អង់គ្លេសនិងជប៉ុនគ្រោងចុះកិច្ចព្រមព្រៀងសន្តិសុខឥណ្ឌូប៉ាស៊ីហ្វិក
នៅក្នុងដំណើរទស្សនកិច្ច របស់លោកនាយករដ្ឋមន្ត្រីជប៉ុន នៅប្រទេសអង់គ្លេស ថ្ងៃនេះ ឡុងដ៍ និងតូក្យូ អាចនឹងសម្រេចកិច្ចព្រមព្រៀងយោធា ដើម្បីពង្រឹងចំណងទំនាក់ទំនង និងស្ថិរភាពក្នុងតំបន់ឥណ្ឌូប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០១:៥១
នាយករដ្ឋមន្ត្រី អង់គ្លេស លោក ចន ស៊ុន និងសមភាគីជប៉ុន លោក ហ្វីមីអូ គីស្ហ៊ីដា ត្រូវបញ្ជាក់នៅថ្ងៃនេះអំពីគោលការណ៍នៃ កិច្ចព្រមព្រៀងយោគយល់គ្នាទៅវិញទៅមក ដែលនឹងអនុញ្ញាតឱ្យកងកម្លាំងយោធាជប៉ុន និងអង់គ្លេស ធ្វើការ ហាត់ហ្វឹកហ្វឺន និងធ្វើប្រតិបត្តិការ រួមគ្នា។ អង់គ្លេសជាប្រទេសដំបូងគេនៅអឺរ៉ុប ដែលមានកិច្ចព្រមព្រៀងជាមួយជប៉ុនបែបនេះ។ នេះជាសេចក្តីថ្លែងការណ៍របស់រដ្ឋាភិបាលអង់គ្លេសដោយបន្ថែមថា កិច្ចព្រមព្រៀងយោធាអង់គ្លេសជប៉ុន ជាការពង្រឹងវត្តមានរបស់អង់គ្លេសក្នុងតំបន់ឥណ្ឌូប៉ាស៊ីហ្វិក និងជាពង្រឹងសន្តិភាព សន្តិសុខពិភពលោក។
អង់គ្លេសនិងជប៉ុន ជាចង្កោមប្រទេសចំនួន១៤ដែលនឹងបញ្ជូនទាហានទៅចូលរួមធ្វើសមយុទ្ធប្រចាំឆ្នាំរបស់អាមេរិកនិងឥណ្ឌូណេស៊ី នៅប្រជុំកោះស៊ូម៉ាត្រា និងកោះបូណេអូ ក្រោមផ្ទៃនៃភាពតានតឹងកាន់តែខ្លាំងឡើងៗជាមួយចិន ដែល គ្រប់គ្រងសមុទ្ទចិនខាងត្បូងអស់មួយភាគធំ មិនខ្វល់នឹងសម្រែកទាមទាររបស់ប្រទេសជិតខាង។ សមុទ្ទចិនខាងត្បូងជាផ្លូវចរាចរណ៍ពាណិជ្ជកម្មដ៏សំខាន់របស់ពិភពលោក និងមានប្រទេសចំនួន១០ រាប់ទាំងឥណ្ឌូណេស៊ីផង ជាប់ជម្លោះជាមួយចិន។ ប្រឈមនឹងមហិច្ឆតាចិន អង់គ្លេសក៏បានចុះកិច្ចព្រមព្រៀងសន្តិសុខតំបន់ឥណ្ឌូប៉ាស៊ីហ្វិកជាមួយសហរដ្ឋអាមេរិក អូស្ត្រាលីទៀតកាលពីឆ្នាំទៅ។
ក្រៅសំណុំរឿងសន្តិសុខ ប្រមុខដឹកនាំជប៉ុនដែលជាមហាអំណាចសេដ្ឋកិច្ចពិភពលោកលំដាប់ទីបី និងអង់គ្លេស មហាអំណាចលំដាប់លេខ៥ មិនភ្លេចជជែកពិភាក្សាគ្នាអំពីសង្គ្រាមនៅអ៊ុយក្រែន បរិស្ថាន និងការធ្វើអន្តរកាលថាមពលស្អាតដែលជាការចូលរួមចំណែកផ្តល់ជម្រើសថ្មីសម្រាប់មកជំនួសការប្រើប្រាស់ប្រេងកាត និងឧស្ម័ននាំមកពីរុស្ស៊ី។ សូមបញ្ជាក់ថា ជប៉ុនជាប្រទេសដ៏កម្រមួយក្នុងទ្វីបអាស៊ីដែលគាំទ្រ និងចូលរួមជាមួយក្រុមបស្ចិមលោក ដោយចំហ និងច្បាស់លាស់ ក្នុងការដាក់ទណ្ឌកម្មរុស្ស៊ី ពីបទឈ្លានពានអ៊ុយក្រែន។ ជំហរគាំទ្រ ដែលបានធ្វើឱ្យលោកនាយករដ្ឋមន្ត្រី គីស្ហ៊ីដា និងពលរដ្ឋជប៉ុនជាង៦០នាក់ផ្សេងទៀត ក្លាយជាបុគ្គលដែលរុស្ស៊ីមិនស្វាគមន៍ឱ្យចូលជាន់ទឹកដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ