ចិនថារុស្ស៊ីសំខាន់និងប្រឆាំងមិនឲ្យផាត់រុស្ស៊ីចេញពីក្រុមប្រទេសហ្សេ២០
នៅថ្ងៃពុធ ២៣មីនាម្សិលមិញ ចិនបានចាត់ទុករុស្ស៊ីថាជាសមាជិកដ៏សំខាន់មួយរបស់ក្រុមប្រទេសមហាឧស្សាហកម្មហ្សេ២០ និងជំទាស់មិនឲ្យដកសមាជិកភាពរបស់រុស្ស៊ីឡើយ។ ប្រតិកម្មរបស់ចិននេះ ធ្លាក់មកក្រោយពេលដែលទីក្រុងវ៉ាស៊ីនតោនលើកឡើងពីលទ្ធភាពនៃការដកក្រុងមូស្គូចេញពីក្រុមហ្សេ២០ ជុំវិញរឿងធ្វើសង្គ្រាមឈ្លានពានអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:១៧
ទោះមានជំហរប្រយ័ត្នប្រយែងខ្លាំងក្នុងសង្រ្គាមអ៊ុយក្រែនក្តី តែចិននៅតែបានផ្តល់ការការពារផ្នែកការទូតមួយកម្រិតទៀតដល់រុស្ស៊ី ហើយនោះគឺការជំទាស់មិនឲ្យគេផាត់រុស្ស៊ីចេញពីក្រុមប្រទេសឧស្សាហកម្មហ្សេ២០ឡើយ។
អ្នកនាំពាក្យក្រសួងការបរទេសចិនលោក Wang Wenbin បានប្រាប់អ្នកសារព័ត៌មានថាហ្សេ២០ គឺជាវេទិកាដ៏សំខាន់សម្រាប់កិច្ចសហប្រតិបត្តិការសេដ្ឋកិច្ចអន្តរជាតិនិងថារុស្ស៊ីជាសមាជិកដ៏សំខាន់ម្នាក់ ហើយគ្មានសមាជិកណាមានសិទ្ធិបណ្ដេញប្រទេសផ្សេងចេញនោះទេ។
ការអត្ថាធិប្បាយរបស់អ្នកនាំពាក្យក្រសួងការបរទេសចិននេះ ធ្វើឡើងភ្លាមៗបន្ទាប់ពីទីប្រឹក្សាសន្តិសុខកំពូលរបស់អាមេរិកនិយាយថាទីក្រុងវ៉ាស៊ីនតោននឹងបន្ថែមសម្ពាធទៅលើរុស្ស៊ីឲ្យខ្ទាតចេញពីក្រុមប្រទេសហ្សេ២០ ដោយសារទង្វើឈ្លានពានលើអ៊ុយក្រែន។
កាលពីថ្ងៃអង្គារ ទី២២មីនា លោកជេក ស៊ូលីវ៉ាន់ ទីប្រឹក្សាសន្តិសុខជាតិសេតវិមានអាមេរិកនិយាយថា សម្រាប់រុស្ស៊ី វាមិនមែនជារឿងធម្មតាដូចពីមុននោះទេក្នុងការធ្វើសកម្មភាពអាជីវកម្មនៅក្នុងស្ថាប័នអន្តរជាតិ និងក្នុងសហគមន៍អន្តរជាតិ។
ចំណែកលោកប្រធានាធិបតីអាមេរិកចូ បៃដិនដែលធ្វើដំណើរទៅដល់អឺរ៉ុបនៅថ្ងៃព្រហស្បតិ៍នេះវិញ លោកគ្រោងដោះដូរយោបល់គ្នាជាមួយសម្ព័ន្ធមិត្តដែរពីការបន្ថែមទណ្ឌកម្មថ្មី និងអំពីលទ្ធភាពនៃការដករុស្ស៊ីចេញពីសមាជិកហ្សេ២០។
គួររំឭកថា ចិនមានជំហរប្រយ័ត្នប្រយែងខ្លាំងណាស់អំពីសង្រ្គាមអ៊ុយក្រែន។ យ៉ាងណាក៏ដោយចិននៅតែផ្តល់ការការពារផ្នែកការទូតដល់រុស្ស៊ីរាប់តាំងពីការមិនថ្កោលទោស និងមិនដាក់ទណ្ឌកម្មទៅលើរុស្ស៊ី ហើយឥឡូវនេះចិនថែមទាំងប្រកាសគាំទ្ររុស្ស៊ីនៅក្នុងក្រុមប្រទេសហ្សេ២០ទៀត។ ការណ៍នេះនាំឲ្យគេនឹកដល់សេចក្តីប្រកាសរបស់លោក ស៊ី ជីនពីង និងលោក ពូទីន កាលពីដើមខែកម្ភៈដែលថាមិត្តភាពរវាងចិននិងរុស្ស៊ីគឺគ្មានដែនកំណត់ឡើយ។
ពីខាងទីក្រុងមូស្គូវិញ មន្ត្រីវិមានក្រេមឡាំងបានឲ្យដឹងថាលោក ពូទីន នៅតែមានបំណងចូលរួមកិច្ចប្រជុំកំពូលហ្សេ ២០ ដែលនឹងប្រព្រឹត្តធ្វើទៅនាខែវិច្ឆិកាខាងមុខក្នុងប្រទេសឥណ្ឌូណេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ