពិត » ទាំងឡាយណា ដែលធ្វើឲ្យប៉ះពាល់ ដល់ស្ថាប័នរដ្ឋរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ